بۇگىن، 4 قىركۇيەكتە ۇلىبريتانيانىڭ ليۆەرپۋل قالاسىندا بوكستان World Boxing فەدەراتسياسىنىڭ ۇيىمداستىرۋىمەن الەم چەمپيوناتى جالاۋىن كوتەرەدى. بۇل تۋرالى olympic.kz سايتى جازدى. 

بايراقتى دوداعا قازاقستان تولىق قۇراممەن اتتانىپ وتىر. وتانداستارىمىز تارتىسقا تولى باسەكەدە جەڭىسكە جەتۋ ءۇشىن ايانىپ قالماسى انىق.

بيىل World Boxing فەدەراتسياسى ۇيىمداستىرۋىمەن العاشقى الەم بىرىنشىلىگى وتپەك. اتالعان ءدۇبىرلى دوداعا 60 ەلدەن 500-دەن استام بىلعارى قولعاپ شەبەرى قاتىسادى دەگەن بولجام بار. بوكسشىلار 10 سالماق دارەجەسىندە مەدالداردى ءوزارا ساراپقا سالاتىن بولادى.

قازاقستان كىل مىقتىلاردى جيناقتاپ، تولىق قۇراممەن ونەر كورسەتۋگە دايىن. ۇلتتىق قۇراما بۇعان دەيىن الماتى وبلىسىندا وقۋ-جاتتىعۋ جيىنىن وتكىزدى. ودان بولەك، شەففيلدكە بارىپ دايىندىق جۇمىستارىن جالعاستىردى. جالپى جەرلەستەرىمىزدىڭ ساقاداي ساي ەكەنى بەلگىلى.

ال بيىل وتەتىن الەم چەمپيوناتىنىڭ باستى جاڭالىقتارىنىڭ ءبىرى كۋبالىق حۋليو سەزار لا كرۋستىڭ 90 كەلىدەن جوعارى سالماققا اۋىسۋى بولدى. بۇعان دەيىن بوكسشى جارتىلاي اۋىر سالماقتا باق سىناعان بولاتىن. ال وسى جىلى اسا اۋىر سالماقتاعى الپاۋىتتارمەن كۇش سىناسادى.

سونىمەن قاتار بۇل سالماقتا قازاقستان قۇراماسىنىڭ كاپيتانى ايبەك ورالباي ونەر كورسەتەدى. ودان بولەك، ازىربايجاندىق مۋحامماد ابدۋللاەۆتى دا اتاپ وتكەن ءجون. سوڭعى رەت ايبەك پەن مۋحامماد استانادا وتكەن الەم كۋبوگى كەزەڭىندە جۇدىرىقتاسقان بولاتىن. سول كەزدە ايبەك ەش قيىندىقسىز جەڭىسكە جەتىپ، ناتيجەسىندە التىن مەدال جەڭىپ الدى. وسى جىلى وتانداسىمىز كۋبالىق جانە ازىربايجاندىق بوكسشىلاردان ايلاسىن اسىرا الا ما؟

65 كەلىگە دەيىنگى سالماقتا دا ۇلكەن قىزىعۋشىلىق بار. سەبەبى بۇل سالماقتا 2024 جىلعى وليمپيادا ويىندارىنىڭ جەڭىمپازى ەريسلاندي الۆارەس (كۋبا) بار. سونىمەن قوسا، ۇندىستاندىق ابحيناش دجامۆال شارشى الاڭعا شىعادى. بۇل سپورتشى استاناداعى الەم كۋبوگى كەزەڭىندە ەرتۋعان زەينۋللينوۆتان باسىم تۇسكەن بولاتىن. وسى جولى قازاقستاندىق بوكسشى قارىمتا قايتارا الا ما؟

باسەكەلەستىك دەڭگەيى جوعارى سالماقتاردىڭ ءبىرى - 80 كەلى. الەمنىڭ كىل مىقتىلارى جينالعان سالماقتا پاريج-2024 وليمپياداسىنىڭ كۇمىس جۇلدەگەرى نۇربەك ورالباي ەل نامىسىن قورعايدى. بۇل سالماقتا راحيم گونسالەس (اقش), ۆاندەرلەي پەرەيرا (برازيليا), سەزار يوجەرلەن (فرانتسيا), جاۆوحير ۋمماتاليەۆ (وزبەكستان) سىندىق مىقتى بوكسشىلار بار. دەگەنمەن، نۇربەك ورالبايبىڭ 2024 جىلعى وليمپيادادا جەڭىپ العان كۇمىس مەدالى بۇل جارىستا ونى فاۆوريتتەردىڭ قاتارىنا قوسۋعا مۇمكىندىك بەرەدى.

سونداي-اق سانجار تاشكەنباي 50 كەلىگە دەيىنگى سالماقتا قارسىلاس شاق كەلتىرمەۋى مۇمكىن.

55 كەلىگە دەيىنگى سالماقتا ماحمۇد سابىرحاننىڭ باستى قارسىلاسى دجۋنيور الكانتارا (دومينيكان رەسپۋبليكاسى) بولارى انىق. وزبەك سپورتشىسى ميرازيزبەك ميرزاحاليلوۆ تا قالىس قالمايدى.

تاعى ءبىر ايتا كەتەرلىگى، بيىل وتەتىن بايراقتى باسەكەدە وزبەكستاندىق ابدۋماليك حولوكوۆ (60 كەلىگە دەيىن) شارشى الاڭعا شىعادى. بۇل سپورتشىنىڭ باستى قارسىلاسى پاريج-2024 وليمپياداسىنىڭ كۇمىس جۇلدەگەرى مۋناربەك سەيتبەك ۋلۋ. پاريجدەگى ناتيجە قايتالانا ما؟

70 كەلىگە دەيىنگى سالماقتا قازاقستان قۇراماسىنىڭ جۇلدىزداي جارقىراپ كەلە جاتقان بىلعارى قولعاپ شەبەرى تورەحان سابىرحان باق سىنايدى. وتانداسىمىز بيىل العاش رەت ەرەسەكتەر اراسىندا وتەتىن الەم چەمپيوناتىنا قاتىسادى. ساراپشىلاردىڭ پىكىرىنشە تورەحان وسى سالماقتىڭ باستى ءفاۆوريتى.

قوسا ايتقاندا، 75 كەلىگە دەيىنگى سالماقتا امبەباپ بوكسشى سابىرجان اققالىقوۆ ءسوزسىز فاۆوريت ەكەنى انىق. الەم كۋبوگى كەزەڭىندەگى جەڭىسىنەن كەيىن، جەرلەسىمىز الەم چەمپيونى اتاعى ءۇشىن كۇرەسەتىن بولادى.

85 دەيىنگى سالماقتا دا بەكزات نۇرداۋلەتوۆ ءوزىنىڭ باي تاجىريبەسىمەن ەرەكشەلەنەدى. وتانداسىمىز بۇعان دەيىن الەم چەمپيونى بولعان (2019). سوندىقتان كاسىپقوي بوكستان قايتا ورالعان بوكسشى تاعى ءبىر مارتە جەڭىس تۇعىرىنا كوتەرىلۋ ءۇشىن ەش ايانىپ قالمايدى. سونداي-اق اكمولجون يسرويلوۆ (وزبەكستان), دجۋگنۋ ء(ۇندىستان) التىن مەدال ءۇشىن تالاسادى.

ساعىندىق توعامباي ونەر كورسەتەتىن 90 كەلىگە دەيىنگى سالماقتا دا باسەكەلەستىك جوعارى دەڭگەيدە. بىرەر اي بۇرىن استانادا وتكەن الەم كۋبوگى كەزەڭىندە يساياس سانتوس ريبەيرۋ فيلو (90 كەلىگە دەيىن) چەمپيون اتانعان بولاتىن. ودان بولەك ءدال وسى سالماقتا ءوزىنىڭ تەحنيكالىق ەرەكشەلىگىمەن دجوردج مالاچي (اقش) كوزگە تۇسكەن ەدى.

ال ساراپشىلار الەم چەمپيوناتىنىڭ مەدالدارىن قازاقستان، وزبەكستان جانە كۋبا قۇرامالارى ءوزارا ءبولىپ الادى دەپ بولجاپ وتىر. سەبەبى، سوڭعى 2023 جىلعى الەم چەمپيوناتىندا وزبەكستان 5 التىن جەڭىپ السا، قازاقستان ءتورت، ال كۋبا ءبىر التىن مەدال يەلەنگەن ەدى.

جالپى الەم بىرىنشىلىگى 14 قىركۇيەككە دەيىن جالعاسادى.

Abai.kz