اقش پەن ۇلىبريتانيا سانكتسيالارىنا ىلىنگەن رەسەيلىك «لۋكويل» قازاقستانداعى قالامقاس-تەڭىز جانە حازار مۇناي كەن ورىندارىن دامىتۋ جوباسىنان باس تارتقان بولىپ كورىنەدى، دەپ حابارلايدى Ulysmedia.kz.

مۇناي-گاز سالاسىنىڭ ساراپشىسى نۇرلان جۇماعۇلوۆ Telegram-ارناسىندا «قازمۇنايگاز» «Kalamkas — Khazar Operating» جشس قىزمەتكەرلەرىن باسقا زاڭدى تۇلعاعا كوشىرۋدى جوسپارلاپ وتىرعانىن جازدى.

— «قمگ ينجينيرينگ» كومپانياسىنىڭ جوبانىڭ دەتالدى ينجينيرينگىن دامىتاتىن قىزمەتكەرلەرى 2026 جىلعى 1 قاڭتاردان باستاپ جوبادان الىنادى. «Kalamkas — Khazar Operating» كومپانياسىنىڭ كەيبىر قىزمەتكەرلەرى 1 قاڭتاردان باستاپ جاڭا سەرىكتەسپەن كەلىسىم جاسالعانعا دەيىن «قازمۇنايگازدىڭ» بىربىرىككەن ەنشىلەس كومپانياسىنا ۋاقىتشا اۋىسادى، — دەيدى نۇرلان جۇماعۇلوۆ.

جاڭا سەرىكتەس كىم بولاتىنى ازىرگە بەلگىسىز. مۇمكىن، جوبانىڭ جاڭا ينۆەستورى قىتاي كومپانياسى بولۋى مۇمكىن. ساراپشىنىڭ ايتۋىنشا، جوبا پەرسپەكتيۆالى: كەن ورىندارىندا جاڭا مۇناي قۇرىلىمدارى تابىلعان، ال الىناتىن قور كولەمى قايتا قارالعان جانە ارتتىرىلعان. جەلتوقسان ايىندا «قالامقاس — حازار» جوباسى بويىنشا 6,5 ملرد دوللاردان استام ينۆەستيتسيالىق شەشىم قابىلداۋ جوسپارلانعان بولاتىن. الايدا «لۋكويلعا» سالىنعان سانكتسيالار بۇل جوسپارلارعا كەدەرگى بولدى. بۇرىن ەنەرگەتيكا ءمينيسترى ەرلان اقكەنجەنوۆ قازاقستان ۇكىمەتى «لۋكويلدىڭ» اكتيۆتەرىن ساتىپ الۋدى جوسپارلامايتىنىن ايتقان.

Abai.kz