تايلاند پەن كامبودجا بەس كۇنگە سوزىلعان قارۋلى قاقتىعىستان كەيىن شۇعىل جانە ءسوزسىز اتىستى توقتاتۋ تۋرالى كەلىسىمگە كەلدى. قاقتىعىس سالدارىنان كەمىندە 33 ادام قازا تاۋىپ، ون مىڭداعان ادام باسپاناسىن تاستاپ كەتۋگە ءماجبۇر بولدى.

مالايزيا پرەمەر-ءمينيسترى انۆار يبراگيم اتىستى توقتاتۋ – "بەيبىتشىلىك پەن قاۋىپسىزدىكتى قالپىنا كەلتىرۋگە باعىتتالعان ماڭىزدى العاشقى قادام" ەكەنىن مالىمدەدى. ونىڭ ايتۋىنشا، اتىس جۇما كۇنى ءتۇن ورتاسىندا توقتاتىلادى.

بۇعان دەيىن تايلاند دەلدالدىق ۇسىنىستى قابىلداماعان ەدى. الايدا اقش پرەزيدەنتى دونالد ترامپ ەكى ەلگە ساۋدا تاريفتەرى بويىنشا كەلىسسوزدەر تەك سوعىس توقتاعاننان كەيىن باستالادى دەپ مالىمدەگەننەن كەيىن تاراپتار كەلىسىمگە كەلدى.

قاقتىعىسقا ەكى ەل اراسىنداعى ەجەلگى شەكارا داۋى سەبەپ بولدى. مامىردا كامبودجالىق ساربازدىڭ قازا تابۋىنان كەيىن جاعداي ۋشىعىپ، ەكى تاراپ ءبىر-بىرىنە ەكونوميكالىق شەكتەۋلەر ەنگىزىپ، شەكارالىق وتكىزۋ بەكەتتەرىن جاپتى.

سوڭعى اپتادا تايلاندتىق سارباز مينا جارىلىسىنان اياعىنان ايىرىلىپ، جاعداي كۇرت شيەلەنىسكەن. قوس تاراپ ءوزارا اتىسقا كىنانى ءبىر-بىرىنە ارتىپ وتىر.

تايلاند تاراپىنىڭ مالىمەتىنشە، ەلدى مەكەندەرگە جاسالعان شابۋىلدار سالدارىنان بەيبىت تۇرعىندار قازا تاپقان. كامبودجا دا 13 ادامنىڭ، ونىڭ ىشىندە 8 بەيبىت تۇرعىننىڭ قازا تاپقانىن حابارلادى.

بۇۇ مەن ASEAN (وڭتۇستىك-شىعىس ازيا مەملەكەتتەرى قاۋىمداستىعى) وكىلدەرى كەلىسىمدى باقىلاپ، ەكى ەل اسكەري كۇشتەرىن شەكارادان شەگىندىرۋ تۋرالى كەلىسسوزدەر جۇرگىزۋگە كىرىسكەن. سونىمەن قاتار بەيتاراپ باقىلاۋشىلاردى تارتۋ ۇسىنىلدى.

تايلاند بيلىگى كامبودجا تاراپىنان شىنايى نيەت بايقالمايىنشا اتىستى توقتاتۋ مۇمكىن ەمەس دەگەن ۇستانىمدا بولدى. ولار زىمىراندىق شابۋىلدار سالدارىنان 14 بەيبىت تۇرعىن قازا تاپقانىن العا تارتقان.

140 مىڭعا جۋىق تايلىق ازامات ەۆاكۋاتسيالانعان. كامبودجا دا 135 مىڭ تۇرعىندى شەكارا بويىنان قاۋىپسىز ايماقتارعا كوشىرگەن.

مامانداردىڭ ايتۋىنشا، ەكى ەل ارمياسى اراسىنداعى تەرەڭ سەنىمسىزدىك پەن ۇلتشىلدىق كوڭىل-كۇي جاعدايدى كۇردەلەندىرىپ وتىر. قاقتىعىس ۋشىققان كەزدە ءتىپتى رەاكتيۆتىك زىمىران جۇيەلەرى قولدانىلىپ، بەيبىت حالىق اراسىندا شىعىن كوپ بولعان.

ەسكە سالساق، كامبودجا بىرىككەن ۇلتتار ۇيىمىنىڭ قاۋىپسىزدىك كەڭەسىنىڭ جابىق وتىرىسىندا تايلاندپەن اراداعى قارۋلى قاقتىعىستى دەرەۋ توقتاتۋعا ۇندەدى. تايلاند پەن كامبودجا اراسىنداعى قاقتىعىس كۋرورتتىق ايماقتارعا جاقىنداعانى جايلى دا جازدىق.