قازاقستان رەسپۋبليكاسىنىڭ مەملەكەتتىك كەڭەسشىسى – قازاقستاننىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ توراعاسى ەرلان قارين وزبەكستان رەسپۋبليكاسىنىڭ سامارقاند قالاسىندا ءوتىپ جاتقان بىرىككەن ۇلتتار ۇيىمىنىڭ ءبىلىم، عىلىم جانە مادەنيەت ماسەلەلەرى جونىندەگى باس كونفەرەنتسياسىنىڭ (يۋنەسكو) 43-ءشى سەسسياسىندا ءسوز سويلەدى.

مەملەكەتتىك كەڭەسشى ءوز بايانداماسىندا قازاقستان پرەزيدەنتى قاسىم-جومارت توقاەۆتىڭ بۇۇ باس اسسامبلەياسىنىڭ 80-ءشى سەسسياسىندا سەنىمگە، اشىقتىققا، جاۋاپكەرشىلىك پەن ادىلدىككە نەگىزدەلگەن جاڭا جاھاندىق كونسەنسۋستى قالىپتاستىرۋعا شاقىرعانىن اتاپ ءوتتى. وسى ورايدا ول يۋنەسكو-نىڭ ماڭىزى ارتا تۇسكەنىن ايتىپ، يسلام الەمىنىڭ ءبىلىم، عىلىم جانە مادەنيەت ۇيىمىمەن (ICESCO) حالىقارالىق ىنتىماقتاستىقتى نىعايتۋعا شاقىردى.

– يۋنەسكو مەن ICESCO ورتاق ماقساتتاردى كوزدەيدى. ەكى ۇيىمنىڭ ىنتىماقتاستىعىن نىعايتۋ مادەنيەتتەر اراسىندا شىنايى سەرىكتەستىك قۇرۋعا جانە ولاردىڭ وڭ اسەرىن ودان ءارى ارتتىرۋعا مۇمكىندىك بەرەدى. بىرلەسكەن كۇش-جىگەردىڭ ناتيجەسىندە عانا ورتاق مادەني مۇرامىزدىڭ بار بايلىعى مەن ارتۇرلىلىگىن ساقتايتىنىمىزعا سەنىمدىمىز. ءبىز بىرلەسىپ ءادىل، سانالى ءارى مەيىرىمدى الەمدى قۇراتىن بولامىز، – دەدى ول.

مەملەكەت باسشىسىنىڭ بيىلعى جولداۋىندا ايتىلعان قازاقستاندى ودان ءارى جاڭعىرتۋدىڭ جاڭا قادامدارى ە.قارين بايانداماسىنىڭ نەگىزگى وزەگى بولدى. بۇل ەڭ الدىمەن ەكونوميكانىڭ ءتۇرلى سالالارىنا جاساندى ينتەللەكتىنى جاپپاي ەنگىزۋ جانە تسيفرلاندىرۋدى كەڭ كولەمدە دامىتۋدى قامتيدى. قازاقستان بولاشاقتا تەحنولوگيالىق تۇرعىدان دامىعان مەملەكەت اتانۋدى كوزدەيدى.

– قازاقستان تسيفرلاندىرۋ مەن جاساندى ينتەللەكت قۇرالدارىن جەدەلدەتىپ ەنگىزۋدە كەشەندى ءارى جۇيەلى شەشىمدەر قابىلداعان الەمدەگى العاشقى ەلدەردىڭ ءبىرى بولىپ وتىر. قازاقستان پرەزيدەنتى تسيفرلىق ترانسفورماتسيا مەن جاساندى ينتەللەكتىنى ەنگىزۋدى جاڭا ۇلتتىق يدەيا رەتىندە ايقىنداپ بەردى، – دەدى ەرلان قارين.

وسى ورايدا مەملەكەتتىك كەڭەسشى يۋنەسكو-نىڭ جاساندى ينتەللەكت ەتيكاسىن قالىپتاستىرۋداعى جەتەكشى ءرولىن قولدايتىنىن جەتكىزدى. سونداي-اق قازاقستاندا يۋنەسكو (RAM) ادىستەمەسىنە سايكەس جاساندى ينتەللەكت ەتيكاسى مەن ونى دامىتۋ جونىندە زەرتتەۋ جۇرگىزىلىپ جاتقانىن حابارلادى.

بۇعان قوسا ەرلان قارين جولداۋدا جاريالانعان ءبىر پالاتالى پارلامەنتكە كوشۋدى ءارى ونى پروپورتسيونالدى جۇيە بويىنشا قالىپتاستىرۋدى كوزدەيتىن ساياسي جاڭعىرتۋ ۇدەرىسىنىڭ ماقساتتارى مەن سيپاتى تۋرالى ايتتى.

– قازاقستانداعى پارلامەنتتىك رەفورمانىڭ ماقساتى – ساياسي جۇيەنىڭ ينستيتۋتسيونالدىق نەگىزدەرىن ودان ءارى نىعايتۋ. ناتيجەسىندە پارتيالاردىڭ ءرولى كۇشەيىپ، قوعامدىق-ساياسي ۇدەرىستەرگە قاتىسۋى ارتادى. جالپى، پارلامەنتتىك رەفورما قازاقستانداعى ساياسي جاڭعىرۋدىڭ كەزەكتى كەزەڭى بولىپ سانالادى، – دەدى مەملەكەتتىك كەڭەسشى.

باس كونفەرەنتسياعا ۇيىمنىڭ 193 مۇشە مەملەكەتىنەن دەلەگاتسيالار قاتىسۋدا، ونىڭ ىشىندە ۇكىمەت باسشىلارى، مينيسترلەر، عالىمدار مەن مادەنيەت قايراتكەرلەرى، ديپلوماتتار، ساراپشىلار جانە باسقالار بار.

Abai.kz