10-11 جەلتوقسان كۇندەرى استاناعا يران يسلام رەسپۋبليكاسىنىڭ پرەزيدەنتى ماسۋد پەزەشكيان رەسمي ساپارمەن كەلەدى دەپ حابارلايدى اقوردا ءباسپاسوزى.

حابارلامادا: «ساپار بارىسىندا تاراپتار جوعارى دەڭگەيدەگى كەلىسسوزدەر جۇرگىزىپ، ساۋدا-ەكونوميكالىق، كولىك-لوگيستيكا جانە مادەني-گۋمانيتارلىق سالالارداعى قازاق-يران ىنتىماقتاستىعىن ودان ءارى نىعايتۋ ماسەلەلەرىن تالقىلايدى»، - دەلىنگەن.

قازاقستان تاۋەلسىزدىك العالى بەرى يرانمەن ساياسي، ەكونوميكالىق بايلانىستى ۇزدىكسىز نىعايتىپ كەلەدى.

وتكەن قازان ايىنىڭ سەگىزىندە مۇناي قورى مول كاسپي تەڭىزىندە ورتاق ۇلەسى بار قازاقستان، يران، رەسەي، ازەربايجان – 4 ەل «كاسپي تەڭىزىندە ستراتەگيالىق ارىپتەستىكتى كۇشەيتۋ» كەلىسىم-شارتىنا قول قويدى. اتالعان قۇجات بويىنشا «كاسپي تەڭىزى جاعالاۋ ەلدەرىنىڭ ىشكى ىسىنە سىرت ەلدەر ارالاسا المايدى. ماسەلە تۋىنداسا ءتورت تاراپ ءوزارا تالقىلاپ بارىپ شەشىم قابىىلدايدى» دەلىنگەن.

سوڭعى مالىمەت بويىنشا 2025-جىلى ناۋرىزدىڭ 21-نەن ماۋسىمنىڭ 21-نە ءدايىن يراننىڭ قازاقستاننان يمپورتى مەن ەكسپورتى جەكە-جەكە 9 ميلليون، 53 ميلليون دوللاردى قۇراعان. پارسى ەلى قازاقستاننان بيداي، كۇرىش قاتارلى ءداندى داقىلدار مەن مالشارۋاشىلىق ونىمدەرىن ساتىپ الادى.

پرەزيدەنت توقاەۆ قاراشا ايىنىڭ باسىنداعى اقش-قا ساپارىندا ترامپتىڭ يزرايل مەن ماڭايىنداعى اراب ەلدەرىن تاتۋلاستىرۋعا باعىتتالعان «يبراھيم كەلىسىمىنە» قول قويعانى بەلگىلى. كوپتەگەن ەلدەردىڭ باسىلىمدارى ونى ءىلىپ اكەتىپ «قازاقستان يراننىڭ شامىنا ءتيدى»، «ورتا ازيانى گەوساياسي كوكپارعا سالدى» دەپ دابىرايتىپ جازعان ەدى.

يران پرەزيدەنتىنىڭ ەلىمىزگە جاسايتىن الداعى ساپارى سونىڭ ءبارىنىڭ ويجوتا، سىرتتاي تون ءپىشۋ ەكەنىن ايقىن كورسەتىپ بەرەتىندەي.

Abai.kz