قازاقستان پرەزيدەنتى قاسىم-جومارت توقاەۆ بۇگىن جاساندى زەردەگە قاتىستى 2 زاڭعا قول قويدى.

ونىڭ ءبىرىنشىسى: «جاساندى ينتەللەكت تۋرالى» قازاقستان رەسپۋبليكاسىنىڭ زاڭى.

زاڭ ارقىلى جاساندى ينتەللەكت جۇيەلەرى قىزمەتىنىڭ نەگىزگى قاعيداتتارى ەنگىزىلدى. جاساندى ينتەللەكت جۇيەلەرى اقپاراتتاندىرۋ نىسانى رەتىندە انىقتالدى. ەندى جاساندى ينتەللەكت ادامنىڭ بەلگىلى ءبىر مىندەتتەردى ورىنداۋ قۇرالى رەتىندە قاراستىرىلادى.

وسىنى ەسكەرە وتىرىپ، زاڭدا جاۋاپكەرشىلىك جانە باقىلاۋ قاعيداتتارى بەكىتىلدى. سوعان سايكەس، مەنشىك يەلەرى مەن پايدالانۋشىلار جاساندى ينتەللەكت جۇيەلەرىن قولدانۋ كەزىندە ءوزىنىڭ اتقاراتىن رولىنە قاراي جاۋاپ بەرەدى. مەنشىك يەلەرى مەن پايدالانۋشىلارعا جاساندى ينتەللەكت جۇيەلەرىنىڭ جۇمىس ىستەۋى ماسەلەلەرى بويىنشا تاۋەكەلدەردى باسقارۋ، قاۋىپسىزدىك پەن سەنىمدىلىكتى قامتاماسىز ەتۋ، قولداۋ كورسەتۋ مىندەتتەرى جۇكتەلگەن.

سونىمەن قاتار زاڭدىلىق، ادىلەتتىلىك، تەڭدىك، اشىقتىق جانە تۇسىنىكتىلىك، ادام يگىلىگىنە باسىمدىق بەرۋ، ونىڭ شەشىم قابىلداۋداعى ەركىندىگى، دەرەكتەردى قورعاۋ جانە قۇپيالىلىق، قاۋىپسىزدىك پەن قورعانىس قاعيداتتارى بەكىتىلدى.

جەكە جانە زاڭدى تۇلعالاردىڭ قۇقىقتارىن قورعاۋ، سونداي-اق قۇقىقتىق ءتارتىپتى قامتاماسىز ەتۋ ماقساتىندا قازاقستان رەسپۋبليكاسىنىڭ اۋماعىندا بىرقاتار مۇمكىندىكتەرگە يە جاساندى ينتەللەكت جۇيەلەرىن قۇرۋعا جانە پايدالانۋعا تىيىم سالىندى (تۇپسانالىق، مانيپۋلياتسيالىق نەمەسە جەكە دەرەكتەر تۋرالى زاڭنامانى بۇزۋ ارقىلى جەكە دەرەكتەردى جيناۋ جانە وڭدەۋ ادىستەرىن قولدانۋ; باسقا دا مۇمكىندىكتەر).

جاساندى ينتەللەكتىنى قولدانۋ ناتيجەسىندە جاسالعانىنان حاباردار بولۋ ءۇشىن مۇنداي تاۋارلاردى، جۇمىستاردى جانە كورسەتىلەتىن قىزمەتتەردى تاڭبالاۋ تالابى ەنگىزىلدى. جاساندى ينتەللەكت جۇيەلەرىن جاساۋعا جانە ۇدەمەلى دامىتۋعا ارنالعان پلاتفورمالار قۇرۋدىڭ الەمدىك تاجىريبەسىن ەسكەرە وتىرىپ، ۇلتتىق جاساندى ينتەللەكت پلاتفورماسىنىڭ قىزمەتىنە قاتىستى زاڭنامالىق نەگىزدەر قالىپتاستىرىلدى.

پلاتفورما شەكتەۋلى مەرزىم ىشىندە باعدارلامالىق ونىمدەردى، جاساندى ينتەللەكت مودەلدەرىن ازىرلەۋگە، وقىتۋعا جانە سىناقتان وتكىزۋگە پايدالانىلادى.

ەكىنشىسى: «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جاساندى ينتەللەكت جانە تسيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭى.

زاڭعا ەنگىزىلگەن تۇزەتۋلەردىڭ ءبىرىنشى بلوگى زاڭنامالىق اكتىلەردى «جاساندى ينتەللەكت تۋرالى» زاڭمەن سايكەستەندىرۋگە باعىتتالعان. تۇزەتۋلەردىڭ ەكىنشى بلوگى زاڭنامانى وزگە ماسەلەلەر بويىنشا جەتىلدىرۋدى كوزدەيدى.

زاڭ قامتاماسىز ەتىلمەگەن تسيفرلىق اكتيۆتەردىڭ قازاقستان رەسپۋبليكاسىنىڭ اۋماعىنداعى اينالىمىن رەتتەيدى. بۇعان دەيىن قامتاماسىز ەتىلمەگەن تسيفرلىك اكتيۆتەردىڭ اينالىمى تەك «استانا» حالىقارالىق قارجى ورتالىعىنىڭ (احقو) اۋماعىندا عانا رۇقسات ەتىلگەن ەدى.

ازاماتتاردىڭ جەكە دەرەكتەرىن قورعاۋ امالدارىن كۇشەيتۋ ماقساتىندا جەكە دەرەكتەردى وڭدەۋگە كەلىسىم بەرۋ مەرزىمىنە قاتىستى تالاپ ەنگىزىلدى. ەندى بۇل مەرزىم جەكە دەرەكتەردى جيناۋ جانە وڭدەۋ ماقساتىنا جەتۋ ءۇشىن قاجەتتى مەرزىمنەن اسپاۋعا ءتيىس. سۋبەكت نەمەسە ونىڭ زاڭدى وكىلى يەسىن، وپەراتوردى، ءۇشىنشى تاراپتى ەسكەرتىپ، جەكە دەرەكتەردى جيناۋعا، وڭدەۋگە بەرگەن كەلىسىمىن قايتارىپ الۋعا قۇقىلى.

ىشكى بولشەك ساۋدا سۋبەكتىلەرى ءۇشىن يدەنتيفيكاتسيالىق قۇرالداردى وقيتىن باقىلاۋ-كاسسا ماشينالارىن پايدالانۋ ارقىلى وپەراتسيالاردى ەسەپكە الۋ جونىندە تالاپ قويا وتىرىپ، تاۋارلاردى تاڭبالاۋ مەحانيزمى جەتىلدىرىلدى.بىرقاتار تۇزەتۋلەر ناتيجەسىندە اقپاراتتىق قاۋىپسىزدىكتى قامتاماسىز ەتۋ تالاپتارى كۇشەيتىلدى.

زاڭداردىڭ ءماتىنى باسپاسوزدە جاريالانادى.

Abai.kz