يتاليالىق Chicco برەندى قازاقستاندا ءوز ءوندىرىسىن ىسكە قوسۋدى جوسپارلاپ وتىر. كاسىپورىن الماتى وبلىسىنداعى جاڭا الاتاۋ قالاسىندا ورنالاسادى.

ۇيىمداستىرۋشىلاردان الىندى

بۇل تۋرالى وبلىس اكىمى مارات سۇلتانعازيەۆ ءوزىنىڭ جاڭا Instagram پاراقشاسىندا حابارلادى. ونىڭ ايتۋىنشا، UNITED HYGIENE زاۋىتىنىڭ بازاسىندا Chicco ماركاسىمەن بالالار جورگەكتەرى مەن ىلعال سۇلگىلەر شىعارىلادى.

«حالىقارالىق برەندتىڭ كەلۋى – شەتەلدىك ينۆەستورلاردىڭ وڭىرگە دەگەن جوعارى سەنىمىنىڭ كورىنىسى. الاتاۋ قالاسى الەمدىك كومپانيالار ءوز بولاشاعىن كورەتىن وندىرىستىك ورتالىققا اينالۋدا»، – دەدى وبلىس اكىمى.

جوبانىڭ جالپى قۇنى 10 ميلليارد تەڭگە. ونىڭ جۇزەگە اسىرىلۋى ناتيجەسىندە 200–250 جاڭا جۇمىس ورنى اشىلادى.

زاۋىتتىڭ ساپالى ونىمدەرى ىشكى نارىققا عانا ەمەس، سونىمەن قاتار رەسەي، گرۋزيا، ازەربايجان جانە وزبەكستان ەلدەرىنە ەكسپورتتالاتىن بولادى (ەكسپورت ۇلەسى – 50%).

مارات سۇلتانعازيەۆتىڭ ايتۋىنشا، بۇل جوبا ءوڭىر ەكونوميكاسىن نىعايتىپ، ينۆەستيتسيالىق تارتىمدىلىعىن ارتتىرۋعا باعىتتالعان ماڭىزدى قادام بولماق.

Abai.kz