قازاقستاندا جالاقىنىڭ تۇراقتى ءوسۋى جالعاسۋدا. بۇل ەل ەكونوميكاسىنىڭ جاندانۋىن جانە حالىقتىڭ ءومىر ءسۇرۋ دەڭگەيىنىڭ جاقسارعانىن كورسەتەدى، دەپ حابارلايدى ranking.kz.

قازاقستان رەسپۋبليكاسى ۇلتتىق ستاتيستيكا بيۋروسىنىڭ دەرەكتەرى بويىنشا، 2025 جىلدىڭ ەكىنشى توقسانىندا ورتاشا ايلىق اتاۋلى جالاقى 448,6 مىڭ تەڭگەنى قۇرادى. قالالاردا - 471 مىڭ تەڭگە، ال اۋىلدىق جەرلەردە - 381,7 مىڭ تەڭگە.

وتكەن جىلدىڭ وسى كەزەڭىمەن سالىستىرعاندا جالاقى 11,3%-عا وسكەن. ال توقساندىق ءوسىم 6%-دى قۇراپ، ناقتى (ساتىپ الۋ قابىلەتى تۇرعىسىنان) ءوسىم شامامەن 2,4% بولدى.

ۇزاقمەرزىمدى ديناميكاعا نازار اۋدارساق، سوڭعى بەس جىلدا ورتاشا ايلىق اتاۋلى جالاقى ەكى ەسەدەن استام وسكەن. بۇل ەل ەكونوميكاسىنداعى قۇرىلىمدىق وزگەرىستەردى - شيكىزاتتىق ەمەس سالالاردىڭ دامۋىن، بيزنەستىڭ تسيفرلاندىرىلۋىن جانە ينۆەستيتسيا كولەمىنىڭ ارتۋىن كورسەتەدى.

بۇگىندە ەڭبەك نارىعى بارعان سايىن قۇزىرەتتىلىككە باعىتتالىپ كەلەدى. تەحنولوگيالىق داعدىلارى بار، شەتەل تىلدەرىن مەڭگەرگەن، ساراپتاما جاساي وتىرىپ جۇمىس ىستەي الاتىن نەمەسە جوبالاردى باسقارا بىلەتىن ماماندار ورتاشا دەڭگەيدەن الدەقايدا جوعارى جالاقى الادى.

ءتىپتى اۋىل شارۋاشىلىعى سياقتى ءداستۇرلى سالالاردا دا ينجەنەرلەرگە، ساراپشىلارعا جانە باسقا دا ماماندارعا سۇرانىس جوعارى. ماسەلەن، اگروسەكتورداعى جوبالاۋ ينجەنەرى ايىنا شامامەن 2,7 ملن تەڭگە تابىس تابادى. ساراپشىلار 850 مىڭ تەڭگەدەن استام تابىس تاپسا، ينجەنەر-قۇراستىرۋشىلار 800 مىڭ تەڭگەدەن باستاپ جالاقى الادى. ال تەحنيك-تەحنولوگتار شامامەن 757 مىڭ تەڭگە الادى.

كورشىلەس ەلدەرمەن سالىستىرعاندا، قازاقستانداعى جالاقى ورتالىق ازيا بويىنشا ەڭ جوعارى دەڭگەيلەردىڭ ءبىرى بولىپ وتىر.

ورتاشا ايلىق كورسەتكىش (448,6 مىڭ تەڭگە) وزبەكستانداعى دەڭگەيدەن شامامەن 70%-عا جوعارى جانە تاجىكستانمەن سالىستىرعاندا شامامەن 2,5 ەسە كوپ.

ەڭبەك نارىعى جۇمىسپەن قامتۋ جاعىنان دا وڭ ديناميكا كورسەتۋدە.

2025 جىلدىڭ ەكىنشى توقسانىندا جۇمىسسىزدىق دەڭگەيى 4,6%-دى قۇراپ، ەل تاريحىنداعى ەڭ تومەن كورسەتكىشكە جەتتى. ءبىر جىل ىشىندە جۇمىسپەن قامتىلعاندار سانى 110,1 مىڭ ادامعا ارتقان، ال جاستار اراسىنداعى جۇمىسسىزدىق 3,1%-عا دەيىن تومەندەگەن.

مەملەكەتتىك جۇمىسپەن قامتۋ شارالارىنىڭ قاتارىندا سۋبسيديالاناتىن جۇمىس ورىندارىن اشۋ، وقىتۋ جانە قايتا دايارلاۋ باعدارلامالارى بار.

Abai.kz