قازاقستاندا ايەلدەر اراسىندا جۇرەك، ونكولوگيا جانە تىنىس الۋ اۋرۋلارى ءجيى تىركەلىپ وتىر. دەنساۋلىق ساقتاۋ مينيسترلىگىنىڭ رەسمي جاۋابىنا سۇيەنسەك، جاس ەرەكشەلىگىنە بايلانىستى اۋرۋ تۇرلەرىنىڭ دە ايتارلىقتاي ايىرماشىلىعى بار.

دەنساۋلىق ساقتاۋ مينيسترلىگى ايەلدەر دەنساۋلىعىنا قاتىستى وزەكتى مالىمەتتەردى ۇسىندى. ۆەدومستۆو دەرەگىنشە، ەلىمىزدە ايەلدەر ءجيى شالدىعاتىن اۋرۋلار بىرنەشە نەگىزگى توپقا بولىنەدى.

1. جۇرەك-قان تامىرلارى اۋرۋلارى

بۇل دەرت – اسىرەسە 50 جاستان اسقان ايەلدەر اراسىنداعى ءولىم-ءجىتىمنىڭ باستى سەبەبى. ارتەريالىق گيپەرتەنزيا، جۇرەك يشەمياسى، ينسۋلت سەكىلدى اۋرۋلار ءجيى كەزدەسەدى.

2. ونكولوگيالىق اۋرۋلار

ايەلدەر اراسىندا ءسۇت بەزى قاتەرلى ىسىگى مەن جاتىر موينى وبىرى – ەڭ ءجيى تارالعان قاتەرلى ىسىك تۇرلەرى. ەرتە دياگنوستيكا مەن پروفيلاكتيكالىق تەكسەرىس بۇل اۋرۋلاردىڭ الدىن الۋعا كومەكتەسەدى.

3. تىنىس الۋ جولدارىنىڭ اۋرۋلارى

وكپەنىڭ سوزىلمالى وبسترۋكتيۆتى اۋرۋلارى ء(وسوا), دەمىكپە جانە باسقا دا تىنىس جولدارى دەرتتەرى – ايەلدەر اراسىندا ءجيى تىركەلەتىن اۋرۋلار قاتارىندا.

4. تىرەك-قيمىل اپپاراتىنىڭ اۋرۋلارى

وستەوپوروز جانە ارتريت سەكىلدى اۋرۋلار، اسىرەسە ەگدە جاستاعى ايەلدەردە ءجيى بايقالادى. بۇل – قيمىل-قوزعالىستى شەكتەپ، ءومىر ساپاسىن تومەندەتەتىن فاكتورلاردىڭ ءبىرى.

5. پسيحيكالىق بۇزىلۋلار

دەپرەسسيا مەن مازاسىزدىق – ايەلدەر اراسىندا ءجيى كەزدەسەتىن پسيحيكالىق دەنساۋلىق پروبلەمالارى. سترەسسكە توزىمسىزدىك پەن گورمونالدى وزگەرىستەر بۇل جاعدايلاردى ۋشىقتىرۋى مۇمكىن.

جاس ەرەكشەلىگى بويىنشا اۋرۋشاڭدىق قالاي وزگەرەدى؟

30 جاسقا دەيىنگى ايەلدەر: بۇل كەزەڭدە گينەكولوگيالىق اۋرۋلار، ينفەكتسيالار جانە رەپرودۋكتيۆتى جۇيەگە قاتىستى باسقا دا دەرتتەر ءجيى كەزدەسەدى.

30-50 جاس:جۇرەك-قان تامىرلارى اۋرۋلارىنىڭ بەلگىلەرى ارتا باستايدى، قاتەرلى ىسىككە شالدىعۋ قاۋپى دە وسى جاستا بايقالادى.

50 جاستان جوعارى: ونكولوگيا، جۇرەك اۋرۋلارى مەن تىرەك-قيمىل اپپاراتىنىڭ بۇزىلىستارى جيىلەدى.

رەپرودۋكتيۆتى دەنساۋلىق جانە انا ءولىمى

مينيسترلىكتىڭ مالىمەتىنشە، بەدەۋلىك، ەندومەتريوز جانە جاتىر ميوماسى سياقتى اۋرۋلار رەپرودۋكتيۆتى جاستاعى ايەلدەر اراسىندا كەڭ تارالعان.
قازاقستاندا وتباسىن جوسپارلاۋ مەن رەپرودۋكتيۆتى دەنساۋلىق قىزمەتتەرىن جاقسارتۋ بويىنشا بىرقاتار باعدارلاما ىسكە اسىپ جاتىر. بۇل كورسەتكىش انا ءولىمىنىڭ تومەندەۋىنە دە ىقپال ەتىپ وتىر. دەگەنمەن، شالعاي وڭىرلەردە مەديتسينالىق كومەكتىڭ قولجەتىمدىلىگى ءالى دە وزەكتى ماسەلە بولىپ قالىپ وتىر.

ەسكە سالايىق، بۇعان دەيىن قازاقستاندا بالالار مەن جاستار اراسىندا ءجيى كەزدەسەتىن 6 اۋرۋ ءتۇرى جونىندە جازعان ەدىك. دەنساۋلىق ساقتاۋ مينيسترلىگى دەرەگىنە سايكەس، بالالار مەن جاسوسپىرىمدەر ساناتىنداعى ازاماتتار اراسىندا بىرقاتار اۋرۋ تۇرلەرى ءجيى كەزدەسەدى.

سونىمەن قاتار، قازاقستاندا زەينەتكەرلەر اراسىندا ءجيى كەزدەسەتىن 6 اۋرۋ ءتۇرى تۋرالى دا جازدىق. دەنساۋلىق ساقتاۋ مينيسترلىگىنىڭ ستراتەگيا جانە دامۋ دەپارتامەنتىنىڭ مالىمەتىنشە، بۇل قۇبىلىس تەك قازاقستاندا عانا ەمەس، كوپتەگەن ەلدەردە بايقالادى.

Abai.kz