«ۇلى دالا تاريحىنىڭ جازبا مۇرالارى» اتتى جىلجىمالى كورمە ءوتتى.

قولجازبالار جانە سيرەك كىتاپتار ۇلتتىق ورتالىعىنىڭ ۇيىمداستىرۋىمەن «قازاقستان عارىش ساپارى» ۇلتتىق كومپانياسى» اق عيماراتىندا «ۇلى دالا تاريحىنىڭ جازبا مۇرالارى» اتتى جىلجىمالى كورمە ۇيىمداستىرىلدى.

ءىس-شارانىڭ ماقساتى – قازاق حالقىنىڭ جازبا مۇراسىن ناسيحاتتاۋ، كوپشىلىككە كونە جادىگەرلەردى تانىستىرىپ، جازبا مۇرالار ارقىلى ۇرپاقتى ەلدىك پەن بىرلىككە تاربيەلەۋ.

كورمەدە VIII–IX عاسىرلارداعى رۋنيكالىق جازۋمەن كونە تۇركى تىلىندە جازىلعان «ىرىق بىتىك» كىتابى، ماحمۇد قاشقاريدىڭ «ديۋاني لۇعات ات-تۇرىك» ەڭبەگى، «وعىزناما»، «كودەكس كۋمانيكۋس»، قۇتبتىڭ «حۇسىراۋ-شىرىن» داستانى، «شادجاراتۋل اتراك»، اراب جانە پارسى تىلدەرىندەگى ەڭبەكتەر تانىستىرىلدى.

سونىمەن قاتار  ا.قۇنانبايۇلىنىڭ شىعارمالار جيناعى، ا.بايتۇرسىنۇلىنىڭ 1928 جىلى جارىق كورگەن «ءتىل جۇمسارى»، 1929 -1940 جىلدارى لاتىن قارپىمەن جازىلعان ءى.جانسۇگىروۆ، ب.ءمايليننىڭ  شىعارمالارى جانە وزگە دە سيرەك كىتاپتار قويىلدى.

قر مادەنيەت جانە اقپارات مينيسترلىگىنىڭ ءباسپاسوز قىزمەتى

Abai.kz