الماتىدا ءورت قاۋىپسىزدىگىن قامتاماسىز ەتۋ مەن وقىس وقيعانىڭ سانىن ازايتۋدى كوزدەيتىن ناۋقان جالعاسۋدا. اسىرەسە وتىنمەن جىليتىن، قاۋىپتى ايماقتا ورنالاسقان ۇيلەر ەرەكشە باقىلاۋعا الىندى. بۇل تۋرالى وڭىرلىك كوممۋنيكاتسيالار قىزمەتىنە الماتى قالاسى تجد مەملەكەتتىك ءورت باقىلاۋ باسقارماسىنىڭ باسشىسى كونستانتين كانين وسىلاي دەپ مالىمدەدى.

حالىقتى قۇلاقتاندىرىپ، وقىس جاعدايدىڭ الدىن الۋ ءۇشىن ناسيحاتتاۋ مەن تۇسىندىرمە جۇمىسى قولعا الىنعان. الەۋمەتتىك وسال توپتاعىلار تۇراتىن 686 ءۇي مەن وعاش قىلىقتى ادامدار تۇراتىن 2067 ءۇي وسىنداعى ەڭ قاۋىپتى ساناتقا كىرەدى. «قاۋىپسىز پەش»، «تازا ءتۇتىن» مەن «كومەك قولى» دەپ اتالاتىن اكتسيالاردىڭ اياسىندا وسىلاردىڭ بارلىعى تەكسەرۋدەن ءوتتى.

سۋرەت: قر توتەنشە جاعدايلار دەپارتامەنتىنەن الىندى.

ەستەرىڭىزگە سالساق، مەگاپوليستە ءورت قاۋىپسىزدىگى ايلىعى ءوتتى. وسى ۋاقىت ىشىندە تجد قىزمەتكەرلەرى جەكە سەكتورداعى جانە كوپقاباتتى ۇيلەردەگى تۇرعىندارمەن كەزدەسۋلەر وتكىزىپ، ۇيلەردى ارالاپ، تۇرعىندارعا ءورت قاۋىپسىزدىگىنىڭ تالاپتارىن ءتۇسىندىردى. تۇرعىندارعا جىلىتۋ قۇرىلعىلارىن قاۋىپسىز پايدالانۋعا قاتىستى نۇسقاۋلىقتار مەن بۋكلەتتەر تاراتىلدى.

بۇل جۇمىس «قىزىل اي قوعامى»، «Lider.kz» مەن «قازاقستان ەرىكتىلەر ليگاسى» سياقتى ۇيىمدار مەن «قازترانسگاز ايماق» اق وندىرىستىك بولىمشەسىمەن بىرلەسىپ جۇزەگە استى. گاز قازاندىعىن قولداناتىن ۇيلەرگە ەرەكشە نازار اۋدارىلدى.

سۋرەت: قر توتەنشە جاعدايلار دەپارتامەنتىنەن الىندى.

حالىقتىڭ كەڭىنەن حاباردار بولۋى ءۇشىن دەپارتامەنت ءورت قاۋىپسىزدىگى ەرەجەلەرى تۋرالى ەسكە سالۋ سمس-حابارلامالارىن ۇيىمداستىرىپ، 7,6 ميلليوننان استام ابونەنت حابارلامانى الدى.

ينتەرنەتتە، ونىڭ ىشىندە الەۋمەتتىك جەلىلەردە 260 پروفيلاكتيكالىق ماتەريال جارىق كوردى. حالىق كوپ جينالاتىن نىسانداردا جىلۋ قۇرىلعىلارىن قاۋىپسىز پايدالانۋدى ناسيحاتتاۋ جاعى دا ەسكەرىلگەن.

سۋرەت: قر توتەنشە جاعدايلار دەپارتامەنتىنەن الىندى.

«جىلىتۋ ماۋسىمى كەزىندە ءتۇتىن شىعاراتىن قوندىرعىنى كەمىندە ەكى ايدا ءبىر رەت تازالاپ تۇرۋ كەرەك. پەشتى شامادان تىس قىزدىرماڭىز، ولاردى تەز تۇتاناتىن، لاپ ەتە قالاتىن زاتقا جاقىن ورنالاستىرماڭىز. گازبەن جۇمىس ىستەيتىن پەشتى پايدالانۋدىڭ نۇسقاۋلىعىن قاتاڭ ساقتاڭىز. پەشتى، گاز كولونكاسىن، اس ءۇي پليتاسىن، كەروگاز بەن ەلەكتر قۇرىلعىلارىن بالالاردان اۋلاقتاۋ ۇستاپ، قاراۋسىز قالدىرماڭىز»، - دەپ قورىتتى كونستانتين كانين.

Abai.kz