مەملەكەت باسشىسى قاسىم-جومارت توقاەۆ اسكەري وقۋ ورىندارى ۇزدىك تۇلەكتەرىنىڭ قاتىسۋىمەن وتكەن القالى جيىندا زاماناۋي قازاق اسكەرىنىڭ مارتەبەسى مەن جاس وفيتسەرلەرگە ارتىلاتىن جاۋاپكەرشىلىك تۋرالى ايتتى.

پرەزيدەنت ءوز سوزىندە بىلتىر اسكەري وقۋ ورىندارىنىڭ وزات بىتىرۋشىلەرىن قولداۋ ماقساتىندا ماڭىزدى باستاما كوتەرگەنىن جانە سوعان ساي ناقتى تاپسىرما بەرگەنىن ەسكە سالدى. وسى شەشىمنىڭ ناتيجەسىندە بيىل ەل تاريحىندا تۇڭعىش رەت ەرەكشە ءداستۇر قالىپتاسىپ وتىر.

مىنە، بۇگىن وسى باستاما ناقتى جۇزەگە اسىرىلماق. سىزدەر وقۋدى ءبىتىرىپ، بىردەن «اعا لەيتەنانت» شەنىن الاتىن تۇڭعىش تۇلەك بولاسىزدار. بۇل – وزدەرىڭىزگە ارتىلعان زور سەنىم جانە ۇلكەن جاۋاپكەرشىلىك، – دەدى جوعارعى باس قولباسشى جاس وفيتسەرلەرگە ارناعان سوزىندە.

سونىمەن قاتار مەملەكەت باسشىسى اسكەري شەن مەن لاۋازىمنىڭ سالماعىنا توقتالىپ، قازاقتىڭ ءبىرتۋار باتىرى ساعادات نۇرماعامبەتوۆتىڭ «اتاقتى العاننان ونى ارقالاپ ءجۇرۋ قيىن» دەگەن ءسوزىن مىسالعا كەلتىردى. پرەزيدەنتتىڭ پايىمداۋىنشا، ناعىز ساربازدىڭ قادىر-قاسيەتى يىعىنداعى جۇلدىزدارىمەن عانا ەمەس، ەڭ الدىمەن، ەل الدىنداعى ادال ەڭبەگىمەن كورىنۋى ءتيىس.

شىن مانىندە، ناعىز ساربازدىڭ ابىروي-بەدەلى ونىڭ شەنىمەن ەمەس، ەڭ الدىمەن، وتان الدىنداعى ءمىنسىز قىزمەتىنە قاراي ولشەنەدى. كوپتەگەن جاستارىمىز سىزدەرگە قاراپ بوي تۇزەيدى، ۇلگى الادى. ءبارىڭىز دە انتقا ادال بولىپ، قازاق ساردارى دەگەن اتاققا ءاردايىم لايىق بولاسىزدار دەپ سەنەمىن، – دەدى قاسىم-جومارت توقاەۆ.

سالتاناتتى شاراعا جاس ساردارلارمەن بىرگە ولاردىڭ اتا-انالارى دا ارنايى قاتىستى. مەملەكەت باسشىسى ەل قورعاۋعا لايىقتى وتانشىل، نامىستى ازاماتتاردى تاربيەلەگەنى ءۇشىن ساربازداردىڭ وتباسىلارىنا شىنايى ريزاشىلىعىن ءبىلدىردى.

جيىن سوڭىندا پرەزيدەنت جاس وفيتسەرلەردىڭ العاشقى اسكەري شەندەرىمەن قۇتتىقتاپ، ولاردىڭ قيىن دا جاۋاپتى قىزمەتتەرىنە تابىس تىلەدى.

تۋىمىز ءاردايىم كوكتە جەلبىرەسىن! قازاق ەلى ماڭگى بولسىن! – دەپ تۇيىندەدى ءسوزىن مەملەكەت باسشىسى.

Abai.kz