27 شىلدەدەن باستاپ ىشكى ىستەر مينيسترلىگى "تۇنگى قالاداعى بالالار" اتتى جەدەل-الدىن الۋ ءىس-شاراسىن وتكىزۋدە.

بۇل ءىس-شارانىڭ باستى ماقساتى – بالالاردىڭ قۇقىقتارىن قورعاۋ جانە جاسوسپىرىمدەر اراسىنداعى قۇقىقبۇزۋشىلىقتاردىڭ الدىن الۋ.

جەدەل-پروفيلاكتيكالىق ءىس-شارانىڭ العاشقى كۇنى پوليتسيا بولىمشەلەرىنە ەكى مىڭنان استام ءجاسوسپىرىم جەتكىزىلدى، ولاردىڭ ىشىندە تورتەۋى قىلمىس جاساعانى ءۇشىن، ەكى مىڭعا جۋىعى اكىمشىلىك قۇقىقبۇزۋشىلىق جاساعانى ءۇشىن.

70 كامەلەتكە تولماعان بالا قاراۋسىز جانە قاڭعىباستىق جاعدايىندا انىقتالىپ، بەيىمدەۋ ورتالىقتارىنا جەتكىزىلدى.

1700-دەن استام بالا تۇنگى ۋاقىتتا كوشەدە جانە ويىن-ساۋىق ورىندارىندا جۇرگەن جەرىنەن انىقتالىپ، اتا-انالارىنا تاپسىرىلدى.

48 كاسىپكەر بالالاردىڭ تۇنگى ۋاقىتتا ولاردىڭ مەكەمەسىندە بولۋىنا جول بەرگەنى ءۇشىن اكىمشىلىك جاۋاپكەرشىلىككە تارتىلدى.

51 بالا ماس كۇيىندە كوشەدە جۇرگەن جەرىنەن وقشاۋلاندى.

بۇل جاعدايلاردىڭ بارلىعى دەرلىك بالالارعا قاتىستى قىلمىستىڭ ورىن الۋىنا اكەلۋى مۇمكىن ەدى. پوليتسيا ورگاندارى الدىن الا شارالار قابىلداپ، مۇنداي وقيعالارعا جول بەرمەدى.

"قۇرمەتتى اتا-انالار! بالالارىڭىزدىڭ ءومىرى مەن قاۋىپسىزدىگى ءۇشىن جەكە جاۋاپتى ەكەندەرىڭىزدى ەسكە سالامىز. 220 اتا-انا بالالارىنا دۇرىس تاربيە بەرمەگەنى ءۇشىن اكىمشىلىك جاۋاپكەرشىلىككە تارتىلدى. دۇرىس ەمەس مىنەز-قۇلىقتى 116 ءجاسوسپىرىم جانە بالا تاربيەسىمەن اينالىسپايتىن 139 اتا-انا انىقتالدى. جاسوسپىرىمدەردەن توعىز تىيىم سالىنعان زات تاركىلەندى، ولاردىڭ ىشىندە ءبىر دانا پنەۆماتيكالىق قارۋ، بەس پىشاق جانە ءۇش كاستەت بار. بۇل زاتتار تاركىلەنبەسە، ولاردىڭ قىلمىسقا پايدالانىلۋ قاۋپى جوعارى بولار ەدى", – دەدى ءىىم اكىمشىلىك پوليتسيا كوميتەتىنىڭ قىزمەتكەرى بوتاكوز جالەكەشوۆا.

سونىمەن قاتار بالالاردىڭ ءومىرى مەن دەنساۋلىعىنا قاۋىپ توندىرەتىن 159 ينتەرنەت-سايت انىقتالىپ، ولاردى بۇعاتتاۋ شارالارى قابىلداندى. قۇقىقبۇزۋشىلىقتاردىڭ الدىن الۋ ماقساتىندا 900-دەن استام ماتەريال بۇقارالىق اقپارات قۇرالدارىندا جاريالاندى.

"قۇرمەتتى ازاماتتار! قازىر جازعى دەمالىس ۋاقىتى. بالالارىڭىزدىڭ قايدا جانە كىممەن جۇرگەنىنە ەرەكشە كوڭىل بولۋلەرىڭىزدى سۇرايمىز. كوپ جاعدايدا اتا-انالار بالالارىنا كەشكە دەيىن سەرۋەندەۋگە رۇقسات بەرەدى، بالاعا سەنىم ءبىلدىرىپ، ء"بىزدىڭ بالا ەشقاشان جاماندىققا بارمايدى" دەپ ويلايدى. تۇنگى ۋاقىتتا ۇلكەندەردىڭ قاراۋىنسىز جۇرگەن بالا قىلمىستىڭ قۇربانى بولۋى مۇمكىن. ءبىر عانا كۇندە سونشا پىشاق پەن كاستەتتىڭ تاركىلەنۋى – وسى قاۋىپتىڭ ناقتى دالەلى. سول سەبەپتى بالاڭىزدىڭ قايدا، كىممەن جۇرگەنىن ءبىلىپ وتىرىڭىز. بالالارىڭىزعا قاۋىپ تونگەن جاعدايدا بىردەن اتا-اناسىنا نەمەسە پوليتسياعا حابارلاسۋدى ۇيرەتىڭىز. ولاردىڭ تەلەفونىنا "102" ءموبيلدى قوسىمشاسىن جۇكتەپ قويىڭىز. بۇل قوسىمشادا پوليتسيانى شۇعىل شاقىرۋ تۇيمەسى بار. ىشكى ىستەر مينيسترلىگى بالالاردىڭ قۇقىقتارىن قورعاۋعا ەرەكشە كوڭىل بولەدى. ولاردىڭ قاۋىپسىزدىگىن قامتاماسىز ەتۋ – بارلىق پوليتسيا قىزمەتتەرىنىڭ باستى مىندەتى", – دەدى بوتاكوز جالەكەشوۆا.

Abai.kz