بەينەۋ اۋىلى ماڭىنداعى وقۋ-جاتتىعۋ پوليگونىندا «ايبالتا-2025» جەدەل-ستراتەگيالىق كوماندالىق-شتابتىق وقۋ-جاتتىعۋىنىڭ جابىلۋ سالتاناتى ءوتتى.

وعان قارۋلى كۇشتەردىڭ باسشىلىعى، بەينەۋ اۋدانىنىڭ اكىمى راقىمجان شالباەۆ جانە اسكەري قىزمەتشىلەر قاتىستى.

وقۋ-جاتتىعۋ اسكەرلەردىڭ جىلدام وزگەرىپ وتىراتىن جاعدايلاردا ارەكەت ەتۋ قابىلەتىن ايقىن دالەلدەدى. مانەۆرلەر بارىسىندا ۇرىس جۇرگىزۋدىڭ وزىق تاسىلدەرى، جاڭا تاكتيكالىق ادىستەر مەن مانەۆر جاساۋ ستراتەگيالارى سىننان ءوتتى.

اسكەر تەكتەرى مەن بولىمدەردىڭ جوعارى دەڭگەيدەگى ءوزارا ىقپالداستىعى بارلىق ستسەناريلەردى پىسىقتاۋعا جانە قويىلعان تاپسىرمالاردى ءتيىمدى ورىنداۋعا مۇمكىندىك بەردى. جەكە قۇرام دالالىق دايىندىقتىڭ، ۇيلەسىمدىلىكتىڭ جانە قازىرگى زامانعى سىن-قاتەرلەرگە بەيىمدەلۋ قابىلەتىنىڭ جوعارى دەڭگەيىن كورسەتتى.

كاسىبي شەبەرلىگى مەن جەتىستىكتەرى ءۇشىن ۇزدىك شىققان اسكەري قىزمەتشىلەر مەن بولىمشەلەر قۇرمەت گراموتالارىمەن جانە باعالى سىيلىقتارمەن ماراپاتتالدى.

«ايبالتا-2025» وقۋ-جاتتىعۋى قازاقستان اسكەرىنىڭ قازىرگى جەدەل جاعدايلاردا قورعانىس پەن شابۋىلدا جاۋىنگەرلىك تاپسىرمالاردى ءتيىمدى ورىنداي الاتىنىن دالەلدەدى.

جاتتىعۋ بارىسىندا جيناقتالعان تاجىريبە مەن ناتيجەلەر جاۋىنگەرلىك دايارلىقتى جەتىلدىرۋگە، جەدەل ونەردى دامىتۋعا جانە ەلدىڭ قورعانىس الەۋەتىن نىعايتۋعا نەگىز بولماق.

ءىس-شارا سوڭىندا بەينەۋ اۋداندىق مادەنيەت ءۇيىنىڭ شىعارماشىلىق ۇجىمى دايىنداعان كونتسەرتتىك باعدارلاما ۇسىنىلدى.

Abai.kz