كەشە اقش پرەزيدەنتى دونالد ترامپ بەيبىت كەلىسسوزدەر ماسەلەسىندە اقش ۇسىنعان شارتتارعا ۋكراينا پرەزيدەنتى كونبەي وتىرعانىن ايتتى.

ترامپ: «ءبىز پرەزيدەنت پۋتينمەن سويلەستىك، ءبىز ۋكراين باسشىلارىمەن جانە زەلەنسكيمەن سويلەستىك. مەنىڭ كىشكەنە كوڭىلىم تۇسكەنىن ايتۋىم كەرەك، ويتكەنى پرەزيدەنت زەلەنسكي بەيبىت جوسپارمەن ءالى تولىق تانىسپاعان سياقتى. ول جايلى مەن بىرنەشە ساعات بۇرىن ءبىلدىم. بۇل جوسپار ونىڭ ادامدارىنا ۇنايدى، بىراق وعان ۇنامايدى. رەسەي ول ەلدى (ۋكراينانى) تولىق الۋدى قالار ەدى، بىراق رەسەيگە قازىرگى ۇسىنىلعان جوسپار ۇناۋدا. بىراق بۇل جوسپار زەلەنسكيگە ۇنايتىنىنا كۇماندىمىن. ونىڭ ادامدارىنا ۇناپ تۇر. ال ول بۇل جوسپارمەن ءالى تولىق تانىسپاعان سياقتى»، - دەيدى.

ۋكراينا پرەزيدەنتى زەلەنسكي كەشە لوندوندا ستارمەر، مەرتس جانە ماكرون ۇشتىگىمەن كەلىسسوز وتكىزدى. وسىنىڭ الدىندا زەلەنسكي «Bloomberg» اگەنتتىگىنە سۇحبات بەردى.

زەلەنسكيدىڭ مالىمدەمەلەرى:

- بەيبىت جوسپاردىڭ بىرنەشە نۇسقاسى قارالدى. بارلىق نۇسقانىڭ ءتۇپ ماقساتى ءبىر. اۋەلدە 28 تارماق بولدى. كەيىن انتي-ۋكراينالىق تارماقتار الىنىپ، 20 تارماققا قىسقاردى، - دەدى.

- اقش-تىڭ ماقساتى ايقىن. ول - سوعىستى توقتاتۋ، - دەدى.

- باستى سۇراق - ەگەر رەسەي كەلىسىمنەن كەيىن، اراعا ۋاقىت سالىپ قايتا شابۋىلداسا نە بولماق؟ اقش پەن ەۋروپا قالاي ارەكەت ەتەدى؟، - دەدى.

- اقش كومپروميسسكە قول جەتكىزگىسى كەلەدى. بىراق، قاۋىپسىزدىك كەپىلدىگى كەرەك جانە تەرريتوريا ماسەلەسىندە مالىمە جوق، - دەدى.

- ءبىز قاۋىپسىزدىك كەپىلدىگىنە ايىرباس رەتىندە جەر بەرۋ دەگەن نۇسقاعا كەلىسە المايمىز، - دەدى.

- ۋكراينا ءوز تەرريتوريالارىن كونستيتۋتسياعا، حالىقارالىق قۇقىققا جانە مورالدىق قۇقىققا سايكەس بەرۋگە قۇقى جوق، - دەدى.

- رەسەي بىزدەن جەر بەرۋدى تالاپ ەتىپ وتىر. ءبىز جەر بەرگىمىز كەلمەيدى، سول ءۇشىن دە كۇرەسىپ جاتىرمىز، - دەدى.

- ەرتەڭ ۋكراينا-ەۋروپا بىرلەسىپ ازىرلەگەن بەيبىت جوسپار دايىن بولادى. ونى ءبىز اقش-قا جىبەرەمىز. بۇل جوسپار دا بەيبىتشىلىككە باعىتتالعان، شىنايى جوسپارلاردىڭ ءبىرى، - دەدى.

- ەۋروپانىڭ ىشىندە دە ءتۇرلى باسشىلار بار. ۋكرايناعا كومەكتى بلوكتاپ جاتقان رەسەيشىل ليدەرلەر دە، اقش-تى قولدايتىن ليدەرلەر دە جەتكىلىكتى. ولاردى سىزدەر دە بىلەسىزدەر، - دەدى.

- اقش مىقتى سەرىكتەس. پرەزيدەنت ترامپ ءسوزسىز سوعىستىڭ توقتاعانىن قالايدى. بۇل - فاكت، - دەدى.

- اقش-تىڭ كەلىسسوزدەردەن شىعىپ، بىراق ۋكرايناعا قارۋ-جاراق جەتكىزۋگە ارنالعان PURL باعدارلاماسىندا قالعانى بىزگە ءتيىمدى مە؟ جوق! ءبىز اقش-تىڭ قولداۋى ءۇشىن دە كۇرەسۋىمىز كەرەك. ال PURL - ەۋروپادا جوق، بىراق بىزگە اۋاداي قاجەت قارۋلاردى جەتكىزۋگە ارنالعان باعدارلاما. ول ءۇشىن اقش-تىڭ دا قولداۋى ماڭىزدى، - دەدى.

- زاپوروج اەس-ءى ءبىزسىز جۇمىس جاساي المايدى، - دەدى.

- كەلىسسوزدەردەگى ەڭ كۇردەلى ماسەلەلەر - دونباسس، زاپوروج اەس-ءى، اقشا مەن قاۋىپسىزدىك كەپىلدىگى، - دەدى.

- مايدانداعى احۋال شىنىندا كۇردەلى. بىراق، ۇنجىرعامىزدى تۇسىرۋگە ءالى ەرتە. ولار باسىپ الماعان اۋماقتاردى ءتۇبى ولار باسىپ الادى دەۋگە بولمايدى. ال جەر الماسۋ ماسەلەسىنە كەلسەك، ونداي ويلار ايتىلدى. بىراق، بۇلاي دۇرىس بولمايدى، - دەدى.

- رەسەي اسكەرىنىڭ ءبىر بولىگى كىرگەن سۋمسكى مەن حاركوۆتىڭ جەرلەرى بار. ولار ول جەرلەردى ۇستاپ قالا المايدى، - دەدى.

- ەگەر مايدان سىزىعىندا سوعىستى توقتاتساق، ول جەرلەردىڭ تاعدىرى نە بولماق؟ جالپى تەرريتوريا ماسەلەسى وتە كۇردەلى، - دەدى.

- رەسەي دونەتسكى وبلىسىنداعى ءبىزدىڭ باقىلاۋىمىزداعى جەرلەردى تولىق العىسى كەلەدى. بىراق، ول جەرلەر بىزدىكى. ونى جاي عانا بەرە المايمىز. ولار سول جەرلەردى الۋ ءۇشىن مايدان دالاسىندا، اقپاراتتىق الاڭداردا، ساياسي الاڭداردا قىسىمدى ارتتىرۋدا. ءبىز بارىنشا قورعانۋدامىز، - دەدى.

- ءيا، اقش بىزبەن ويىن ويناپ وتىرعان جوق. كۋشنەر بارىن سالۋدا. سيتيۆ تە بار. بارلىعى سوعىستىڭ توقتاعانىن قالايدى. ءبىز دە. بىراق، قانداي جاعدايدا، قانداي شارتتارمەن توقتايتىنى ءبىز ءۇشىن وتە ماڭىزدى، - دەدى.

Abai.kz