بۇگىن، 15 جەلتوقسان كۇنى، ق.جۇبانوۆ اتىنداعى اقتوبە وڭىرلىك ۋنيۆەرسيتەتى مەن ميننەسوتا ۋنيۆەرسيتەتىنىڭ بىرلەسكەن باستاماسىمەن قازاقستاندا العاش رەت «حالىقارالىق زەرتتەۋ قۇزىرەتتىلىكتەرىن دامىتۋ ورتالىعى» سالتاناتتى تۇردە اشىلدى. اتالعان ورتالىق عىلىمي مادەنيەتتى دامىتۋعا جانە حالىقارالىق اكادەميالىق ىنتىماقتاستىقتى نىعايتۋعا باعىتتالعان زاماناۋي زەرتتەۋ الاڭى رەتىندە قىزمەت ەتەتىن بولادى.

ورتالىقتىڭ نەگىزگى ميسسياسى – عىلىممەن اينالىساتىن بارلىق دەڭگەيدەگى زەرتتەۋشىلەرگە، ستۋدەنتتەردەن باستاپ پروفەسسورلىق-وقىتۋشىلىق قۇرامعا دەيىن، كەشەندى قولداۋ كورسەتەتىن تۇراقتى زەرتتەۋ ەكوجۇيەسىن قالىپتاستىرۋ.

ءىس-شاراعا قر عىلىم جانە جوعارى ءبىلىم ءمينيسترى ساياسات نۇربەك ونلاين فورماتتا قاتىسىپ، ءوز سوزىندە ورتالىقتىڭ اشىلۋى ەلدەگى زەرتتەۋ ەكوجۇيەسىن نىعايتۋعا جانە جوعارى ءبىلىم بەرۋ جۇيەسىندە ۇزدىكسىز ءبىلىم الۋ مادەنيەتىن دامىتۋعا ەلەۋلى ۇلەس قوساتىنىن اتاپ ءوتتى. مينيستر ورتالىقتىڭ وقىتۋشىلار مەن زەرتتەۋشىلەردىڭ ادىسنامالىق دايارلىعىن ارتتىرۋعا، عىلىمي جاريالانىمدىق داعدىلارىن دامىتۋعا، زەرتتەۋ ەتيكاسىنىڭ حالىقارالىق ستاندارتتارىن ساقتاۋىنا جانە قازاقستاندىق عىلىمدى جاھاندىق اكادەميالىق كەڭىستىككە ىقپالداستىرۋعا ارنالعان ماڭىزدى الاڭعا اينالاتىنىن جەتكىزدى. سونىمەن قاتار «train the trainer» («وقىتۋشىلاردى وقىتۋ») مودەلىنىڭ ەنگىزىلۋى زەرتتەۋ قۇزىرەتتىلىكتەرىنىڭ تۇراقتى دامۋىن قامتاماسىز ەتىپ، اكادەميالىق قاۋىمداستىق ىشىندە ءبىلىم مەن تاجىريبەنىڭ جۇيەلى تۇردە تارالۋىنا مۇمكىندىك بەرەتىنى اتاپ ءوتىلدى.

سالتاناتتى ءىس-شاراعا سونداي-اق قر عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا، حەريوت-ۋاتت ۋنيۆەرسيتەتىنىڭ ۆيتسە-كانتسلەرى ريچارد ۋيليامس، ميننەسوتا ۋنيۆەرسيتەتىنىڭ حالىقارالىق باستامالار دەپارتامەنتىنىڭ ديرەكتورى مارينا الەيشو، ميننەسوتا ۋنيۆەرسيتەتىنىڭ وقىتۋ مەن ءبىلىم بەرۋدى دامىتۋ جونىندەگى پروفەسسورى رودني ۋوللەس، سونداي-اق ميننەسوتا ۋنيۆەرسيتەتىنىڭ پروفەسسورى باسكار ۋپادحياي، ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ باسقارما توراعاسى - رەكتورى لاۋرا قاراباسوۆا قاتىستى.

ورتالىقتىڭ نەگىزگى قىزمەت باعىتتارىنا زەرتتەۋلەردى جوسپارلاۋ، دەرەكتەردى تالداۋ، گرانتتىق وتىنىمدەر مەن عىلىمي جاريالانىمداردى ازىرلەۋ بويىنشا ادىسنامالىق كەڭەس بەرۋ، زاماناۋي زەرتتەۋ ادىستەرى، اكادەميالىق جازۋ جانە عىلىمي ەتيكا ماسەلەلەرى بويىنشا سەمينارلار مەن ءبىلىم بەرۋ كۋرستارىن وتكىزۋ، سونداي-اق بىرىڭعاي تسيفرلىق پلاتفورما قالىپتاستىرۋ جانە عىلىمي قاۋىمداستىقتى دامىتۋ كىرەدى.

اتالعان ورتالىقتىڭ قۇرىلۋى – ءوڭىردىڭ عىلىمي الەۋەتىن ارتتىرۋ جولىنداعى ماڭىزدى قادام. جوبا ناتيجەسىندە قازاقستاندىق عىلىمي زەرتتەۋلەردىڭ ساپاسى مەن حالىقارالىق باسەكەگە قابىلەتتىلىگى ارتىپ، عىلىمي قىزمەتكە سىرتقى گرانتتار مەن ينۆەستيتسيالار تارتۋ مۇمكىندىكتەرى كەڭەيەدى، جاستاردىڭ زەرتتەۋشىلىك جانە يننوۆاتسيالىق قىزمەتكە قىزىعۋشىلىعى كۇشەيەدى، سونداي-اق قازاقستاننىڭ جاھاندىق عىلىمي قاۋىمداستىقتاعى ورنى نىعايادى.

Abai.kz