باۋىرجان بايبەك قازاقستانعا ورالۋ ءۇشىن گارانتيا سۇراۋدى ويلاستىرۋدا قاڭتار وقيعاسىنان كەيىن شەتەلگە كەتىپ قالعان الماتى قالاسىنىڭ ەكس-اكىمى باۋىرجان بايبەك ەلگە قايتۋ ءۇشىن باس پروكۋراتۋرانى جاعالاي باستادى دەيدى، DALA INSIDE دەرەككوزى. ونىڭ سوزىنشە، بايبەككە «ەگەر ەلگە قايتسا، ونى قىلمىستىق جاۋاپكەرشىلىككە تارتپايدى» دەگەن ناقتى كەپىلدىك كەرەك سياقتى.

«باۋىرجان بايبەككە ەشكىم قازاقستانعا ورالۋعا تيىم سالعان جوق. جانە قۇزىرلى ورگاندار ونىڭ قىلمىستىق ءىستىڭ وربيتاسىندا جوق ەكەنىن حابارلاعان بولاتىن. بىراق ول «قىزىل تىزىمگە» ءىلىنىپ قالۋعا قورقادى. «ەسكى قازاقستاننىڭ» كوپتەگەن ىقپالدى تۇلعالارى قازىر قىزىل تىزىمدە بولعاندىقتان قازاقستان اۋماعىن تاستاپ شىعا الماي، قورشاۋدا قالىپ قالدى»، - دەيدى، دەرەككوز.

قىزىل تىزىمدەگى ادامدارعا قازاقستان اۋماعىن تاستاپ كەتۋگە شەكتەۋ قويىلعان. ياعني ولار ەلدەن شىعا المايدى. ولارعا قاتىستى ەشقانداي قىلمىستىق ءىس قوزعالماسا دا، بولاشاقتا سۇراقتار تۋىنداۋى مۇمكىن دەگەن پوزيتسيا بار. سوندىقتان باۋىرجان بايبەك قازاقستانعا كەلسە، بۇدان كەيىن شەتەلگە شىعا الماي قالۋى مۇمكىن.

«بايبەككە قىزىل تىزىمگە ىلىنبەيدى دەگەن گارانتيانى ەشكىم بەرمەيتىن سياقتى. باس پروكۋراتۋرانىڭ ونىمەن بايلانىس ورناتۋعا مۇلدە نيەتى جوق. ۇلتتىق قاۋىپسىزدىك كوميتەتى دە بايبەكتى كەلىسسوزدەر جۇرگىزۋگە تۇراتىن لايىقتى تۇلعا دەپ ساناپ وتىرعان جوق. باستى سەبەبى – زاڭسىز اكتيۆتەردى قايتارۋ ىسىندە باۋىرجان بايبەكتەن مەملەكەتكە ەشقانداي پايدا كەلمەيتىندىگىندە دەپ ويلايمىن»، - دەپ ءتۇيدى، دەرەككوز.

بۇعان دەيىن ءبىز باۋىرجان بايبەكتىڭ سوڭعى جىلدارى كيپردە تۇراقتاعانىن جازعان بولاتىنبىز. بىراق ول ەۋروپاعا ءجيى ساپارلاپ ءجۇر. ونىڭ شەتەلدە كريپتاۆاليۋتامەن اينالىسىپ كورگەنى تۋرالى ينسايد تا پايدا بولعان. بايبەككە قاتىستى قىلمىستىق ءىس قوزعالىپ جاتسا، ول ەكى باعىتتا ءجۇرۋى مۇمكىن. ءبىرىنشىسى، «ستاتي داۋى» بويىنشا قۇرىقتالىپ، 9 جىلعا سوتتالعان بۇرىنعى ادىلەت ءمينيسترى مارات بەكەتاەۆتىڭ تەرگەۋدەگى ءبىرشاما «پوكازانيەسى» باۋىرجان بايبەكتى قۇرىقتىقتاۋعا سەبەپ بولا الادى. ەكىنشىدەن، ونىڭ اكىم بولعان ۋاقىتىندا الماتىداعى باعالى جەر تەلىمدەرىن ۇلەستىرۋ بويىنشا ءبىرشاما پوتەنتسيالدى جەمقورلىق فاكتىلەرى جينالىپ قالدى. قاۋىپسىزدىك كوميتەتى كەز كەلگەن ۋاقىتتا بۇل فاكتىلەردى قىلمىستىق ىسكە اينالدىرا الادى.

Abai.kz