سەنات جانىنداعى ساراپشىلار كلۋبىنىڭ مۇشەلەرى مەن «تالداۋ مەكتەبىنىڭ» تۇلەكتەرى اباي جانە پاۆلودار وبلىستارىنىڭ جاستارىنا ارنالعان بىرقاتار دارىستەر وتكىزدى. ۇلى ويشىل اباي قۇنانبايۇلىنىڭ 180 جىلدىعىنا ارنالعان بۇل باستاما - سەنات توراعاسى ماۋلەن اشىمباەۆتىڭ قولداۋىمەن جۇزەگە اسقان العاشقى جوبا بولدى.

«سەنات - وڭىرلەردىڭ مۇددەلەرىن قورعايتىن ەڭ جوعارعى وكىلدىك ورگان. وسىعان بايلانىستى سەنات سپيكەرى وڭىرلەرمەن جۇيەلى ءوزارا ءىس-قيمىلعا جانە ولاردىڭ باستامالارىن قولداۋعا ايرىقشا نازار اۋدارادى. ماۋلەن اشىمباەۆ پالاتا ساراپشىلىق قاۋىمداستىعىنىڭ الەۋەتىن ءتيىمدى پايدالانۋ قاجەتتىگىن اتاپ ءوتتى. وسى مىندەت اياسىندا ءبىز جاستارعا ارنالعان دارىستەر سەرياسىنان تۇراتىن جوبانى ىسكە قوستىق»، - دەدى سەنات توراعاسى حاتشىلىعى مەڭگەرۋشىسىنىڭ ورىنباسارى جاسۇلانبەك مايلىباي.

ساراپشىلار جاستاردىڭ دۇنيەتانىمىن كەڭەيتىپ، تۇلعالىق دامۋىنا ىقپال ەتەتىن بىرنەشە باعىت بويىنشا ءسوز سويلەدى. تاقىرىپتار قاتارىندا كاسىبي داعدىلاردى دامىتۋ، جاساندى ينتەللەكتىنى پايدالانۋ، مەنتالدىق دەنساۋلىق، كاسىپكەرلىك جانە باسقا دا وزەكتى ماسەلەلەر بولدى. قاتىسۋشىلار مۇنداي كەزدەسۋلەردى تۇراقتى وتكىزۋ قاجەتتىگىن اتاپ ءوتتى. دارىستەر قورىتىندىسىندا ەڭ بەلسەندى تىڭداۋشىلارعا كىتاپتار سىيعا تارتىلدى.

كەزدەسۋلەر پاۆلوداردا جانە سەمەيدە ءوتىپ، كەيىن ابايدىڭ كىندىك قانى تامعان جەرى - قاراۋىل اۋىلىندا جالعاسىن تاپتى. مۇندا دارىستەر نەگىزىنەن ۆولونتەرلەرگە، مەكتەپ وقۋشىلارىنا جانە ۇستازدارعا ارنالدى. سونداي-اق ساراپشىلار تاريحي-مادەني ورىن - جيدەبايعا بارىپ، اباي رۋحىنا تاعزىم ەتتى.

ايتا كەتەيىك، سەنات جانىنداعى ساراپشىلار كلۋبى مەن «تالداۋ مەكتەبى» جوباسى - تەك پىكىرتالاس الاڭى عانا ەمەس، سونىمەن بىرگە كاسىبي ماماندار قاۋىمداستىعى. قازىرگى تاڭدا ولاردىڭ قۇرامىندا 320-دان استام قاتىسۋشى بار. ولاردىڭ قاتارىندا ساراپشىلار، عالىمدار، مەملەكەتتىك قىزمەتشىلەر، حالىقارالىق ۇيىمداردىڭ، كۆازيمەملەكەتتىك جانە ازاماتتىق سەكتوردىڭ وكىلدەرى بار. الداعى ۋاقىتتا ولار ەلىمىزدىڭ باسقا دا وڭىرلەرىندە جۇمىستارىن جالعاستىرىپ، بىلىمدەرى مەن تاجىريبەلەرىن ءبولىسۋدى جوسپارلاپ وتىر.

Abai.kz