الەمدىك فۋتبول چەمپيوناتىندا شەشۋشى ءتورت ويىن عانا قالدى. جارتىلاي فينالدا بۇگىن، ياعني 14 شىلدەدە فرانتسيا مەن يسپانيا، ال ەرتەڭ انگليا مەن ارگەنتينا وينايدى. ءبىز بۇگىن شيرەك فينالدا سۇرىنگەن كوماندالار تۋرالى ءسوز قوزعايمىز.

7-8-ورىندار. ماروككو (11 ۇپاي، دوپ ايىرماسى 10:6) جانە شۆەيتساريا (11 ۇپاي، 10:6)

ماروككو قۇراماسى وسىدان ءتورت بۇرىنعى تابىسىن قايتالاۋعا شاق قالدى. قاتاردا ولار جارتىلاي فينالعا دەيىن جەتكەن بولاتىن. «اتلاس ارىستاندارىنىڭ» فينالعا شىعۋدان ءۇمىتىن فرانتسۋزدار ۇزگەن ەدى. بۇل جولى دا سولتۇستىك افريكالىقتاردى فرانتسيا عانا توقتاتا الدى.

2022 جىلى، جانكۇيەر قاۋىمنىڭ جادىندا بولسا، ماروككولىقتار مىعىم قورعانىسقا كوپ كوڭىل ءبولىپ، سوسىن جاي وعىنداي جالت ەتىپ قارىمتا شابۋىلعا شىعا قوياتىن تاكتيكاسىمەن ەرەكشە كوزگە تۇسكەن ەدى. بيىل جاڭا باس باپكەر موحامەد ۋاحبي كوماندانىڭ بويىنا سول نىعىز قورعانىسپەن قاتار، كەز كەلگەن قارسىلاستان قايمىقپاي وينايتىن باتىلدىق پەن دوپتى ۇزاق ۇستاپ، ماتچ تىزگىنىن ۋىسىنان شىعارماۋعا ۇمتىلاتىن ەركىندىكتى ەگۋگە تىرىسقان ەكەن. ماروككو فۋتبولشىلارى كەز كەلگەن كەزدەسۋدە ء(تىپتى برازيليامەن، نيدەرلاندپەن دە!) «ءبىرىنشى نومەرمەن» ويناۋدان تايسالمادى، الاڭ ورتاسىندا دوپتى ۇرشىقشا ءۇيىرىپ، ازۋلى قارسىلاستارىنا ءبىراز ۋاقىت ءتىپتى دوپ بەرمەي، سالپاقتاتىپ تا قويدى.

وكىنىشتىسى، ماروككودا باپكەر سەنىم ارتار ۇزدىك 11 ويىنشىدان وزگەسى قاجەت كەزدە سولاردى ەش كەمشىلىكسىز الماستىرا المايتىنى اڭعارىلىپ قالدى. يسمايل سايباري، ازەددين ۋناي، شادي رياد سەكىلدى نەگىزگى قۇرام جىگىتتەرى جاراقاتقا بايلانىستى، ت.ب سەبەپتەرگە وراي الاڭعا شىعا الماسا، ولاردىڭ ورنىن جىمىن بىلدىرمەي باسا قوياتىن شەبەر ويىنشىنىڭ قات ەكەنى سەزىلدى. الەم چەمپيوناتى سەكىلدى ايدان استام ۋاقىتقا سوزىلاتىن قيىن تۋرنيردە قوسالقى قۇرامنىڭ مىقتىلىعى دا سىنعا تۇسەدى. دەگەنمەن ەكى دودا قاتارىنان توپتان وزىپ، جۇلدەگە قول سوزىم قالعاندا عانا توقتاعان، ۇزدىكتەرمەن ۇزەڭگى قاعىسا شەبەرلىك كورسەتكەن ماروككو قۇراماسى قانداي ماقتاۋعا لا دايىق.

وسىنداي ءسوزدى ولارمەن بىردەي ناتيجەگە جەتكەن شۆەيتساريا قۇراماسىنا ارناساق تا بولادى. جارىستى ءساتسىز باستاعان (قاتاردى ءىرى ەسەپپەن ويسىراتا ۇتۋعا مۇمكىندىگى بولا تۇرا، سوڭعى سەكۋندتاردا گول جىبەرىپ الىپ، 1:1 تەڭ وينادى) ولار كەيىنگى ويىندارىن جيناقى وتكىزىپ، قاتارىنان ءۇش رەت جەڭىسكە جەتتى. 1/8 فينالدا وزىمەن دەڭگەيلەس كولۋمبيامەن 120 بويى تىرەستى. ويىن 0:0 بوپ اياقتالدى، ال پەنالتي سەرياسىندا شۆەيتساريالىق قاقپاشى گرەگوري كوبەل ءبىر سوققىنى قايتارىپ (تاعى ءبىرى قاقپا ماڭداشاسىنان كەرى سەرپىلدى), كومانداسىن كەلەسى كەزەڭگە الىپ شىقتى.  شيرەك فينالدا دا شۆەيتساريا فۋتبولشىلارى ارگەنتيناعا لايىقتى قارسىلاس بولا ءبىلدى. شابۋىلشى برەل ەمبولونىڭ «ارتيستىك شەبەرلىككە» شەكتەن تىس سەنىم ارتۋى سالدارىنان ازشىلىقتا قالسا دا، اقىرىنا دەيىن ايقاستى. قوسىمشا ۋاقىتتا عانا قازىرگى الەم چەمپيونى باسىمدىق بايقاتتى.

شيرەك فينال – شۆەيتساريا قۇراماسىنىڭ سوناۋ 1954 جىلدان كەيىنگى ءبىرىنشى جەتىستىگى. ول كەزدە توپتان شىقساڭ بولدى – شيرەك فينال-تۇعىن. قازىر بۇل تابىسقا پلەي-وففتىڭ ەكى ساتىسىنان سىتىلىپ ءوتىپ بارىپ ارەڭ جەتەسىڭ. سول سەبەپتى مۇرات ياكين باپتاعان ۇجىمنىڭ بۇل جەتىستىگىن جاقسى ناتيجە دەپ باعالاۋ كەرەك. جالپى، كەيىنگى جىلدارى شۆەيتساريا ءىرى تۋرنيرلەردە ءتاۋىر ويناپ ءجۇر. 2014, 2018, 2022 جىلدارى 1/8 فينالدان اسا المادى. ەۋروپا دوداسىندا 2016 جىلى – 1/8 فينالعا، 2021 جانە 2024 جىلدارى – شيرەك فينالعا جەتتى. ەل فۋتبولىنىڭ دامۋ قارقىنى جامان ەمەس ەكەنىن، مىنە، بيىل دا دالەلدەپ وتىر.

6-ورىن. بەلگيا (11 ۇپاي، 16:7)

ءتۋرنيردى اسا ءساتتى باستاي قويعان جوق. ەگيپەتتى دە، يراندى دا ۇتا المادى. ءۇشىنشى تۋردا عانا جاڭا زەلانديا قۇراماسىنان ايقىن باسىم ءتۇستى (5:1). پلەي-وففتىڭ ءبىرىنشى ساتىسىندا سەنەگالدان ۇتىلىپ قالا جازدادى. 86-مينۋتقا دەيىن 0:2 بوپ جەڭىلىپ تۇرعان كوماندا جەڭىسكە جەتەدى دەپ ەشكىم دە ويلاماعان شىعار. الايدا اينالدىرعان ءۇش مينۋتتىڭ ىشىندە رومەلۋ لۋكاكۋ مەن يۋري تيلەمانس قوس دوپ سوعىپ، تارازى باسىن تەڭەستىرىپ كەتتى. ماتچ وۆەرتايمعا ۇلاستى. قوسىمشا وتىز مينۋت تا تۇگەسىلەر شاقتا، تورەشى افريكالىقتاردىڭ قاقپاسىنا 11 مەترلىك بەلگىلەپ، تيلەمانس جەڭىس گولىن سوقتى. 1/8 فينالدا بەلگيانىڭ شابۋىلىنا اقش قۇراماسى دا توتەپ بەرە المادى. رۋدي گارسيانىڭ كومانداسىن تەك يسپاندىقتار عانا توقتاتتى.

بەلگيانى ءوز مۇمكىندىگىن تولىق اشىپ كورسەتە الماعان كوماندا دەپ سيپاتتاساق بولادى. ەندى رومەلۋ لۋكاكۋ، كەۆين دە برەينە، اكسەل ۆيتسەل سەكىلدى ارداگەر فۋتبولشىلار قۇرامامەن قوش ايتىسۋى مۇمكىن. ولاردىڭ ورنىن باسار جاستاردىڭ جالپى دەڭگەيى تۋرالى ايتۋعا ءالى ەرتەرەك.

5-ورىن. نورۆەگيا (12 ۇپاي، 13:11)

ءوز تاريحىندا تۇڭعىش رەت شيرەك فينالعا جەتتى. وسىنىڭ ءوزى – زور تابىس. كوماندالىق ويىن، دوپتى ۇيىمداسا تارتىپ الۋ، قىسقا پاستار مەن الىسقا دوپ اسىرۋ تاسىلدەرىن قاتار قولدانىپ، قارسى قاقپاعا ءجيى قاۋىپ ءتوندىرۋ، ستاندارتتى جاعدايلاردى ءتيىمدى پايدالانۋ... قاي جاعىنان دا وزىق فۋتبول كورسەتتى. العى شەپتەگى الىپ ەرلينگ حولاند ناعىز سۇرمەرگەن ەكەنىن تانىتتى. نورۆەگتەر ءتىپتى برازيليانىڭ ءوزىن تىقسىرىپ، دوپتى ولاردان الدەقايدا باسىم دا ەركىن ۇستاپ، ۆينيسيۋس باستاعان قارسىلاستارىن ءبىراز ۋاقىت دوپسىز قۇر سابىلتتى. چەمپيوندار ليگاسىندا ەل چەمپيونى «بۋدە-گليمت» كومانداسى مىقتىلاردى قالاي سۇرىندىرسە، ۇلتتىق قۇراما دا ەشكىمنەن سەسكەنبەي ويناپ، سەس كورسەتتى. بۇدان بىلايعى دوپ دودالارى دا نورۆەگياسىز وتپەيتىنىنە سەنىم ۇيالاتقانداي بولدى. ال ولاردىڭ «وتىرا قالىپ ەسكەك ەسەتىن» جانكۇيەرلەرىنىڭ قىزۋ قولداۋى – فۋتبول مادەنيەتىنە قوسىلعان تىڭ ءتاسىل، توسىن مانەر.

ساكەن سىبانباي

Abai.kz