كەلەسى جىلى يتاليانىڭ ميلان جانە كورتينا-د’امپەتستسو قالالارىندا XXV قىسقى وليمپيا ويىندارى وتەدى. ءتورت جىلدىڭ باستى دوداسى 2026 جىلدىڭ 6-22 اقپان كۇندەرىنە جوسپارلانعان. اق قار، كوك مۇز ۇستىندەگى بايراقتى باسەكەگە قازاقستان قۇراماسىنىڭ سپورتشىلارى دا قاتىسادى.

ەل قۇراماسىنىڭ قىسقى وليمپيا ويىندارىنداعى تاريحىنا توقتالساق، قازاقستان سپورتشىلارى تاۋەلسىز مەملەكەت رەتىندە قىسقى وليمپياداعا 1994 جىلدان بەرى تۇراقتى تۇردە قاتىسىپ كەلەدى. كەلەسى جىلى وتاندىق سپورتشىلار ەل تاريحىنداعى توعىزىنشى قىسقى وليمپيادادا ونەر كورسەتپەك.

جەرلەستەرىمىز 1994 جىلى نورۆەگيانىڭ ليللەحامەر قالاسىندا وتكەن قىسقى وليمپياداعا تۇڭعىش رەت قاتىسىپ، تابىستى ونەر كورسەتتى. قازاقستان سپورتشىلارى ءبىر التىن جانە ەكى كۇمىس مەدال يەلەنىپ، جالپىكوماندالىق ەسەپتە 12-ورىنعا تابان تىرەدى. ءۇش جۇلدەنى دە ەل قورجىنىنا شاڭعىشى ۆلاديمير سميرنوۆ سالدى. اتالعان وليمپيادادا قازاقستاننىڭ 29 سپورتشىسى سپورتتىڭ سەگىز تۇرىنەن باق سىناعان ەدى.

اراعا ءتورت جىل سالىپ سپورتشىلارىمىز جاپونيانىڭ ناگانو قالاسىندا وتكەن اق وليمپيادادا باق سىنادى. سپورتتىڭ سەگىز تۇرىنەن 60 سپورتشى قاتىسقان بايراقتى باسەكەدە وتانداستارىمىز ەكى قولا جۇلدەنى قاناعات تۇتتى. بۇل جولى دا شاڭعىشى ۆلاديمير سميرنوۆ ۇزدىكتەر قاتارىنان كورىنىپ، قولا جۇلدەگەر اتاندى. ال ەكىنشى قولانى كونكيمەن جۇگىرۋ سپورتىنىڭ وكىلى ليۋدميلا پروكاشەۆا يەلەندى. جالپىكوماندالىق ەسەپتە قازاقستان 20-ورىننان كورىندى.

(سۋرەت.me/Turizm_jane_sport_ministrligi)

2002 جانە 2006 جىلعى قىسقى وليمپيادا اقش-تىڭ سولت-لەيك-سيتي جانە يتاليانىڭ تۋرين قالاسىندا ءوتتى. مۇحيتتىڭ ارعى بەتىندەگى ويىندارعا قازاقستان قۇراماسىنان 52 سپورتشى، تۋريندەگى باسەكەگە 43 سپورتشى قاتىستى. وكىنىشكە قاراي، ەكى وليمپيادادا دا جۇلدە بۇيىرمادى.

2010 جىلى ۆانكۋۆەردە (كانادا) وتكەن وليمپيادادا 37 سپورتشىمىز باق سىناپ، ءبىر كۇمىس جۇلدە يەلەندى. بياتلون باسەكەسىندە ونەر كورسەتكەن ەلەنا حرۋستالەۆا جەكەلەي سايىستا مارە سىزىعىن ەكىنشى بولىپ كەسىپ، كۇمىس مەدال ەنشىلەدى. باس جۇلدەنى نورۆەگيالىق تۋرا بەرگەر جەڭىپ العان بولسا، قولا جۇلدە ايگىلى بياتلون شەبەرى داريا دومراچەۆاعا (بەلارۋس) بۇيىرعان ەدى.

2014 جىلعى رەسەيدىڭ سوچي قالاسىندا جالاۋى جەلبىرەگەن وليمپيادادا قازاقستان قۇراماسىنان 51 سپورتشى باق سىناپ، سونىڭ بىرەۋى جۇلدەگەرلەر قاتارىنان كورىندى. اتاپ ايتقاندا، وليمپيادانىڭ سوڭعى كۇندەرىندە مۇز ايدىنعا شىققان مانەرلەپ سىرعاناۋ وكىلى دەنيس تەن قولا جۇلدەگە قول جەتكىزىپ، وتاندىق جانكۇيەرلەرگە زور قۋانىش سىيلادى.

2018 جىلعى وليمپيادا كورەيا رەسپۋبليكاسىنىڭ پحيونچحان قالاسىندا ۇيىمداستىرىلىپ، جارىسقا قازاقستان قۇراماسى ساپىنان 44 سپورتشى قاتىستى. بۇل وليمپيادادا قازاقستان قۇراماسىنىڭ قورجىنى بوس قايتقان جوق. فريستايل-موگۋل وكىلى يۋليا گالىشەۆا 77,40 ۇپاي جيناپ، پحيونچحان وليمپياداسىنىڭ قولا جۇلدەگەرى اتاندى.

ازىرگە ەڭ كەيىنگى وليمپيادا 2022 جىلى قىتايدىڭ بەيجىڭ قالاسىندا ءوتتى. بۇل دوداعا قازاقستان قۇراماسىنان 34 سپورتشى (17 ەر، 17 ايەل) قاتىستى. بۇعان دەيىنگى سولت-لەيك-سيتي (اقش) جانە تۋرين (يتاليا) وليمپيادالارى سەكىلدى، بۇل باسەكەدە دە وتانداستارىمىز جۇلدەسىز قالدى. دەگەنمەن، وليمپيادا جۇلدەسىنە ەڭ جاقىن بولعان شورت-ترەكشى ابزال اجعاليەۆ ەدى. ول 500 مەتر قاشىقتىقتا ءتورتىنشى ورىن الىپ، جۇلدەگە سىنىق سۇيەم جەتپەي قالدى. سونداي-اق ارالاس ەستافەتاداعى وتاندىق شورت-ترەك كومانداسى (ابزال اجعاليەۆ، دەنيس نيكيشا، ولگا تيحونوۆا، يانا حان) بەسىنشى ورىن الدى.

بۇگىندە قازاقستاندا قىسقى وليمپيادالىق سپورتتىڭ 13 ءتۇرى دامىپ كەلەدى. ەلدە قىسقى سپورتپەن 139 مىڭعا جۋىق ادام شۇعىلدانادى. 1 838 جاتتىقتىرۋشى جۇمىس ىستەيدى. قىسقى سپورت ينفراقۇرىلىمىن دامىتۋ جانە كادر دايارلاۋ جۇمىستارى جامبىل وبلىسىنان باسقا بارلىق وڭىردە جۇرگىزىلۋدە.

Abai.kz