قاراعاندى وبلىسىندا اۋىل شارۋاشىلىعى قارقىندى دامىپ، ءوڭىردىڭ ازىق-تۇلىك قاۋىپسىزدىگىن قامتاماسىز ەتۋگە ەرەكشە نازار اۋدارىلۋدا. اگرارلىق سەكتورعا سالىنعان ينۆەستيتسيا كولەمى ەكى ەسەگە ءوسىپ، 44 ميلليارد تەڭگەگە جەتتى. بيىلدىڭ وزىندە 18 جوبا ىسكە قوسىلعان. بۇل تۋرالى وبلىس اكىمى ەرماعانبەت بولەكپاەۆ پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە ايتتى.

– باعانىڭ ءوسۋىن تەجەۋ ءۇشىن جەرگىلىكتى وندىرۋشىلەرمەن فورۆاردتىق كەلىسىمشارتتار جاساسىپ، نان ءپىسىرۋ كاسىپورىندارىن قولداپ، الەۋمەتتىك پاۆيلوندار اشىپ جاتىرمىز. وندا فەرمەرلەر ءوز ونىمدەرىن دەلدالسىز، تەگىن بەرىلگەن ساۋدا ورىندارىندا تىكەلەي ساتا الادى. ءبىر پاۆيلون اشىلدى، تاعى ەكەۋىنىڭ قۇرىلىسى ءجۇرىپ جاتىر. بۇل – قالا تۇرعىندارى ءۇشىن ساپالى ءارى قولجەتىمدى ءونىم الۋ مۇمكىندىگى، ال فەرمەرلەر ءۇشىن وتكىزۋ نارىعىن كەڭەيتۋگە جول اشاتىن ءتيىمدى الاڭ، – دەدى ءوڭىر باسشىسى.

اكىمنىڭ ايتۋىنشا، وبلىستا ەگىس القاپتارىن ءارتاراپتاندىرۋ جۇمىستارى جۇرگىزىلۋدە. بيىل ازىقتىق داقىلداردىڭ كولەمى 30 پايىزعا ارتسا، مايلى داقىلدار القابى ەكى ەسەگە ۇلعايعان.

(سۋرەت:https://www.gov.kz/)

وڭىردە ءسۇت ونىمدەرىنە دەگەن ىشكى سۇرانىستى جابۋ باستى ماقساتتاردىڭ ءبىرى بولىپ وتىر. نۇرا اۋدانىندا 1100 باسقا ارنالعان ءسۇت-تاۋارلى فەرما ىسكە قوسىلىپ، جىلىنا 9 مىڭ توننا ءسۇت وندىرەدى.

ال وساكاروۆ اۋدانىندا 6 مىڭ باسقا ارنالعان ءىرى فەرما سالىنۋدا، ول جىل سايىن 55 مىڭ توننا ءونىم ءوندىرۋدى قامتاماسىز ەتەدى.

ەرماعانبەت بولەكپاەۆ Saumal Biotech كاسىپورنىن مىسال رەتىندە كەلتىرىپ، ونىڭ بيە مەن تۇيە سۇتىنەن جاسالاتىن ليوفيلدەنگەن قوسپالار مەن مال ازىعىن وندىرەتىنىن اتاپ ءوتتى.

– وتكەن جىلدان باستاپ بۇل زاۋىت ءونىمىن اقش-قا ەكسپورتتاپ، قىتايمەن دە سەرىكتەستىك ورناتتى. بۇل – قازاقستاندىق ءونىمنىڭ شەتەلدىك نارىقتا باسەكەگە قابىلەتتى ەكەنىن جانە جوعارى سۇرانىسقا يە ەكەنىن دالەلدەيدى، – دەدى ايماق باسشىسى.

جالپى، اگروونەركاسىپتىك سەكتوردا 47 ميلليارد تەڭگەگە 31 جوبا جۇزەگە اسىرىلماق، سونىڭ ناتيجەسىندە 300-گە جۋىق جاڭا جۇمىس ورنى اشىلادى.

Abai.kz