ەل ەكونوميكاسىنىڭ ورنىقتى دامۋى – كاسىپكەرلىكتىڭ تىنىسىنا تىكەلەي بايلانىستى.

بيزنەس قانات جايۋ ءۇشىن قولجەتىمدى قارجىلىق قۇرالدار قاجەت. ونىڭ نەگىزگى كوزى – بانكتەر.

پرەزيدەنت ەكى جىل بۇرىنعى جولداۋىندا:

• كورپوراتيۆتىك سەكتوردى نەسيەلەۋدە باسەكەلەستىكتى كۇشەيتۋ ءۇشىن ءۇش شەتەلدىك بانكتى نارىققا كىرگىزۋ،
• بانكتەردەگى «قوزعالىسسىز جاتقان» 2,3 تريلليون تەڭگەنى ەكونوميكالىق اينالىمعا جىبەرۋ جانە ونى ەلەكتروندى پلاتفورما ارقىلى ىسكە اسىرۋ جونىندە ناقتى تاپسىرما بەرگەن بولاتىن.

ال بۇگىندە جاعداي قانداي؟

نارىقتى رەتتەۋ جانە دامىتۋ اگەنتتىگىنىڭ دەرەگىنە سۇيەنسەك، ەكىنشى دەڭگەيلى بانكتەردىڭ دەپوزيتىندە 44 ترلن تەڭگەدەن استام قارجى جيناقتالعان.

2025 جىلعى شىلدەگە دەيىن بانكتەر 22,6 ترلن تەڭگە نەسيە بولگەن. بىراق ونىڭ باسىم بولىگى يپوتەكا مەن تۇتىنۋشىلىق نەسيەگە كەتىپ جاتىر. ال بيزنەستىڭ نەسيەگە قولى جەتپەي وتىر.⸻

وسىعان وراي بۇگىن ماجىلىستەگى AMANAT پارتياسى فراكتسياسىنىڭ وتىرىسىندا ۇكىمەت مۇشەلەرىنە، ونىڭ ىشىندە ۆيتسە-پرەمەر سەرىك جۇمانعارينگە مىنا ءۇش سۇراقتى قويدىم:

1) نەگە وسى كۇنگە دەيىن شەتەلدىك ءۇش بانكتى نارىققا كىرگىزۋگە نە كەدەرگى نەمەسە كىم كەدەرگى بولىپ وتىر؟

2) قاشان ەكىنشى دەڭگەيدەگى بانكتەر بيزنەستى قولجەتىمدى قارجىلاندىرۋعا ناقتى بەتبۇرىس جاسايدى؟ كەزىندە مەملەكەت ولارعا ملردتاعان قارجى قۇيىپ كومەكتەستى. ەندى ولاردىڭ كەزەگى.

3) بۇل ماسەلە قاشان شەشىلەدى؟ الدە پرەزيدەنت تاپسىرماسى ورىندالماي قالا ما؟

وكىنىشكە قاراي، ۆيتسە-پرەمەردىڭ جاۋابى — تەك جالپىلاما سىلتەۋ بولدى: «بيۋدجەتتەن بيزنەستى جىل سايىن 1 ترلن تەڭگەمەن قارجىلاندىرامىز، گەوساياسي جاعداي كەدەرگى بولىپ وتىر».

ەكى جىل ءوتتى. پرەزيدەنت تاپسىرماسى – ءالى ورىندالعان جوق. جاۋاپكەرشىلىك قايدا؟

پارلامەنت تە، حالىق تا ناقتى جاۋابىن بىلۋگە ءتيىس. ويتكەنى بۇل – ەلدىڭ ەكونوميكالىق بولاشاعى مەن كاسىپكەرلىكتىڭ تاعدىرىنا قاتىستى ماسەلە.

قالاي ويلايسىزدار: بانكتەر ادەيى كەدەرگى كەلتىرىپ نەمەسە كەيبىر توپتار بانكتەردى «قاسيەتتى سيىر» قىلىپ، بيزنەسكە قارجىنى ادەيى تەجەپ وتىرعان جوق پا؟

ەدىل جاڭبىرشين،

ءماجىلىس دەپۋتاتى

Abai.kz