ۆاشينگتوندا ورتالىق ازيا ەلدەرى مەن اقش كومپانيالارىنىڭ قاتىسۋىمەن «C5+1» ىسكەرلىك كونفەرەنتسياسى ءوتتى.

قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ امەريكا قۇراما شتاتتارىنا ساپارى اياسىندا ورتالىق ازيا مەن اقش اراسىنداعى سەرىكتەستىكتىڭ ون جىلدىعىنا ارنالعان «C5+1» فورماتىنداعى مەرەيتويلىق ىسكەرلىك كونفەرەنتسيا ءوتتى.

«Kennedy Center for the Performing Arts» ورتالىعىندا وتكەن ءىس-شاراعا قازاقستان، قىرعىزستان، تاجىكستان، تۇرىكمەنستان، وزبەكستان جانە اقش ۇكىمەتتەرى مەن ىسكەر توپتارىنىڭ وكىلدەرى قاتىستى. كونفەرەنتسيانىڭ نەگىزگى تاقىرىبى ورتالىق ازيا مەن اقش اراسىنداعى ساۋدا-ەكونوميكالىق جانە ينۆەستيتسيالىق بايلانىستاردى كەڭەيتۋ بولدى.

كونفەرەنتسيا جۇمىسىنا "سامۇرىق-قازىنا" اق، "بايتەرەك" ۇبح" اق، "KAZ Minerals", "Qarmet", "Freedom Holding Corp.", "Bilim Media Group", احقو، "تاۋ-كەن سامۇرىق" جانە "Port Kuryk" (Semurg Invest) سياقتى مەملەكەتتىك جانە جەكە قۇرىلىمداردىڭ باسشىلارى قاتىستى.

ءىس-شارا بارىسىندا اقش ينۆەستيتسيالارىن قازاقستان مەن ورتالىق ازيانىڭ ينفراقۇرىلىمدىق، ەنەرگەتيكالىق جانە يننوۆاتسيالىق جوبالارىنا تارتۋ، سيرەك كەزدەسەتىن مەتالدار مەن مەتالل ونىمدەرىن جانە اگروونىمدەردى اقش نارىعىنا ەكسپورتتاۋ، سونداي-اق تسيفرلىق جانە قارجىلىق تەحنولوگيالاردى دامىتۋ ماسەلەلەرى تالقىلاندى.

فورۋم بەس تاقىرىپتىق سەسسيادان تۇردى، ولار جەتكىزۋ تىزبەكتەرىن دامىتۋ، جاساندى ينتەللەكتتى پايدالانۋ، تسيفرلىق ەكونوميكا جانە اقش پەن ورتالىق ازياعا ينۆەستيتسيالار سالۋ ماسەلەلەرىنە ارنالدى.

قازاقستان تسيفرلىق ەكونوميكانى دامىتۋ بويىنشا سەسسيانىڭ تەڭ توراعاسى بولدى. وندا تسيفرلاندىرۋدىڭ كەلەشەگى، جاساندى ينتەللەكتتى ەنگىزۋ، كيبەرقاۋىپسىزدىك جانە ترانسشەكارالىق ونلاين-قىزمەتتەردى دامىتۋ ماسەلەلەرى تالقىلاندى. قازاقستان تاراپىنان سەسسيا جۇمىسىنا «Kaspi.kz»، «ERG»، «BTS Digital»، «Air Astana» جانە باسقا دا كومپانيالار قاتىستى.

سەسسيا قاتىسۋشىلارى قازاقستاننىڭ ەۋرازيا IT-حابى رەتىندەگى بەدەلى ارتىپ كەلە جاتقانىن اتاپ ءوتتى. ەلدە قازىردىڭ وزىندە "Microsoft", "Amazon", "Nvidia" جانە "Starlink" سياقتى جەتەكشى تەحنولوگيالىق كومپانيالار جۇمىس ىستەيدى، ال "Meta" جانە "Amazon" كومپانيالارىمەن بىرلەسكەن باستامالار سپۋتنيكتىك ينتەرنەتتى دامىتۋ مەن قازاق تىلىندەگى جاساندى ينتەللەكت مودەلىن قۇرۋعا باعىتتالعان.

پانەلدىك تالقىلاۋلار بارىسىندا استانا ۆاشينگتوننىڭ ورتالىق ازياداعى نەگىزگى ساۋدا-ەكونوميكالىق سەرىكتەسى ەكەنى اتالىپ ءوتتى: ەل ءوڭىردىڭ جالپى ىشكى ءونىمىنىڭ 60%-نان استامىن جانە اقش-پەن تاۋار اينالىمىنىڭ 75%-ىن قامتاماسىز ەتەدى. تاۋەلسىزدىك جىلدارى قازاقستان ەكونوميكاسىنا 100 ملرد دوللاردان استام امەريكالىق ينۆەستيتسيالار تارتىلدى، بۇل وڭىرگە سالىنعان جالپى ينۆەستيتسيا كولەمىنىڭ 80%-دان استامىن قۇرايدى.

سونىمەن قاتار كونفەرەنتسيادا قازاقستاندىق بيزنەستىڭ اقش-تاعى ينۆەستيتسيالىق باستامالارى دا تالقىلاندى. «1Thirty Holding» كومپانياسى قۇنى 130 ملن دوللار قۇرايتىن ۇنتاق جابىندار شىعاراتىن حيميالىق كەشەننىڭ قۇرىلىسىن ۇسىندى – بۇل اقش-تاعى قازاقستاننىڭ العاشقى ونەركاسىپتىك ينۆەستيتسيالىق جوباسى بولماق. سونداي-اق «abr+» كومپانياسى اقش-تا «AUYL» مەيرامحانالار جەلىسىن اشۋ جوسپارى تۋرالى حابارلادى.

مەملەكەت باسشىسىنىڭ اقش-قا ساپارى قورىتىندىسى بويىنشا ەكى ەل اراسىندا جالپى سوماسى شامامەن 17 ملرد دوللار قۇرايتىن 29 ەكىجاقتى قۇجاتقا قول قويىلدى. ولار ونەركاسىپ، ەنەرگەتيكا، ءبىلىم بەرۋ، تسيفرلاندىرۋ جانە يننوۆاتسيالار سالالارىن قامتيدى. بۇل كەلىسىمدەر ستراتەگيالىق سەرىكتەستىكتى نىعايتۋ مەن ەكى ەل اراسىنداعى ەكونوميكالىق ىنتىماقتاستىقتى تەرەڭدەتۋدىڭ ماڭىزدى قادامى بولدى.

Abai.kz