2025 جىلدىڭ 7–21 قاراشا كۇندەرى ساۋد ارابياسىنىڭ ار-رياد قالاسىندا VI يسلام ىنتىماقتاستىعى ويىندارى وتەدى.

ەكى اپتا بويى 24 سپورت ءتۇرى بويىنشا 270 مەدال جيىنتىعى ساراپقا سالىنادى. بيىل العاش رەت دجيۋ-دجيتسۋ مەن مۋايتاي سپورت تۇرلەرىنەن دە مەدالدار ويناتىلادى.

يسلام ىنتىماقتاستىعى ويىندارى: دامۋ تاريحى العاشقى ويىندار 2005 جىلى ساۋد ارابياسىندا ۇيىمداستىرىلدى.

وعان بارلىق قۇرلىقتان مەملەكەتتەر قاتىسادى: افريكادان – 27 ەل، ازيادان – 25, ەۋروپادان – 3 جانە وڭتۇستىك امەريكادان – 2 مەملەكەت. ەكىنشى ويىندار وتكىزىلمەي قالسا، ءۇشىنشى ويىندار 2013 جىلى يندونەزيانىڭ پالەمبانگ قالاسىندا ءوتتى. ءتورتىنشى ويىندار 2017 جىلى باكۋدە (ازەربايجان), ال بەسىنشىسى 2022 جىلى كونيادا (تۇركيا) ۇيىمداستىرىلدى. بيىل، 20 جىل وتكەن سوڭ، ساۋد ارابياسى قايتادان جارىس قوجايىنى اتانىپ وتىر.

قازىرگى تاڭدا ەل حالىقارالىق جارىستاردى بەلسەندى تۇردە وتكىزىپ كەلەدى: ساۋد ارابياسى 2029 جىلعى قىسقى ازيا ويىندارىن، 2034 جىلعى جازعى ازيا ويىندارىن جانە فۋتبولدان الەم چەمپيوناتىن قابىلداۋ قۇقىعىنا يە. سونىمەن قاتار ەل 2036 جىلعى جازعى وليمپيادانى وتكىزۋگە دە ۇمىتكەر.

ەل نامىسىن كىمدەر قورعايدى؟

قازاقستان ساپىندا 98 سپورتشى — 48 ەر جانە 50 ايەل — 15 سپورت ءتۇرى بويىنشا باق سىنايدى. قاتىسۋشىلار سانى جاعىنان ءبىزدىڭ قۇراما 57 ەلدىڭ ىشىندە 10-ورىندا تۇر. ولاردىڭ قاتارىندا الەم چەمپيوندارى: نۇرعيسا ادىلەتۇلى مەن ارتيوم انتروپوۆ (اۋىر اتلەتيكا), ريزابەك ايتمۇحان جانە نۇرقوجا قايپانوۆ (ەركىن كۇرەس), رامازان قۇسايىنوۆ پەن جىبەك قۇلىمبەتوۆا (دجيۋ-دجيتسۋ), ءابىل عاليەۆ (مۋايتاي), سونداي-اق توكيو وليمپياداسىنىڭ قولا جۇلدەگەرى سوفيا بەرۋلتسەۆا (كاراتە WKF). قازاقستان قۇراماسىنان ەڭ كوپ سپورتشى دزيۋدو (11 ادام), جەڭىل اتلەتيكا (10) جانە دجيۋ-دجيتسۋدان (9) قاتىسادى.

ءبىزدىڭ جەتىستىكتەرىمىز قازاقستان سپورتشىلارى يسلام ىنتىماقتاستىعى ويىندارىنىڭ تاريحىندا جالپى 134 مەدال جەڭىپ العان: 42 التىن، 36 كۇمىس جانە 56 قولا. التىن مەدال سانى بويىنشا كوشباسشى سپورت ءتۇرى — ءجۇزۋ (17 التىن). ودان كەيىن اۋىر اتلەتيكا (8), ۆەلوترەك (5), كيكبوكسينگ (4), بوكس (2), گيمناستيكا (2), كاراتە (2), جەڭىل اتلەتيكا (1) جانە كۇرەس (1) تۇرلەرى كەلەدى. 2021 جىلى تۇركيانىڭ كونيا قالاسىندا وتكەن سوڭعى ويىنداردا قازاقستان قۇراماسى 27 التىن، 23 كۇمىس جانە 39 قولا مەدال جەڭىپ الىپ، جالپىكوماندالىق ەسەپتە بەسىنشى ورىنعا يە بولدى.

Abai.kz