ەل چەمپيوناتى بيىل ايرىقشا مانگە يە بولدى. ويتكەنى وسى جارىستىڭ ناتيجەسىنە قاراي ۇلتتىق قۇرامانىڭ الداعى حالىقارالىق باسەكەلەرگە قاتىساتىن نەگىزگى ءتىزىمى ايقىندالادى.

اتالعان ەل بىرىنشىلىگىندە ۇلتتىق قۇرامانىڭ نەگىزگى بالۋاندارىمەن قاتار قازاقستاننىڭ تۇكپىر-تۇكپىرىنەن ۇزدىكتەر جينالعان بولاتىن. دەگەنمەن ءساۋىر ايىندا وتكەن ازيا چەمپيوناتىندا جۇلدەگەر اتانعان جانە جاراقاتىنا بايلانىستى كەيبىر بالۋاندار بۇل باسەكەگە قاتىسپادى. بۇل تۋرالى ۇلتتىق قۇرامانىڭ باس باپكەرى قونىسبەك كارىمۇلى ايتتى. 

"جارىسقا نەگىزگى قۇرامداعى بالۋانداردىڭ بارلىعى دەرلىك قاتىستى. الەم چەمپيونى جانە وليمپيادا جۇلدەگەرى دە بەلدەستى. تەك 67 كەلىگە دەيىنگى سالماقتا مەيىرجان شەرماحانبەت جاراقاتىنا بايلانىستى كۇرەسپەدى. سونىمەن قاتار بيىل وتكەن ازيا چەمپيوناتىنىڭ جەڭىمپازى الماتبەك امانبەك (72 كەلىگە دەيىن) جارىستان بوساتىلدى", - دەدى باس باپكەر.

ايتا كەتەرلىگى، كەيبىر بالۋاندار بۇل باسەكەدە ءوز سالماقتارىندا كۇرەسكەن جوق. سولاردىڭ قاتارىندا قولا جۇلدەگە يە بولعان يسلام ەۆلوەۆ بار. وتانداسىمىز ىشكى بىرىنشىلىكتە 87 كەلىگە دەيىنگى سالماقتا كۇرەستى.

سونداي-اق بيىلعى قازاقستان كۋبوگىندا الىشەر ەرعالي گرەك-ريم كۇرەسىنەن سىنعا ءتۇستى. وتانداسىمىز بۇعان دەيىن ەركىن كۇرەستەن ەكى مارتە وليمپيادا ويىندارىنا قاتىسىپ، ازيا چەمپيوناتىندا ءتورت رەت جۇلدەگەر اتانعان بولاتىن. ۇلتتىق قۇرامانىڭ باس باپكەرى قونىسبەك كارىمۇلى بالۋاننىڭ تولىقتاي گرەك-ريم كۇرەسىنە اۋىسقانىن ايتتى.

"يسلامنىڭ نەگىزگى سالماعى - 87 كەلى. دەگەنمەن بۇعان دەيىنگى حالىقارالىق جارىستاردا 97 كەلىگە دەيىنگى سالماقتا كۇرەسىپ جۇرگەن. بىراق قازاقستان كۋبوگى الدىندا سىرقاتتانىپ، تولىق بابىنا كەلە المادى. سوندىقتان 87 كەلىگە دەيىنگى سالماقتا ونەر كورسەتتى.

ءيا، الىشەر ەرعالي گرەك-ريم كۇرەسىنە اۋىستى. قازىر ول جىگىتتى حورۆاتيادا ءوتىپ جاتقان بىرىككەن وقۋ-جاتتىعۋ جيىنىنا جىبەردىك. سونداي-اق 130 كەلىدە ولجاس سىرلاباي، 97 كەلىدە نۇراسىل امانالى جانە يۋسۋف ماتسيەۆ وقۋ-جاتتىعۋ جيىنىنا اتتاندى", - دەدى مامان.

باس باپكەر قازاقستان كۋبوگىندا كوزگە تۇسكەن بالۋانداردى دا اتاپ ءوتتى.

"72 كەلىدە نەگىزگى كوشباسشى بەلدەسكەن جوق. ال ءمادي دانەلوۆ بۇعان دەيىن U23 ساناتىنداعى قازاقستان چەمپيوناتىندا جەڭىلىپ قالعان ەدى. بيىل بابىندا كەلىپ، چەمپيون اتاندى.

الداعى حالىقارالىق جارىستاردا ازيا چەمپيوناتى مەن قازاقستان كۋبوگىنىڭ جەڭىمپازدارىن اپارىپ، مۇمكىندىكتەرىن بايقاپ كورەمىز. سونداي-اق 55 كەلىدە الپامىس داستانبەكتى وسى سالماقتاعى كوشباسشىمەن بەلدەستىرىپ، دەڭگەيىن سارالايمىز", - دەدى باپكەر.

سونىمەن قاتار ۇلتتىق قۇرامانىڭ باس باپكەرى الداعى ازيا ويىندارى مەن الەم چەمپيوناتىنا قاتىساتىن قۇرامانىڭ قالاي انىقتالاتىنىن دا ايتتى.

"الداعى تۋرنيرلەردەن كەيىن ناقتى شەشىم قابىلدايمىز. قازىر 15-30 مامىر ارالىعىندا شىمكەنتتە وقۋ-جاتتىعۋ جيىنى ءوتىپ جاتىر. ودان كەيىن 6-16 ماۋسىم كۇندەرى قالپىنا كەلتىرۋ جيىنى ۇيىمداستىرىلادى. شىلدە ايىندا تۇركيا قۇراماسىمەن بىرلەسكەن جاتتىعۋ وتكىزەمىز. كەيىن ۆەنگريانىڭ بۋداپەشت قالاسىندا وتەتىن ءتورتىنشى رەيتينگتىك تۋرنيرگە قاتىسامىز. سول جارىستىڭ ناتيجەسىنە قاراي ازيا ويىندارىنا باراتىن سپورتشىلاردى انىقتايمىز. ال دورتمۋندتاعى تۋرنيردەن كەيىن الەم چەمپيوناتىنا قاتىساتىن قۇرام جاساقتالادى", - دەدى قونىسبەك كارىمۇلى.

Abai.kz