بۇل تۋرالى ايدا بالاەۆا ءوزىنىڭ الەۋمەتتىك جەلىدەگى پاراقشاسىندا جازدى.

ءۇش اپتادان بەرى وتاندىق كينوپروكاتتا كوش باستاعان «QAITADAN» كوركەم ءفيلمى 1 ملرد تەڭگەدەن استام تابىس تاپقاندىعىمەن شىعارماشىلىق ۇجىمدى شىن جۇرەكتەن قۇتتىقتايمىن!

بۇل كينو وندىرىسىنە جۇمسالعان مەملەكەت قاراجاتىن بەس ەسەگە ارتىعىمەن اقتاعان العاشقى جوبا. 2023 جىلى پيتچينگ جەڭىمپازى اتانعان كينوتۋىندى – جاس رەجيسسيور دۋمان ەركىمبەكتىڭ تولىقمەتراجدى دەبيۋتى. وسىنداي كرەاتيۆتى، باستاماشىل ءارى وتانشىل جاستاردى قولداۋ ءبارىمىزدىڭ ورتاق مىندەتىمىز.
فيلمدە وتباسى ينستيتۋتى دارىپتەلىپ، الەۋمەتتىك جاۋاپكەرشىلىك پەن ادامگەرشىلىك قاعيداتتارى كورىنىس تابادى. سەبەبى ءوزىڭدى عانا ەمەس، اينالاڭدى، ءتىپتى تۇتاس قوعامدى قۇتقارۋعا ۇمتىلۋ – ءار ادامنىڭ مىندەتى.
كينونىڭ ءار ديالوگى – قوعامعا وي تاستايدى، ءار كورىنىسى – كورەرمەننىڭ جۇرەگىنە جاقىن.

قازىرگى تاڭدا «QAITADAN» ءفيلمى ەلىمىزدىڭ بارلىق كينوتەاترلارىندا كورسەتىلۋدە. بارشا كورەرمەن قاۋىمدى وسى تۋىندىنى بىرگە تاماشالاپ، ۇلت رۋحىن اسقاقتاتار وتاندىق جوبامىزدى قولداۋعا شاقىرامىن! ارنايى التىن ۋاقىتتارىڭىزدى ءبولىپ، كينوعا كەلىڭىزدەر. فيلمنەن جاعىمدى اسەر الىپ، ءبىر تولقىندا بولىپ، بىرگە وي تۇيەيىك. شىنايى ەڭبەكتىڭ باعاسىن بەرىپ، كينوگەرلەرىمىزگە دەم بەرەيىك.

مەملەكەت باسشىسى ۇلتتىق قۇرىلتايدىڭ ءتورتىنشى وتىرىسىندا كينوعا قاتىستى: «تاعى ءبىر تۇيتكىل – قازىر كينوتەاتردا كورسەتىلەتىن فيلمدەرگە قاتىستى قوعامدىق سىن بار. بىلتىر قازاقستاندىق ماماندار تۇسىرگەن 94 فيلم شىققان، ياعني، نەگىزىنەن ءوزىمىزدىڭ ءونىم شىعارىلىپ جاتىر. بۇل – جاقسى ءۇردىس. بىراق ءبىز ەڭ الدىمەن سانعا ەمەس، ساپاعا كوڭىل اۋدارۋىمىز كەرەك» - دەگەن بولاتىن.

كينو ۇلتتى ۇيىتىپ، بولاشاق ۇرپاقتى تاربيەلەۋى ءتيىس. ساپالى، ساۋاتتى، تالعامى بيىك كارتينالار سانى ارتقان كەزدە عانا وتاندىق كينونىڭ ەڭسەسى بيىك بولادى.

سوندىقتان مينيسترلىك ۇلتتىق كينونى دامىتۋ باعىتىنداعى جۇمىستاردى جۇيەلى تۇردە جالعاستىرا بەرەدى.

بارشاڭىزعا ساتتىلىك تىلەيمىن!

Abai.kz