الماتىدا سوڭعى ون جىلدا تۇرعىن ءۇي باعاسى ەكى ەسەگە جۋىق ءوستى. بۇرىن مەگاپوليستىڭ جوعارعى بولىگىندە 2 بولمەلى پاتەردى 11,6–12,8 ملن تەڭگەگە ساتىپ الۋعا بولاتىن.

قازاقستاندا تۇرعىن ءۇي باعاسى تۇراقتى تۇردە ءوسىپ كەلەدى. ماسەلەن، قازان ايىنىڭ قورىتىندىسى بويىنشا ەلدەگى العاشقى نارىقتاعى ءبىر شارشى مەتردىڭ ورتاشا قۇنى جىلىنا 12,5%-عا، ال قايتالاما نارىقتا 10,2%-عا قىمباتتاعان.

ۇزاعىراق كەزەڭدى العاندا، باعانىڭ ءوسۋى ودان دا ايقىن بايقالادى. “كرىشا” پورتالىنىڭ مالىمەتىنشە، اسىرەسە بۇل ءۇردىس الماتىدا ايتارلىقتاي بايقالادى.

مەگاپوليستە سوڭعى ون جىلدا قايتالاما نارىقتاعى تۇرعىن ءۇي باعاسى شامامەن ەكى ەسەگە وسكەن. 2015 جىلعى قاراشادا مۇندا ءبىر شارشى مەتردىڭ ورتاشا قۇنى 433 070 تەڭگەنى قۇرادى. ول كەزدە وربيتا شاعىن اۋدانىندا 2 بولمەلى پاتەردى 11,6-12,8 ملن تەڭگەگە ساتىپ الۋعا بولاتىن.

سوڭعى ون جىلداعى ەڭ تومەن كورسەتكىش 2017 جىلعى ناۋرىزدا تىركەلدى – 346 810 تەڭگە. بۇل كەزەڭدە نارىق ەكونوميكالىق داعدارىس پەن تەڭگەنىڭ دەۆالۆاتسياسىنىڭ سالدارىن سەزىنىپ جاتقان ەدى. ال قازىر الماتىداعى ەكىنشى نارىقتاعى ۇيلەردىڭ ءبىر شارشى مەترىنىڭ ورتاشا باعاسى 803 380 تەڭگەگە جەتتى. بۇل سوڭعى ون جىلداعى ءابسوليۋتتى ماكسيمۋم.

تۇرعىن ءۇي باعاسى ەلدىڭ باسقا قالالارىندا دا ءوستى، الايدا الماتىداعىداي قارقىندى ەمەس.

مىسالى، استانادا 2015 جىلعى قاراشا ايىنىڭ سوڭىندا قايتالاما نارىقتاعى ءبىر شارشى مەتردىڭ باعاسى 404 980 تەڭگە بولسا، قازىرگى ۋاقىتتا 568 530 تەڭگەنى قۇراپ وتىر. ەڭ تومەن باعا 2017 جىلعى شىلدەدە تىركەلگەن – 308 070 تەڭگە.

Abai.kz