«قازاقمىس» كورپوراتسياسى جاڭا اكتسيونەرگە «قازاقمىس كورپوراتسياسى» جشس-عا باقىلاۋ جۇرگىزۋ قۇقىعىن وتكىزۋدى كوزدەيتىن كەلىسىمنىڭ نەگىزدەمەلىك شارتىنا قول قويىلعانىن حابارلادى.

كومپانيانىڭ ءباسپاسوز قىزمەتى اتاپ وتكەندەي، كەلىسىمگە «قازاقمىس» پرەزيدەنتى ۆلاديمير كيم مەن ديرەكتورلار كەڭەسىنىڭ توراعاسى ەدۋارد وگايدىڭ ورتاق شەشىمى بويىنشا قول قويىلدى. قۇجاتقا قول قويۋ باقىلاۋدى تاپسىرۋ پروتسەسىنىڭ باستالعانىن بىلدىرەدى. تاياۋدا بەلگىلەنگەن ءراسىم اياسىندا كەلىسىم بويىنشا بارلىق ءتيىستى ءىس-شارالار مەن مىندەتتەمەلەر جۇزەگە اسىرىلىپ، كومپانيانىڭ ۇلەسىن ساتىپ الۋ-ساتۋ كەلىسىمشارتى جاسالادى.

سونىمەن قاتار قازاقستان رەسپۋبليكاسىنىڭ زاڭنامالىق تالاپتارىنىڭ ساقتالۋىنا ەرەكشە كوڭىل بولىنەدى. سالالىق نورماعا سايكەس، تاۋ-كەن-مەتاللۋرگيا سەكتورىندا كومپانيا ۇلەسىنىڭ نە اكتسياسىنىڭ يەسىن اۋىستىرۋ ءۇشىن قازاقستان رەسپۋبليكاسى ونەركاسىپ جانە قۇرىلىس مينيسترلىگىنىڭ، سونىمەن قاتار باسەكەلەستىكتى قورعاۋ جانە دامىتۋ اگەنتتىگىنىڭ ارنايى رۇقساتىن الۋ تالاپ ەتىلەدى.

سونداي-اق سەرىكتەستەرىن، كرەديتورلاردى، مينوريتارلىق قاتىسۋشىلاردى جانە باسقا دا مۇددەلى تاراپتاردى حاباردار ەتۋ پروتسەسى جۇرگىزىلەدى. بۇل شارالار پروتسەستىڭ اشىقتىعىن، دەر كەزىندە اقپاراتتاندىرۋدى جانە بارلىق نورماتيۆتىك تالاپتاردى، ونىڭ ىشىندە كومپانيانىڭ قىزمەتىنە قاتىساتىن تۇلعالار الدىنداعى مىندەتتەمەلەردى ساقتاۋدى قامتاماسىز ەتۋگە باعىتتالعان.

— قول قويىلعان قۇجاتقا سايكەس، اكتسيونەردىڭ اۋىسۋى وندىرىستىك جانە وپەراتسيالىق پروتسەستەرگە، كەلىسىمشارتتىق مىندەتتەمەلەرگە، قىزمەتكەرلەردىڭ الەۋمەتتىك كەپىلدىكتەرىنە جانە جۇمىس ورىندارىنىڭ تۇراقتىلىعىنا اسەر ەتپەيدى. «قازاقمىستىڭ» قىزمەتى شتاتتىق رەجيمدە، ال اعىمداعى جانە پەرسپەكتيۆالىق جوبالاردى ىسكە اسىرۋ — قولدانىستاعى ستراتەگيالىق جوسپارعا ساي جالعاسادى، — دەلىنگەن حابارلامادا.

Abai.kz