2026 جىلعى 17 شىلدەدە قازاقستاندىق قوعامدىق دامۋ ينستيتۋتى «2026 جىلعى ەلەكتورالدىق لاندشافت جانە سايلاۋ تەندەنتسيالارى: قوعام نە كۇتەدى»تاقىرىبىندا «Sarap» ساراپشىلار كلۋبىنىڭ وتىرىسىن وتكىزدى.
ءىس-شاراعا ساراپشى-اكادەميالىق قاۋىمداستىق وكىلدەرى، عىلىمي-زەرتتەۋ ينستيتۋتتارى مەن تالداۋ ۇيىمدارىنىڭ باسشىلارى، جەتەكشى جوعارى وقۋ ورىندارىنىڭ دوكتورانتتارى مەن ماگيسترانتتارى قاتىستى.
قاتىسۋشىلار جاڭا كونستيتۋتسيا جاعدايىندا قۇرىلتاي سايلاۋى قارساڭىنداعى قوعامدىق ءۇمىت، پارتيالىق قۇرىلىمدار ءرولىنىڭ كۇشەيۋى جانە ازاماتتاردىڭ سايلاۋ ۇدەرىستەرىنە قاتىسۋ بەلسەندىلىگىنىڭ ارتۋىن تالقىلادى.
وتىرىس بارىسىندا ققدي-ءدىڭ ەكى زەرتتەۋىنىڭ ناتيجەلەرى تانىستىرىلدى: «2026 جىلدىڭ II توقسانىنداعى قوعامدىق-ساياسي احۋال» (2 400 رەسپوندەنت) جانە «قازاقستاندىقتاردىڭ ساياسي باعدارلارى» (1 200 رەسپوندەنت).
ءبىر-بىرىنە تاۋەلسىز جۇرگىزىلگەن ەكى زەرتتەۋدىڭ كورسەتكىشتەرى ءوزارا سايكەس ناتيجەلەردى كورسەتىپ، ەلەكتورالدىق كەزەڭنىڭ جوعارى قوعامدىق كونسوليداتسيا، وپتيميزم جانە مەملەكەتتىك ينستيتۋتتارعا دەگەن تۇراقتى سەنىم جاعدايىندا باستالعانىن كورسەتەدى.
العاشقى زەرتتەۋ دەرەكتەرىنە سايكەس، قازاقستاندىقتاردىڭ 84,1%-ى ەلدەگى قوعامدىق-ساياسي احۋالدى قولايلى نەمەسە تۇراقتى دەپ باعالايدى. بۇل I توقسانداعى 70,4% كورسەتكىشتەن ەداۋىر جوعارى.
ساۋالناما قوعامداعى وپتيميستىك كوڭىل كۇيدىڭ نىعايعانىن كورسەتەدى. ءوز كوڭىل كۇيىن وتە جاقسى نەمەسە بىرقالىپتى دەپ باعالاعان ازاماتتاردىڭ ۇلەسى 88,5%-عا دەيىن ارتسا، الاڭداۋشىلىق سەزىنەتىندەردىڭ ۇلەسى 15,2%-دان 11,5%-عا دەيىن تومەندەگەن. ومىرگە قاناعاتتانۋ دەڭگەيى 85,8%-عا جەتتى.
رەسپوندەنتتەردىڭ جارتىسىنان استامى (50,5%) سوڭعى ءبىر جىلدا وتباسىنىڭ ماتەريالدىق جاعدايى جاقسارعانىن اتاپ ءوتتى. ال الداعى ءبىر جىلدا وڭ وزگەرىستەر كۇتەتىندەردىڭ ۇلەسى 60,1%-عا دەيىن ارتتى.
جاستاردىڭ وڭ كوزقاراسى ايقىن ءارى ورنىقتى.18-28 جاس ارالىعىنداعى قازاقستاندىقتاردىڭ 87,1%-ى ەلدەگى قوعامدىق-ساياسي احۋالدى قولايلى نەمەسە تۇراقتى دەپ باعالايدى. بۇل بارلىق جاس توپتارى اراسىنداعى ەڭ جوعارى كورسەتكىش. سونىمەن قاتار، جاستار بولاشاققا بارىنشا وپتيميستىك كوزقاراس تانىتادى: جاس رەسپوندەنتتەردىڭ 65,6%-ى الداعى ءبىر جىل ىشىندە ءوز ءومىرىنىڭ جاقساراتىنىن كۇتەدى.
مەملەكەتتىك ينستيتۋتتارعا دەگەن سەنىمنىڭ قارقىندى ءوسۋى بايقالادى.2026 جىلدىڭ II توقسانىندا پرەزيدەنتكە دەگەن سەنىم دەڭگەيى 86,9%-دى قۇرادى. بۇل كورسەتكىش بارلىق جاس توپتارىنا ءتان، ياعني قوعامدىق قولداۋدىڭ كەڭ اۋقىمدى ەكەنىن جانە ونىڭ جەكەلەگەن الەۋمەتتىك-دەموگرافيالىق ساناتتارمەن شەكتەلمەيتىنىن كورسەتەدى.
ءوز كەزەگىندە، «قازاقستاندىقتاردىڭ ساياسي باعدارلارى» زەرتتەۋىنىڭ ناتيجەلەرى بويىنشا رەسپوندەنتتەردىڭ 75,1%-ى الداعى قۇرىلتاي سايلاۋىنا قاتىسۋعا دايىن ەكەنىن مالىمدەدى. ساۋالناماعا قاتىسقانداردىڭ 37,6%-ى سايلاۋعا قاتىسۋعا نىق نيەتتى ەكەنىن بىلدىرسە، تاعى 37,5%-ى «ءيا دەۋگە بولادى» دەگەن جاۋاپتى تاڭداعان، ياعني ولار سايلاۋعا ىقتيمال تۇردە بارۋعا دايىن.
سايلاۋعا قاتىسۋعا دايىندىقتىڭ ەڭ جوعارى دەڭگەيىاعا بۋىن وكىلدەرى اراسىندا بايقالادى (80,7%), ال جاستار اراسىندا بۇل كورسەتكىش 69,4%-دى قۇرايدى. جوعارى ءبىلىمى بار ازاماتتار مەن اۋىل تۇرعىندارى دا سايلاۋعا قاتىسۋعا جوعارى دەڭگەيدە دايىن ەكەنىن كورسەتىپ وتىر.
وتىرىس قورىتىندىسى بويىنشا قاتىسۋشىلار الداعى قۇرىلتاي سايلاۋى ەلدىڭ ساياسي جۇيەسى دامۋىنىڭ جاڭا كەزەڭىنە جول اشاتىنىن اتاپ ءوتتى. ول قازاقستانداعى وكىلدى بيلىكتى ودان ءارى ينستيتۋتتاندىرۋ پەرسپەكتيۆالارىن ايقىندايتىن قوعام زور ۇمىتپەن كۇتەتىن نەگىزگى وقيعالاردىڭ ءبىرى.
قازاقستاندىق قوعامدىق دامۋ ينستيتۋتى سايلاۋ ناۋقانى كەزەڭىندە قوعامدىق پىكىرگە ساۋالنامالار جۇرگىزۋ ءۇشىن قازاقستان رەسپۋبليكاسىنىڭ ورتالىق سايلاۋ كوميسسياسىندا اككرەديتاتسيادان وتكەن.
