افينادا (گرەكيا) ءوتىپ جاتقان گرەك-ريم كۇرەسىنەن جاسوسپىرىمدەر اراسىنداعى U17 الەم چەمپيوناتىندا قازاقستان قۇراماسى ءۇشىن تاريحي ءسات ورىن الدى. 45 كەلى سالماق دارەجەسىندە ەل نامىسىن قورعاعان جاڭاجول قۋانىشبەك فينالدىق بەلدەسۋدە قىرعىز بالۋانى نۋركەريم كۋماربەكوۆتى ايقىن باسىمدىقپەن جەڭىپ، الەم چەمپيونى اتاندى.

بۇل – قازاق جاس بالۋاندارى ءۇشىن ۇلكەن جەتىستىك. جاڭاجولدىڭ جەڭىسى – تەك جەكە جەڭىس قانا ەمەس، سونىمەن قاتار ەلىمىزدەگى بالۋاندىق مەكتەپتىڭ جۇيەلى دامۋىنىڭ ناتيجەسى.

ايتا كەتەيىك، بۇل چەمپيوناتتا قازاقستان جاسوسپىرىمدەر قۇراماسى جالپى كوماندالىق كورسەتكىش بويىنشا دا جاقسى ناتيجە كورسەتىپ كەلەدى. بۇعان دەيىن:

• نۇرداۋلەت قۇمارۇلى (48 كەلى), نۇرالى اسقار (55 كەلى) — كۇمىس جۇلدەگەر اتانسا،
• شاميل دوسبول (65 كەلى) — قولا مەدالعا يە بولدى.

جاس سپورتشىلارىمىزدىڭ تاباندىلىعى مەن رۋحىنىڭ ارقاسىندا قازاقستان كۇرەسى تاعى ءبىر مارتە الەم ارەناسىندا بيىك بەلەستى باعىندىردى.

Abai.kz