اقش ۆەنەسۋەلاداعى ىقتيمال اسكەري وپەراتسيالارعا ارنالعان پلاتسدارم دايىنداپ جاتىر. بۇل تۋرالى Reuters اگەنتتىگى الىنعان سپۋتنيكتىك سۋرەتتەرگە سىلتەمە جاساپ حابارلادى.

اگەنتتىكتىڭ مالىمەتىنشە، 7 قىركۇيەكتە پۋەرتو-ريكودا 20 جىلدان استام ۋاقىت قاراۋسىز قالعان اقش-تىڭ رۋزۆەلت-روۋدس اسكەري-تەڭىز بازاسىندا قۇرىلىس جۇمىستارى باستالعان. وندا ۇشۋ-قونۋ جولاعىنا اپاراتىن رۋلەجدىك جولداردى تازارتۋ جانە جول جابىندىسىن اۋىستىرۋ جۇمىستارى ءجۇرىپ جاتىر. بۇعان قوسا، اقش پۋەرتو-ريكودا جانە امەريكالىق ۆيردجين ارالدارىنىڭ قۇرامىنا كىرەتىن سانتا-كرۋس ارالىندا ازاماتتىق اۋەجايلاردىڭ ينفراقۇرىلىمىن كەڭەيتىپ جاتىر. بۇل اۋماقتار ۆەنەسۋەلادان شامامەن 500 ميل (شامامەن 800 كم) قاشىقتىقتا ورنالاسقان.

ۆاشينگتون كاراكاستى ەسىرتكى كونترابانداسىنا قارسى جەتكىلىكتى بەلسەندى كۇرەسپەيدى دەپ ايىپتاپ وتىر. وسى سەبەپتەن دە اقش كاريب تەڭىزى اۋماعىنا ءىرى كۇشتەرىن كوشىردى. The Miami Herald گازەتى حابارلاعانداي، امەريكالىق بيلىك ۆەنەسۋەلا اۋماعىنداعى اسكەري نىساندارعا سوققى جاساۋ تۋرالى شەشىم قابىلداعان.

سونىمەن قاتار اقش پرەزيدەنتى دونالد ترامپ جۋرناليستەرمەن بولعان اڭگىمەدە ۆەنەسۋەلاعا سوققى بەرۋدى قاراستىرىپ جاتىر نەمەسە بۇل جونىندە شەشىم قابىلدادى دەگەن بولجامداردى جوققا شىعاردى.

ەسكە سالا كەتسەك، اقش ەڭ ءىرى اۋە تاسىمالداعىشىن ۆەنەسۋەلاعا جىبەرگەنىن جازدىق. ونىڭ الدىندا امەريكالىق بومبالاۋشى ۇشاقتار ۆەنەسۋەلاعا مۇمكىندىگىن كورسەتكەن ەدى.

Abai.kz