ىشكى ىستەر ءمينيسترىنىڭ ورىنباسارى سانجار ءادىلوۆ الماتىدا ادام ولىمىنە اكەلگەن جول-كولىك وقيعاسىن تەرگەۋگە قاتىستى پىكىر ءبىلدىردى.

- الماتىداعى اپات بويىنشا ءىستى تەرگەۋ اياقتالۋعا جاقىن. تاياۋ كۇندە ءىس ماتەريالدارىن الدىمەن زارداپ شەككەن تاراپقا، ودان كەيىن كۇدىكتى مەن ونىڭ قورعاۋشىلارىنا تاپسىرامىز، - دەدى سانجار ءادىلوۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ەسكە سالايىق، 21 ناۋرىزعا قاراعان ءتۇنى Zeekr كولىگىنىڭ جۇرگىزۋشىسى ءال-فارابي داڭعىلىنىڭ بويىمەن كەلە جاتىپ، قارسى قوزعالىس جولاعىنا شىعىپ كەتىپ، Mercedes اۆتوكولىگىمەن سوقتىعىسقان. جول اپاتى سالدارىنان Mercedes كولىگىنىڭ جۇرگىزۋشىسى مەن ەكى جولاۋشىسى وقيعا ورنىندا قازا تاپتى.

اتالعان دەرەك بويىنشا قر قىلمىستىق كودەكسىنىڭ 345-بابى 4-بولىگى بويىنشا قىلمىستىق ءىس قوزعالدى. بۇل باپ بويىنشا 10 جىلعا دەيىن باس بوستاندىعىنان ايىرۋ جازاسى قاراستىرىلعان.

ىشكى ىستەر ءمينيسترى ەرجان سادەنوۆ الماتىداعى جول اپاتىنان كەيىن بىرقاتار باسشى قىزمەتىنەن بوساتىلعانىن مالىمدەدى.

Abai.kz