جازيرالى جاركەنت قالاسى تاعى ءبىر تاماشا ادەبي كەشتىڭ كۋاسى بولدى. اۋداندىق مادەنيەت ۇيىندە قازاقستان جازۋشىلار وداعىنىڭ مۇشەسى، اقىن گۇلباقىت قاسەننىڭ «بويتۇمارىم – قارا ولەڭ» اتتى شىعارماشىلىق كەشى ءوتتى. زال تولى كورەرمەن – تۋعان جەردىڭ تالانتتى پەرزەنتىن قولداۋعا اسىققان حالىقتىڭ ىستىق ىقىلاسى مەن اقىنعا دەگەن شەكسىز قۇرمەتتىڭ ايعاعى ىسپەتتى.

كەشكە زيالى قاۋىم وكىلدەرى، قازاقستان جازۋشىلار وداعىنىڭ مۇشەلەرى قاتىستى. پانفيلوۆ اۋدانىنىڭ اكىمدىگى ۇيىمداستىرعان مادەنيەت ورداسىنىڭ ساحناسى بۇل كۇنى جىر مەن سىرعا، اۋەن مەن اسەرگە تولدى. ءا دەگەننەن-اق، د. راقىشەۆ اتىنداعى حالىق تەاترىنىڭ كورىنىسىمەن باستالعان شارا كورەرمەندى بىردەن سەزىم يىرىمىنە جەتەلەدى.

گۇلباقىت قاسەن – پوەزيا الەمىندە وزىندىك قولتاڭباسى بار، ولەڭگە ادالدىعىمەن ەرەكشەلەنگەن اقىن. ونىڭ جىرلارىندا ارۋعا ءتان نازىكتىك پەن ازاماتقا ءتان اسقاق وي قاتار ورىلەدى. اقىن جانىنىڭ جىلۋىن تۋعان جەرىنە، ەلىنە ارناپ كەلە جاتقان قالامگەرگە بۇل كەش – جىلدار جەمىسىنىڭ، ەڭبەكتىڭ مەرەيلى ءساتى.

كەش بارىسىندا الماتىدان ارنايى كەلگەن اقىن، حالىقارالىق «الاش» ادەبي سىيلىعىنىڭ لاۋرەاتى ەرجان الاشتۋعان ىزگى تىلەگىن ءبىلدىردى:

– مەملەكەتتىك قىزمەتتە ءجۇرىپ، ونەرىن ۇمىتپاعان، قايتا بارىنەن جوعارى قويعان گۇلباقىت توقتانقىزىمەن ماقتانامىز. ول ءوز ءوڭىرىنىڭ عانا ەمەس، كۇللى قازاق ەلىنىڭ ماقتانىشى, – دەدى ول.

ال تالدىقورعاننان كەلگەن «Janr» ادەبي كلۋبىنىڭ پرەزيدەنتى، جازۋشى ەسبولات ايدابوسىن قازاقستان جازۋشىلار وداعى باسقارما توراعاسى مەرەكە قۇلكەنوۆتىڭ ارنايى قۇتتىقتاۋ حاتىن وقىپ، اقىنعا تابىستادى.

كەش يەسىن پانفيلوۆ اۋدانىنىڭ اكىمى مۇرات ساعىمبەك تە ساحنا تورىنە شاقىرىپ، جەرلەستەرى اتىنان قۇتتىقتاۋ ءسوز سويلەپ، ارنايى شاپان جاپتى.

سۋرەت: اۆۆتوردىڭ مۇراعاتىنان الىندى.

شىعارماشىلىق كەش بارىسىندا اقىننىڭ بىرقاتار جاڭا كىتاپتارىنىڭ تۇساۋى كەسىلدى. ولار – پروزالىق، پوەزيالىق، بالالار ادەبيەتى مەن اۋدارما جانرىندا جارىق كورگەن «قاراشادا ءومىر بار»، «تامشى تاعدىر»، «باركورنەۋ» جانە «ءبىز باقىتتى بالامىز!» اتتى تۋىندىلار. ءار كىتاپ گۇلباقىت قاسەننىڭ جۇرەك جىلۋىمەن ورىلگەن، ەل رۋحانياتىنا قوسقان ۇلەسى.

سۋرەت: اۆۆتوردىڭ مۇراعاتىنان الىندى.

جيىنعا قاتىسقان كوپشىلىك اقىننىڭ ولەڭدەرىن سۇيسىنە تىڭداپ، كەي ساتتە كوزدەرىنە جاس الدى، اقىن سوزىنە جازىلعان اندەر ورىندالدى.

شارا سوڭىندا جينالعان قوناقتار جاركەنتتىڭ قاستەرلى نىساندارىنىڭ ءبىرى – جەتىعاسىرلىق تاريحى بار «اۋليەاعاشقا» بارىپ، تاعىلىمدى ساياحات جاسادى.

اتالعان پوەزيا كەشى – جۇرەكتەرگە جىلىلىق، ساناعا ساۋلە سىيلاعان رۋحاني مەرەكە بولدى. گۇلباقىت قاسەننىڭ جىرلارى –  تۋعان جەردىڭ توپىراعىنان ءنار الىپ، ۇلتتىڭ رۋحىن اسقاقتاتقان اسىل مۇرا.

سانجار سۇلتانعازى

جاركەنت قالاسى

Abai.kz