كونستيتۋتسيا كۇنى قارساڭىندا قاراعاندى وبلىسىندا قايتارىلعان اكتيۆتەردىڭ ەسەبىنەن سالىنعان جەتى جاڭا فەلدشەرلىك-اكۋشەرلىك جانە مەديتسينالىق پۋنكت اشىلدى. 

مەملەكەت باسشىسى قاسىم-جومارت توقاەۆتىڭ تاپسىرماسى بويىنشا بۇل قاراجات ەلىمىز بويىنشا الەۋمەتتىك ماڭىزى بار ينفراقۇرىلىمعا باعىتتالۋدا.

سۋرەت: قاراعاندى وبلىسى اكىمدىگىنەن الىندى.

سۋرەت: قاراعاندى وبلىسى اكىمدىگىنەن الىندى.

جاڭا مەديتسينا نىساندارى اقتوعاي، شەت، اباي جانە بۇقار جىراۋ اۋداندارىندا اشىلىپ، اۋىل تۇرعىندارى ءۇشىن مەديتسينالىق كومەكتىڭ قولجەتىمدىلىگىن ارتتىرادى.

وبلىس اكىمى ەرماعانبەت بولەكپاەۆ بۇقار جىراۋ اۋدانىنا بارىپ، بىردەن ءۇش جاڭا نىساننىڭ – بايقادام، سارىتوبە جانە توعىزقۇدىق اۋىلدارىنداعى ەكى فاپ پەن دارىگەرلىك امبۋلاتوريانىڭ جۇمىسىمەن تانىستى.

سۋرەت: قاراعاندى وبلىسى اكىمدىگىنەن الىندى.

ولاردىڭ ءبىرى – توعىزقۇدىق اۋىلىنداعى دارىگەرلىك امبۋلاتوريا. نىسان اۋىسىمىنا 45 ادام قابىلداۋعا ەسەپتەلگەن. مۇندا دارىگەر، ەكى مەدبيكە جانە اكۋشەر ەڭبەك ەتۋدە.

اۋىلدا 1100 ادام تۇرادى.

سۋرەت: قاراعاندى وبلىسى اكىمدىگىنەن الىندى.

– بۇرىن ءبىزدىڭ قىزمەتكەرلەر پەشپەن جىلىتىلاتىن بەيىمدەلگەن عيماراتتا جۇمىس ىستەۋگە ءماجبۇر بولاتىن. قازىر بىزدە زاماناۋي ۇلگىدەگى امبۋلاتوريا بار، مۇندا العاشقى مەديتسينالىق كومەك كورسەتۋگە قاجەتتىنىڭ ءبارى قاراستىرىلعان. سونىمەن قاتار فيزيوتەراپيا، ەمدىك دەنە شىنىقتىرۋ كابينەتتەرى، كۇندىزگى ستاتسيونار، جوتەل كابينەتى، بەينە-كولپوسكوپ بار. جۇقپالى اۋرۋعا كۇدىكتى ناۋقاستار ءۇشىن بولەك كىرەبەرىستەر جاسالعان. كادر تاپشىلىعى كوتەرمەاقىلار، تۇرعىن ۇيگە بەرىلەتىن پايىزسىز نەسيەلەر ارقىلى شەشىلۋدە. جاقىندا بىزگە «ديپلوممەن – اۋىلعا!» باعدارلاماسى بويىنشا جاس دارىگەر مەن مەدبيكە كەلدى. تاعى اكۋشەر ماماننىڭ كەلۋىن كۇتىپ وتىرمىز، – دەدى ورتالىق اۋداندىق اۋرۋحانانىڭ باس دارىگەرىنىڭ مىندەتىن اتقارۋشى ايگۇل مەرگەنباەۆا.

بۇقار جىراۋ اۋدانىنداعى مەديتسينا مەكەمەلەرىنە جاس ماماندار بەلسەندى تۇردە تارتىلىپ جاتىر. سوڭعى جىلدارى 24 مەديتسينالىق قىزمەتكەر كەلدى. ولاردىڭ اراسىندا جالپى تاجىريبە دارىگەرلەرى، حيرۋرگ، پەدياتر، فارماتسەۆتەر، اكۋشەرلەر مەن مەدبيكەلەر بار. بيىل بەس مامان جۇمىسقا ورنالاسىپ، تاعى تورتەۋى – تەراپەۆت، اكۋشەر-گينەكولوگ جانە انەستەزيولوگ-رەانيماتولوگ كەلەدى دەپ كۇتىلۋدە.

سۋرەت: قاراعاندى وبلىسى اكىمدىگىنەن الىندى.

– مەن قارقارالى قالاسىنىڭ تۋماسىمىن. بيىل قاراعاندى مەديتسينا ۋنيۆەرسيتەتىن ءتامامدادىم، – دەيدى جالپى تاجىريبە دارىگەرى يسلام سەرىكباەۆ. – «ديپلوممەن – اۋىلعا!» باعدارلاماسىنىڭ مۇمكىندىگىن پايدالاندىم. ماعان 8,5 ملن تەڭگە كوتەرمەاقى تولەنەدى. بۇعان قوسا اۋدان اكىمدىگى 392 مىڭ تەڭگە ءبولدى. بولاشاق ارىپتەستەرىمە ايتارىم: قورقۋدىڭ قاجەتى جوق. اۋىلعا كەلىڭىزدەر، مۇندا ءاردايىم ماماندار قاجەت!

بۇگىنگى تاڭدا بۇقار جىراۋ اۋدانىندا 54 دەنساۋلىق ساقتاۋ نىسانى جۇمىس ىستەيدى. ونىڭ ىشىندە 13 دارىگەرلىك امبۋلاتوريا، 16 فاپ جانە 25 مەديتسينالىق پۋنكت بار. مەديتسينالىق ينفراقۇرىلىمدى جاقسارتۋ جۇمىسى جالعاسۋدا.

اۋداندا تاعى 14 نىساننىڭ قۇرىلىسى ءجۇرىپ جاتىر. ولاردىڭ ىسكە قوسىلۋىمەن اۋىل تۇرعىندارى ءوز اۋىلىنان شىقپاي-اق كەڭ كولەمدى مەديتسينالىق قىزمەت الا الادى.

سۋرەت: قاراعاندى وبلىسى اكىمدىگىنەن الىندى.

– قاراعاندى وبلىسىنىڭ اۋىلدارىندا بارلىعى 92 دەنساۋلىق ساقتاۋ نىسانى سالىنادى. بۇل – ەلىمىزدەگى ەڭ جوعارى كورسەتكىش. پرەزيدەنت تاپسىرماسى بويىنشا ءبىز اۋىلدارداعى العاشقى مەديتسينالىق كومەكتى جاڭعىرتىپ جاتىرمىز، – دەدى ەرماعانبەت بولەكپەاۆ.

سونداي-اق كونستيتۋتسيا كۇنى قارساڭىندا بۇقار جىراۋ اۋدانىنىڭ ۇشتوبە اۋىلىندا «اۋىل – ەل بەسىگى» ارنايى جوباسى اياسىندا جاڭا مادەنيەت ءۇيى اشىلدى.

Abai.kz