قر كولىك ۆيتسە-ءمينيسترى جانىبەك تايجانوۆ «دوستىق-مويىنتى» تەمىرجولىنىڭ ەكىنشى جەلىسىنىڭ اشىلۋى ەلىمىزگە بىرنەشە ستراتەگيالىق سەبەپتەر بويىنشا قاجەتتىگىن ايتتى، – دەپ حابارلايدى Aykin.kz.

ونىڭ ايتۋىنشا، ەڭ الدىمەن  «دوستىق-مويىنتى» تەمىرجول جوباسى قازاقستانعا ترانزيتتىك جانە ەكسپورتتىق الەۋەتتى ارتتىرۋعا، جەتكىزۋ مەرزىمدەرىن قىسقارتۋعا، حالىقارالىق كولىك دالىزدەرىن دامىتۋعا ۇلەسى زور.

– بىرىنشىدەن، ترانزيتتىك جانە ەكسپورتتىق الەۋەتتى ارتتىرا تۇسەدى. بۇل ۋچاسكە قازاقستاندى قىتايمەن دوستىق شەكارالىق بەكەتى ارقىلى بايلانىستىرادى. ەكىنشى تەمىرجول جەلىسىنىڭ سالىنۋى وتكىزۋ قابىلەتىن ەداۋىر كەڭەيتىپ، جۇك قوزعالىسىن جەدەلدەتۋگە مۇمكىندىك بەرەدى. ترانزيتتەن تابىس تاباتىن ەل ءۇشىن بۇل – اسا ماڭىزدى.

ەكىنشىدەن، جەتكىزۋ مەرزىمدەرىن قىسقارتا تۇسپەك. قوسىمشا جولداردىڭ ارقاسىندا جۇكتىڭ قوزعالىسى قارقىندى باعىتتا جىلدامدايدى. بۇل قازاقستان ارقىلى وتەتىن «قىتاي–ەۋروپا» باعىتىنىڭ بالاما دالىزدەرمەن سالىستىرعاندا باسەكەگە قابىلەتتىلىگىن ارتتىرادى.

ۇشىنشىدەن، حالىقارالىق كولىك دالىزدەرىن دامىتا تۇسەدى. جوبا نەگىزگى باستامالاردىڭ قۇرامداس بولىگى بولىپ سانالادى، ولار – ترانسكاسپي حالىقارالىق كولىك باعىتى (تحكب) جانە «سولتۇستىك–وڭتۇستىك» ءدالىزى. ول قازاقستانعا قىتايدى، ورتالىق ازيانى، رەسەيدى، ەۋروپانى جانە پارسى شىعاناعى ەلدەرىن بايلانىستىراتىن ايماقتىق حاب رەتىندەگى مارتەبەسىن بەكىتۋگە كومەكتەسەدى.

تورتىنشىدەن، ەكونوميكالىق اسەردە بار. اتاپ ايتساق، ترانزيت كولەمىنىڭ ارتۋى ۆاليۋتالىق تۇسىمدەر اكەلەدى. جوبا ىلەسپە ينفراقۇرىلىمنىڭ قۇرىلىسىن ىنتالاندىرادى. سونىمەن قاتار وڭىرلەردە جۇمىس ورىندارى اشىلادى.

بەسىنشىدەن، بۇل جوبانىڭ گەوساياسي ماڭىزى زور. ستراتەگيالىق تەمىرجول تورابىن باقىلاۋدا ۇستاۋ – قازاقستاننىڭ جاھاندىق لوگيستيكالىق تىزبەكتەردەگى سەنىمدى سەرىكتەس رەتىندەگى ءرولىن كۇشەيتەدى. بۇل ەلدىڭ قىتايمەن، رەسەيمەن، ەو-مەن جانە وزگە دە ويىنشىلارمەن كەلىسسوزدەردەگى پوزيتسياسىن نىعايتادى. قورىتىندى: «دوستىق-مويىنتى» تەك تەمىرجول جەلىسى تۋرالى ەمەس، ول قازاقستاننىڭ جاھاندىق ساۋداداعى ءرولىن كۇشەيتۋ، ەكونوميكانىڭ ءوسۋى جانە گەوساياسي ىقپالىن بەكىتۋ، – دەيدى ۆيتسە-مينيستر جانىبەك تايجانوۆ.

Abai.kz