وقۋ-اعارتۋ ءمينيسترى جۇلدىز سۇلەيمەنوۆا ماجىلىستە ەلدەگى جەكەمەنشىك رەپەتيتورلىق ورتالىقتار تۋرالى ايتتى.

ءماجىلىس دەپۋتاتى نارتاي ارالبايۇلى بالالارى ءتۇرلى كۋرستارعا بارىپ، اقشاسىن قايتارا الماي، الدانىپ قالعان ازاماتتاردىڭ جانايقايىن جەتكىزدى. وقۋشىلاردى دايىندايتىن Tesla Education جەكەمەنشىك ورتالىقتاردىڭ جۇمىسىن جۇيەلەۋ ءۇشىن ولارعا رۇقسات بەرۋ تەتىكتەرىن قاتاڭداتۋ ءۇشىن قانداي شارالار قولدانىلىپ جاتقانىن سۇرادى. بۇرىنعى "ارت-سپورت",  قازىرگى "دامۋ بالا" مەملەكەتتىك باعدارلاماسىنىڭ اۋىل بالالارىنا قولجەتىمسىز ەكەنىن دە ايتتى.  دەپۋتات وقۋ-اعارتۋ مينيسترىنەن ونى باقىلاۋ ءۇشىن قوسىمشا قانداي تەتىكتەرى بار ەكەنىن ءتۇسىندىرۋدى سۇرادى.

Tesla Education-گە بايلانىستى ماسەلە قازىرگى تاڭدا اتا-انالار تاراپىنان وزەكتى. وزدەرىڭىزگە بەلگىلى، مۇنداي قوسىمشا بەرۋ ۇيىمدارىنىڭ جۇمىسى كاسىپكەرلىك كودەكسىنىڭ اياسىندا رەتتەلەدى. وعان وقۋ-اعارتۋ مينيسترلىگىنىڭ، جەرگىلىكتى اتقارۋشى بيلىك ورگاندارىنىڭ ەشقانداي قاتىسى جوق جانە بۇل اتا-انالار مەن وسى جەكەمەنشىك رەپەتيتورلىق ورتالىقتار اراسىنداعى ازاماتتىق-قۇقىقتىق قاتىناستارعا سايكەس جۇمىس ىستەيدى. بىراق وقۋشىلارىمىز بولعاندىقتان، اتا-انالاردىڭ جانايقايىن ەستىگەندىكتەن بۇگىنگى تاڭدا ءبىز «ءبىلىم تۋرالى» زاڭعا، سونىمەن قاتار كاسىپكەرلىك كودەكسكە، ونىڭ ىشىندە الاياقتىقتى بولدىرماۋعا بايلانىستى زاڭ نورمالارىن قاتاڭداتۋعا بايلانىستى نورمالاردى قاراستىرىپ باستادىق، - دەپ ءتۇسىندىردى ۆەدومستۆو باسشىسى.

ايتۋىنشا، مينيسترلىكتىڭ ەشكىمدى اقىلى ورتالىقتارعا بارۋعا شەكتەۋگە قۇقىعى جوق.

ەكىنشى ماسەلە، نوبد اقپاراتتىق جۇيەسى بار. وسى اقپاراتتىق جۇيەدە قوسىمشا ءبىلىم بەرۋگە باراتىن بالالارىمىزدى، ونىڭ ىشىندە ءسىز ايتىپ وتىرعان جەكەمەنشىك رەپەتيتورلىق ورتالىققا باراتىن وقۋشىلاردى جالپىلاۋ تەتىگى دە بۇرىن بولماعان. سونى قازىر قولعا الىپ، ەنگىزىپ باستادىق. ءبىر نارسەنى اتاپ وتكىم كەلەدى. ءبىز ازاماتتارىمىزدى رەپەتيتورلىق ورتالىققا بارما دەپ شەكتەي المايمىز. بۇل ولاردىڭ قۇقىعى. رەپەتيتورلىق ورتالىق – ول ينتەللەكتۋالدىق قۇقىق، كونستيتۋتسيالىق قۇقىعى. بىراق دەسە دە، مەكتەپتەگى ءبىلىم ساپاسىن ارتتىرۋعا بايلانىستى وقۋ-اعارتۋ مينيسترلىگى كەشەندى جۇمىستى باستادى. ونىڭ ىشىندە، قاي سىنىپتا، قاي پاندە بالالارىمىز قينالىپ ءجۇر، وعان ساباق بەرىپ جاتقان مۇعالىمدەردە قانداي پروبەلدار بار. وسى جۇمىستاردى باستاپ كەتتىك. سوندىقتان اتالعان ماسەلەنىڭ شەشىمى – ءبىزدىڭ باقىلاۋدا، - دەدى جۇلدىز سۇلەيمەنوۆا.

Abai.kz