قازاقستاندا دەموكراتيالىق قۇندىلىقتاردى نىعايتىپ، قوعام مەن مەملەكەتتىڭ ءوزارا سەنىمىن ارتتىرۋ ءۇشىن ازاماتتىق قوعامنىڭ ءرولى ايرىقشا ماڭىزعا يە. سوڭعى جىلدارى بۇل سالادا كوپتەگەن باستامالار قولعا الىنىپ، قوعامنىڭ بەلسەندى توبى ءتۇرلى باعىتتا وڭ وزگەرىستەر ەنگىزىپ كەلەدى.

جەرگىلىكتى جانە رەسپۋبليكالىق دەڭگەيدەگى قوعامدىق كەڭەستەردىڭ قىزمەتىن جانداندىرۋ ازاماتتاردىڭ شەشىم قابىلداۋ پروتسەسىنە قاتىسۋ مۇمكىندىگىن كەڭەيتەدى. اتالعان ماسەلەگە بايلانىستى كەڭەس مۇشەلەرىن ىرىكتەۋدە اشىقتىق پەن باسەكەلەستىك قاعيداتىن ساقتاۋ قوعامنىڭ سەنىمىن كۇشەيتەرى دە انىق.

ءبىز وسى ماسەلە بويىنشا ساياساتتانۋشى توعجان قوجالىعا حابارلاسقان ەدىك. ول ءوز كوزقاراسىن بىلاي جەتكىزدى:

«ازاماتتىق قوعام – دەموكراتيانىڭ اشەكەيى ەمەس، ونىڭ قوزعاۋشى كۇشى.

بۇگىنگى تاڭدا قازاقستاندا ينكليۋزيۆتىلىكتىڭ العاشقى بەلگىلەرى پايدا بولۋدا: قوعامدىق ۆولونتەرلەر جانە بايقاۋشىلار قوزعالىستارى، تاۋەلسىز ساراپشىلار قاۋىمداستىقتارى، اشىق دەرەكتەر جايلى الەۋمەنتتىك جەلىدەگى باستامالارى. بۇل – ازاماتتىق بەلسەندىلىكتىڭ قوعامعا قاۋىپ بولاتىن ەمەس، دامۋدىڭ رەسۋرسى بولا باستاعانىنىڭ نىشانى.

الايدا شىنايى دامۋ  جەكەلەگەن جوبالاردان ەمەس، ناقتىلانعان رەسمي ەرەجەلەردەن باستالادى. بيلىك كەرى بايلانىستىڭ وعان جاۋى ەمەس، سەرىكتەسى ەكەنىڭ تۇسىنگەندە  جانە ءار ازامات ءوز ويىن ايتۋعا قورىقپاعاندا عانا– ينكليۋزيۆتى ينستيتۋتتار قالىپتاسادى.

قازىر قازاقستان تاريحي تاڭداۋدىڭ الدىندا تۇر: باقىلاۋ ارقىلى باسقارۋ ما، الدە سەنىم ارقىلى دامۋ جولى ما؟  ازاماتتىق قوعامنىڭ قۋاتىن ەلدى العا جەتەلەيتىن كۇشكە اينالدىراتىن جول – تەك سەنىمگە نەگىزدەلگەن دامۋ جولى. ەگەر قوعامدا بيلىك پەن قاراپايىم حالىق اراسىندا سەنىم بولسا; سوندا عانا قوعام داميدى. قازىر ول جوق. قوعۆم دامۋ جانە اشىق بولۋ ءۇشىن وسى سۇراقتارعا جاۋاپ بەرۋ جولدارىن ىزدەۋ كەرەك جانە شەشىمدەرىن جۇزەگە اسىرۋ كەرەك»، - دەدى ساراپشى.

تۇيىندەپ ايتساق، بۇل ۇدەرىستە ازاماتتاردىڭ قۇقىقتىق ساۋاتتىلىعىن كوتەرۋ دە ەرەكشە ماڭىزعا يە.

ازاماتتاردىڭ ءوز قۇقىقتارى مەن مىندەتتەرىن ءبىلۋى – كەز كەلگەن دامىعان قوعامنىڭ نەگىزى. بۇل باعىتتا ونلاين كۋرستار، قۇقىقتىق كەڭەس بەرۋ ورتالىقتارى مەن مەكتەپتەر مەن ۋنيۆەرسيتەتتەردە «ازاماتتىق بەلسەندىلىك» ءپانىن ەنگىزۋ سەكىلدى باستامالار جۇزەگە اسىرىلۋى مۇمكىن.

سونىمەن بىرگە، جاستاردىڭ ازاماتتىق جاۋاپكەرشىلىگىن قالىپتاستىرۋعا نازار اۋدارعان ءجون. جاستار ۇيىمدارىن قولداۋ، مەكتەپ پەن جوو دەڭگەيىندە ازاماتتىق ءبىلىم بەرۋدى كۇشەيتۋ جانە كرەاتيۆتى جوبالار ارقىلى پاتريوتتىق سانا مەن قوعامدىق بەلسەندىلىكتى دامىتۋ – بولاشاق قوعامنىڭ ساپاسىن ايقىندايدى.

Abai.kz