استانادا ءXIى ازاماتتىق فورۋم اياسىندا قوعامدىق كەڭەستەردىڭ IV رەسپۋبليكالىق ءماجىلىسى ءوتتى. ءىس-شاراعا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا، وڭىرلىك جانە رەسپۋبليكالىق قوعامدىق كەڭەستەردىڭ مۇشەلەرى، ساراپشىلار، حالىقارالىق سەرىكتەستەر مەن ازاماتتىق سەكتور وكىلدەرى قاتىستى.

ءوز سوزىندە مينيستر قوعامدىق ينستيتۋتتاردىڭ تۇراقتى دامىپ، ولاردىڭ ءرولىنىڭ ارتىپ كەلە جاتقانىن اتاپ ءوتتى.

سۋرەت: gov.kz سايتىنان الىندى.

«قوعامدىق كەڭەستەردىڭ ءتيىمدى جۇمىسى كوبىنە سىزدەردىڭ بەلسەندى ۇستانىمدارىڭىز بەن باستاماشىلدىقتارىڭىزعا بايلانىستى. بۇل الاڭدا سىزدەر، ۇلتتىق قۇرىلتاي مۇشەلەرى سياقتى، جەرگىلىكتى دەڭگەيدە كوتەرىلگەن وزەكتى ماسەلەلەر مەن ۇسىنىستاردى تالقىلاۋعا باستاماشى بولا الاسىزدار. بۇل ازاماتتاردىڭ پىكىرىن رەسپۋبليكالىق دەڭگەيگە جەتكىزۋدىڭ ءتيىمدى جولى»، – دەدى ايدا بالاەۆا.

مينيستر حالىقپەن كەرى بايلانىستى نىعايتۋ جانە قوعامدىق كەڭەستەر ينستيتۋتىن زاماناۋي ۇردىستەرگە ساي جەتىلدىرۋ قاجەتتىگىن ايتتى. وسى ماقساتتا ول كەڭەستەردىڭ جۇمىسىندا تسيفرلىق تەحنولوگيالار مەن جاساندى ينتەللەكت مۇمكىندىكتەرىن كەڭىنەن قولدانۋدى ۇسىندى. سونىمەن قاتار، ايدا بالاەۆا قوعامدىق كەڭەستەردىڭ پارلامەنتتىك رەفورمالارعا بەلسەندى قاتىسۋىنىڭ ماڭىزدىلىعىن ەرەكشە اتاپ ءوتتى.

سۋرەت: gov.kz سايتىنان الىندى.

«پرەزيدەنت اتاپ وتكەندەي، بۇل ماسەلە قوعامنىڭ كەڭىنەن قاتىسۋىن، حالىق پىكىرىن جان-جاقتى تالداۋ مەن زەردەلەۋدى قاجەت ەتەدى. سوندىقتان قوعامدىق كەڭەستەردىڭ كونستيتۋتسيا باپتارىنا تولىقتىرۋلار مەن وزگەرىستەر ەنگىزۋ جونىندەگى ۇسىنىستاردى ازىرلەۋ پروتسەسىنە تىكەلەي ارالاسۋى ماڭىزدى دەپ سانايمىن»، – دەدى مينيستر.

ايدا بالاەۆا قوعامدىق كەڭەستەردىڭ جۇمىس تيىمدىلىگىن ارتتىرۋ جانە قوعامدىق باقىلاۋدى كۇشەيتۋ ماقساتىندا كەڭەستەردىڭ حالىق الدىندا اشىق ەسەپ بەرۋ تاجىريبەسىن ەنگىزۋدى ۇسىندى. ونىڭ ايتۋىنشا، «قوعامدىق كەڭەستەر تۋرالى» زاڭدا بەكىتىلگەن اشىقتىق پەن ايقىندىق قاعيداتتارى تەك قاعاز جۇزىندە ەمەس، ءىس جۇزىندە جۇزەگە اسۋى ءتيىس.

سۋرەت: gov.kz سايتىنان الىندى.

ايدا بالاەۆا قوعامدىق باقىلاۋدىڭ تەك جەكەلەگەن ماسەلەلەرمەن شەكتەلمەۋىنە دە نازار اۋدارۋ قاجەتىن اتاپ ءوتتى. ونىڭ پىكىرىنشە، بۇل باعىت پرەزيدەنتتىڭ باستامالارى مەن ۇلتتىق جوبالارىنىڭ («زاڭ جانە ءتارتىپ»، «تازا قازاقستان»، «ادال ازامات» جانە ت.ب.) ىسكە اسىرىلۋىن جۇيەلى تۇردە مونيتورينگتەۋ مەن ىلگەرىلەتۋگە باعىتتالۋى ءتيىس. بۇل جۇمىسقا قوعام وكىلدەرىن كەڭىنەن تارتۋ قاجەت.

بۇگىندە قازاقستاندا 263 قوعامدىق كەڭەس قۇرامىندا 4000-نان استام بەلسەندى ازامات ەڭبەك ەتۋدە. سوڭعى ءۇش جىلدا ولار ازاماتتاردىڭ قۇقىقتارى مەن بوستاندىقتارىنا قاتىستى 9000-نان استام نورماتيۆتىك-قۇقىقتىق اكتىلەر جوباسىن قاراستىرعان. سونداي-اق، 2100 مەملەكەتتىك ورگان باسشىسىنىڭ ەسەپتەرى تىڭدالىپ، 820 قوعامدىق تىڭداۋ ۇيىمداستىرىلعان. بۇدان بولەك، الەۋمەتتىك قورعاۋ، جەر قاتىناستارى، دەنساۋلىق ساقتاۋ جانە باسقا دا ماسەلەلەر بويىنشا 2000-نان استام ازاماتتىڭ وتىنىشتەرى قارالعان.

Abai.kz