2025 جىلعى 17 شىلدەدە ازەربايجاننىڭ حالىق اقىنى باقتيار ۆاحابزادەنىڭ 100 جىلدىق مەرەيتويىنا وراي ازەربايجان جازۋشىلار وداعىنىڭ «ناتاۆان» كلۋبىندا عىلىمي كونفەرەنتسيا جانە اقىن شىعارماشىلىعىن ناسيحاتتاۋعا ارنالعان ارنايى تانىستىرىلىم ءوتتى. ءىس-شارا تۇركى مادەنيەتى جانە مۇراسى قورى، ازەربايجان رەسپۋبليكاسىنىڭ مادەنيەت مينيسترلىگى جانە ازەربايجان جازۋشىلار وداعىنىڭ بىرلەسكەن ۇيىمداستىرۋىمەن ءوتتى.

ءىس-شارانىڭ ماڭىزدى ساتتەرىنىڭ ءبىرى — تۇركى مادەنيەتى جانە مۇراسى قورى ازەربايجان جانە تۇرىك تىلدەرىندە باسىپ شىعارعان «ءوزىمىزدى كەسكەن قىلىش» كىتابىنىڭ تۇساۋكەسەرى بولدى. بۇل باسىلىم باقتيار ۆاحابزادەنىڭ ادەبي شەبەرلىگىن، سونداي-اق تۇركى دۇنيەسىنە ارنالعان فيلوسوفيالىق ءارى ۇلتتىق ۇندەۋىن ەل ەسىنە سالاتىن شىعارما رەتىندە باعالاندى.

مەرەيتويلىق كەشتە ءسوز سويلەگەندەر قاتارىندا تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا، ازەربايجان جازۋشىلار وداعىنىڭ توراعاسى، حالىق جازۋشىسى انار، ەڭبەك سىڭىرگەن ونەر قايراتكەرى، پروفەسسور، دراماتۋرگ-جازۋشى ءالي ءامىرلي بولدى. سونىمەن قاتار قوناقتار قاتارىندا اتاتۇرىك ورتالىعىنىڭ ديرەكتورى نيزامي دجافاروۆ (ازەربايجان), حالىقارالىق «الاش» سىيلىعىنىڭ لاۋرەاتى قادىربەك قۇنىپياۇلى (قازاقستان), اقىن-اۋدارماشى ادنان وزەر (تۇركيا), فيلولوگيا عىلىمدارىنىڭ دوكتورى، پروفەسسور ادحامبەك اليمبەكوۆ (وزبەكستان), سونداي-اق ماجارستان، مولدوۆا، بەلورۋس ەلدەرىنەن كەلگەن ارنايى قوناقتار دا قاتىستى.

كونفەرەنتسيانى تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا اشتى. ول «باقتيار ۆاحابزادە شىعارماشىلىعىندا تۇركى الەمىنىڭ بىرلىگى» اتتى بايانداماسىندا اقىننىڭ پوەزياسىنان كورىنىس تاپقان جالپىتۇركىلىك يدەيالاردىڭ جاستار اراسىندا كەڭىنەن وقىلۋىنىڭ ماڭىزىن اتاپ ءوتتى. ۆاحابزادەنىڭ شىعارماشىلىعى تەك ازەربايجان عانا ەمەس، بۇكىل تۇركى الەمى ءۇشىن ورتاق ادەبي ءارى رۋحاني مۇرا ەكەنىن ايتىپ، مۇنداي باسىلىمداردىڭ تۇركى حالىقتارى اراسىنداعى مادەني-رۋحاني بايلانىستى نىعايتاتىنىن جەتكىزدى.

شارا بارىسىندا ءسوز سويلەگەن قاتىسۋشىلار ۇلى اقىننىڭ تۇركى پوەزياسىندا ورناتقان رۋحاني كوپىرلەرى، انا ءتىلى مەن ۇلتتىق بولمىس تاقىرىپتارىندا قۇندى وي-پىكىرلەرىن ورتاعا سالدى.

كونفەرەنتسياعا ونەر مەن ادەبيەت وكىلدەرى، باق جۋرناليستەرى، جاس جازۋشىلار مەن قوعام بەلسەندىلەرى بەلسەنە قاتىستى. بۇل شارا تەك ءبىر اقىننىڭ مەرەيتويى ەمەس، بۇكىل تۇركى ادەبي كەڭىستىگىندەگى ورتاق قۇندىلىقتاردى دارىپتەۋگە جانە ءوزارا عىلىمي-ادەبي بايلانىستى ارتتىرۋعا ارنالعان ماڭىزدى وقيعا بولدى.

Abai.kz