2025 جىلعى 29 شىلدەدە پرەزيدەنتتەر قاسىم-جومارت توقاەۆ پەن رەجەپ تايپ ەردوعان قازاقستان-تۇركيا جوعارى دەڭگەيدەگى ستراتەگيالىق ەكونوميكالىق ىنتىماقتاستىق كەڭەسىنىڭ 5-ءشى وتىرىسىن وتكىزگەنى بەلگىلى.

قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ وسى وتىرىستان كەيىنگى ءباسپاسوز مالىمدەمەسىندە مادەني-گۋمانيتارلىق بايلانىس – قازاق-تۇرىك قاتىناسىنىڭ التىن كوپىرى، سونىڭ ىشىندە ءبىلىم جانە عىلىم سالاسىنىڭ ورنى ەرەكشە ەكەنىن اتاپ كورسەتىپ:

«ءبىز وسى يگى باستامالاردى جالعاستىرىپ، ءبىلىم بەرۋ، تۋريزم، مەديتسينا سالاسىنداعى بايلانىستى ودان ءارى كۇشەيتۋگە مۇددەلىمىز»، - دەگەن بولاتىن.

سونىمەن بىرگە قازاقستان رەسپۋبليكاسىنىڭ ۇكىمەتى جانە تۇركيا رەسپۋبليكاسىنىڭ ۇكىمەتى اراسىندا عىلىم جانە تەحنولوگيالار سالاسىنداعى ىنتىماقتاستىق تۋرالى يمپلەمەنتاتسيالىق حاتتاماعا قول قويۋ جوسپارلانىپ وتىر.

قازاقستان مەن تۇركيا اراسىنداعى عىلىم جانە تەحنولوگيالار سالاسىنداعى ىنتىماقتاستىقتى ودان ءارى نىعايتۋداعى كۇتىلەتىن ناتيجەلەر:

- بىرلەسكەن عىلىمي-زەرتتەۋ جانە تاجىريبەلىك-كونسترۋكتورلىق جوبالاردى ىسكە اسىرۋ مۇمكىندىكتەرىن زەردەلەۋ;

- اكادەميالىق زەرتتەۋلەر جۇرگىزۋ ماقساتىندا جەكە عالىمدارمەن الماسۋ;

- بىرلەسكەن اكادەميالىق عىلىمي جانە تەحنولوگيالىق ءىس-شارالاردى ۇيىمداستىرۋ جانە ولارعا قاتىسۋ;

- تەحنوپاركتەردى باسقارۋ تۋرالى اقپارات الماسۋ، بىرلەسكەن وزىق تاجىريبە ورتالىقتارى مەن بىرلەسكەن زەرتحانالار قۇرۋ جونىندەگى ءىس-شارالاردى جۇرگىزۋ;

- زەرتتەۋلەر، ازىرلەمەلەر جانە يننوۆاتسيالار بويىنشا ەۋروپالىق وداقتىڭ (EU FPs) نەگىزدەمەلىك باعدارلامالارىنا قاتىسۋ.

ءبىزدىڭ «بولاشاق» حالىقارالىق باعدارلاماسىنىڭ «500 عالىم» جوباسى بويىنشا تۇركيا رەسپۋبليكاسىنىڭ استاناسى انكارا قالاسىندا ءوتىپ جاتقان عىلىمي تاعىلىمدامامىزدىڭ جوسپار-كەستەسىندە مىناداي جۇمىستار جۇرگىزۋ كوزدەلگەن:

- تۇركيا رەسپۋبليكاسىنىڭ QS World University Ranking: Top Global Universities-كە كىرەتىن ۇزدىك ۋنيۆەرسيتەتتەرىنىڭ عىلىمي-ءبىلىم بەرۋ سالاسىنداعى قىزمەتتەرىن زەرتتەۋ;

- تۇركيا رەسپۋبليكاسى مەن قازاقستان رەسپۋبليكاسى اراسىنداعى عىلىم جانە ءبىلىم بەرۋ سالاسىنداعى ىنتىماقتاستىقتى نىعايتۋدىڭ ءادىس-تاسىلدەرىن زەرتتەۋ.

2025 جىلعى 5 تامىز كۇنى «بولاشاق» حالىقارالىق باعدارلاماسىنىڭ «500 عالىم» جوباسى بويىنشا عىلىمي تاعىلىمداما اياسىندا انكارا ۋنيۆەرسيتەتىنىڭ رەكتورى، پروفەسسور دوكتور نەجدەت ءۇنۇۆار (Prof. Dr. Necdet UNUVAR) مىرزانىڭ ارنايى قابىلداۋىندا بولدىم.

انكارا ۋنيۆەرسيتەتىنىڭ رەكتورىنا ەلىمىزدىڭ قيىر سولتۇستىگىندەگى پەتروپاۆل قالاسى، سونداي-اق ءوزىم قىزمەت ىستەيتىن ماناش قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ حالىقارالىق دەڭگەيدەگى جەتىستىكتەرى، قوزىباەۆ ۋنيۆەرسيتەتى بيىل العاش رەت QS World University Ranking رەيتينگىنەن ورىن العانى تۋرالى ايتىپ بەردىم.

انكارا ۋنيۆەرسيتەتىنىڭ رەكتورى، پروفەسسور دوكتور نەجدەت ءۇنۇۆار (Prof. Dr. Necdet UNUVAR) مىرزاعا ماناش قوزىباەۆ اتىنداعى سولتۇستىك قازاقستان ۋنيۆەرسيتەتى باسقارما توراعاسى – رەكتورى ەربول ماراتۇلى يساقاەۆتىڭ سالەمىن جانە انكارا ۋنيۆەرسيتەتى مەن قوزىباەۆ ۋنيۆەرسيتەتى اراسىندا عىلىم جانە جوعارى ءبىلىم سالاسىندا حالىقارالىق ىنتىماقتاستىق ورناتۋ جونىندەگى ۇسىنىستارىمىزدى جەتكىزدىم.

اتاپ ايتقاندا:

- ماناش قوزىباەۆ اتىنداعى سولتۇستىك قازاقستان ۋنيۆەرسيتەتى جانىنان انكارا ۋنيۆەرسيتەتىنىڭ TOMER تۇرىك جانە شەتەل تىلدەرىن قولدانۋ جانە زەرتتەۋ ورتالىعى فيليالىن (بايلانىس كەڭسەسىن) اشۋ;

- جۋرناليستيكا جانە اقپارات، قوعاممەن بايلانىس، كوشى-قون سالاسىنداعى زەرتتەۋلەر جانە باسقا دا الەۋمەتتىك-گۋمانيتارلىق سالادا بىرلەسكەن حالىقارالىق عىلىمي جوبالاردى جۇزەگە اسىرۋ;

- حالىقارالىق بەدەلدى جۋرنالدارعا بىرلەسكەن عىلىمي ەڭبەكتەر جاريالاۋ;

- بىرلەسكەن حالىقارالىق عىلىمي كونفەرەنتسيالار مەن سيمپوزيۋمدار وتكىزۋ;

- قوس ديپلومدى/بىرلەسكەن باكالاۆريات، ماگيستراتۋرا جانە دوكتورانتۋرا ءبىلىم باعدارلامالارىن اشۋ;

- قازاقستاننىڭ سولتۇستىك وڭىرىندەگى پەتروپاۆل قالاسىندا تۇركياداعى انكارا ۋنيۆەرسيتەتىنىڭ عىلىمي جانە جوعارى ءبىلىم بەرۋ ورتالىعىن اشۋ;

- كەلەشەكتە قوزىباەۆ ۋنيۆەرسيتەتىنىڭ جانىنان انكارا ۋنيۆەرسيتەتىنىڭ فيليالىن اشۋ ءۇشىن دايىندىق جۇمىستارىن بىرلەسە جۇرگىزۋ جونىندە ۇسىنىس جاسادىم.

جوعارىدا اتالعان ماسەلەلەردى تالقىلاۋ ءۇشىن انكارا ۋنيۆەرسيتەتىنىڭ رەكتورى، پروفەسسور دوكتور نەجدەت ءۇنۇۆار (Prof. Dr. Necdet UNUVAR) مىرزا قازاقستان رەسپۋبليكاسى عىلىم جانە جوعارى ءبىلىم ءمينيسترى ساياسات نۇربەكپەن جانە ماناش قوزىباەۆ اتىنداعى سولتۇستىك قازاقستان ۋنيۆەرسيتەتى باسقارما توراعاسى – رەكتورى ەربول ماراتۇلى يساقاەۆپەن الدىن-الا كەلىسە وتىرىپ، قاشىقتىقتان ونلاين-جۇزدەسۋ وتكىزۋگە دايىن ەكەنىن مالىمدەدى.

QS World University Rankings رەيتينگىنىڭ كورسەتكىشتەرى جاريالاناتىن https://www.topuniversities.com/ سايتىنىڭ مالىمەتتەرى بويىنشا 1946 جىلى تۇركيا استاناسى انكارا قالاسىندا نەگىزى قالانعان انكارا ۋنيۆەرسيتەتى – تۇركيا رەسپۋبليكاسىندا قۇرىلعان العاشقى جوعارى ءبىلىم بەرۋ مەكەمەسى.

قوعامدىق مارتەبەگە يە بۇل ۋنيۆەرسيتەت قازىرگى تاڭدا 17 فاكۋلتەتىندە شامامەن 70 000 ستۋدەنتتى قامتيتىن ءىرى جوعارى وقۋ ورنىنا اينالعان.

انكارا ۋنيۆەرسيتەتى مەديتسينا سالاسى بويىنشا الەمدەگى ۇزدىك 450 ۋنيۆەرسيتەتتىڭ قاتارىنا كىرسە، QS World University Rankings رەيتينگىندە 701-ورىننان جوعارى دەڭگەيدە ورنالاسقان.

انكارا ۋنيۆەرسيتەتى تۇرىك جانە شەتەلدىك ستۋدەنتتەرگە ارنالعان قولجەتىمدى جاتاقحانالارمەن قامتاماسىز ەتىپ قانا قويماي، 180-نەن استام ستۋدەنتتىك كلۋبتار مەن ءارتۇرلى سپورتتىق نىسانداردى دا ۇسىنادى.

سونىمەن قاتار، بۇل جوعارى وقۋ ورنى 16 باكالاۆريات جانە 18 ماگيستراتۋرا باعدارلاماسىن اعىلشىن تىلىندە وقىتۋ مۇمكىندىگىن بەرەدى.

انكارا ۋنيۆەرسيتەتى QS World University Rankings بويىنشا 697, QS WUR Ranking By Subject بويىنشا 51-120, QS Sustainability Ranking بويىنشا 486, Europe University Rankings – Western Asia بويىنشا 10 ورىندا كەلەدى.

مىرزانتاي قوجابايۇلى جاقىپ،

ماناش قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ پروفەسسورى.

 انكارا، تۇركيا.

Abai.kz