2025 جىلدىڭ باسىنان بەرى ەلىمىزدە ەلەكتروساموكاتتارمەن جاسالاتىن 29 مىڭعا جۋىق جول قوزعالىسى ەرەجەسىن بۇزۋ وقيعاسىنىڭ جولى كەسىلىپ، 8 مىڭ ەلەكتروساموكات ايىپ تۇراعىنا قويىلعان.

بۇل تۋرالى ۇكىمەت وتىرىسىندا ىشكى ىستەر ءمينيسترىنىڭ ورىنباسارى يگور لەپەحا حابارلادى. ول بىلتىر ەلەكتروساموكاتتاردى پايدالانۋعا باقىلاۋدى قاتاڭداتۋ تۋرالى ءتيىستى ۇسىنىستار بەرىلگەنىن، بىراق ولاردىڭ بىرقاتارى قولداۋ تاپپاعانىن ايتتى.

دەپۋتاتتار قاراپ جاتقان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كولىكتىڭ جاڭا تۇرلەرىنىڭ قوزعالىسىن رەتتەۋ جانە جول ءجۇرىسىنىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى شەڭبەرىندە ەلەكتروساموكاتتاردىڭ تروتۋارمەن جۇرۋىنە تىيىم سالۋ، كيكشەرينگ قىزمەتىنە مىندەتتەمە جۇكتەۋ قاراستىرىلعان، ال اكىمدىكتەرگە ولاردى پايدالانۋ ەرەجەلەرىن قابىلداۋ قۇقىعىن بەرۋ ۇسىنىلۋدا.

Abai.kz