سەنات دەپۋتاتى قايرات تاستەكەەۆ سەمەي قالاسىنداعى مەديتسينالىق ۋنيۆەرسيتەت گوسپيتالىمەن تانىستى.

سەناتورعا مەكەمەنىڭ جۇمىسى، جاڭا انگيوگرافتىڭ مۇمكىندىكتەرى جانە بۇل قۇرىلعىنىڭ پاتسيەنتتەردى دياگنوستيكالاۋ مەن ەمدەۋدەگى ماڭىزى جونىندە كەڭىنەن باياندالدى. مەديتسينالىق پەرسونالمەن كەزدەسۋ بارىسىندا پارلامەنتشى سەناتتىڭ زاڭ شىعارۋ قىزمەتى جانە مەديتسينا قىزمەتكەرلەرىنىڭ قۇقىقتارى مەن قاۋىپسىزدىگىن كۇشەيتۋگە باعىتتالعان جوسپارلانعان تۇزەتۋلەر تۋرالى اقپارات بەردى.

دەپۋتات سوڭعى جىلدارى مەديتسينا قىزمەتكەرلەرىنە جاسالاتىن شابۋىلدار مەن كۇش قولدانۋ جاعدايلارىنىڭ ارتقانىن اتاپ ءوتتى. سوڭعى بەس جىلدا ەلىمىزدە دارىگەرلەرگە قارسى 170-تەن استام شابۋىل تىركەلگەن.

«پرەزيدەنت قاسىم-جومارت توقاەۆ پارلامەنت دەپۋتاتتارى مەن دەنساۋلىق ساقتاۋ سالاسى وكىلدەرىنىڭ ۇسىنىستارىن قولداي وتىرىپ، مەديتسينا قىزمەتكەرلەرىنىڭ قۇقىقتارى مەن قاۋىپسىزدىگىن زاڭنامالىق تۇرعىدا قورعاۋدىڭ قاجەتتىلىگىن اتاپ ءوتتى. مەملەكەت باسشىسى ۇكىمەتكە ناقتى شارالار قابىلداپ، زاڭناماعا ءتيىستى تۇزەتۋلەر ەنگىزۋدى تاپسىردى. بۇل باستاما پارلامەنتتە ازاماتتىق قوعام وكىلدەرىمەن بىرلەسىپ جان-جاقتى تالقىلاناتىن بولادى. ەندى مەملەكەت دارىگەرلەردىڭ قاۋىپسىزدىگىنە باسىمدىق بەرۋگە نيەتتى، ويتكەنى ولار كۇندىز-ءتۇنى ادامداردىڭ ءومىرى مەن دەنساۋلىعى ءۇشىن ەڭبەك ەتەدى. ولاردىڭ ءومىرى مەن دەنساۋلىعىنا قاۋىپ توندىرەتىن مۇنداي وقيعالارعا «زاڭ جانە ءتارتىپ» قاعيداتى اياسىندا زاڭدىق توسقاۋىل قويىلادى», – دەدى قايرات تاستەكەەۆ.

بۇدان بولەك، سەناتور «AMANAT» پارتياسىنىڭ وبلىستىق فيليالىنىڭ توراعاسىمەن كەزدەسىپ، وڭىرلىك باعدارلامالاردىڭ جۇزەگە اسىرىلۋى، ولاردىڭ تۇرعىندار ءۇشىن ماڭىزى، وزەكتى ماسەلەلەر جانە الداعى دامۋ جوسپارلارى جونىندە پىكىر الماستى.

دەپۋتات ءوڭىردىڭ الەۋمەتتىك-ەكونوميكالىق دامۋى، حالىقتىڭ ءال-اۋقاتىن ارتتىرۋ جانە ينفراقۇرىلىمدىق جوبالاردى ءتيىمدى ىسكە اسىرۋ – نەگىزگى باسىمدىقتاردىڭ ءبىرى ەكەنىن اتاپ ءوتتى.

Abai.kz