ەلىمىزدىڭ وڭىرلەرىندەگى تۇرعىن سەكتوردا ءورت قاۋىپسىزدىگى ەرەجەلەرىن ساقتاۋ جانە جىلىتۋ ماۋسىمىندا ۋلى گازبەن ۋلانۋدىڭ الدىن الۋ باعىتىنداعى اۋقىمدى پروفيلاكتيكالىق جۇمىستار جالعاسۋدا. باستى نازار الەۋمەتتىك وسال توپتارعا تيەسىلى ۇيلەرگە اۋدارىلعان.

جىلىتۋ ماۋسىمى باستالعاننان بەرى الەۋمەتتىك وسال توپتارعا تيەسىلى تۇرعىن ۇيلەرگە 34 876 ءورت قاۋىپسىزدىگى داتچيگى ورناتىلدى. پروفيلاكتيكالىق ءىس-شارالارعا اۋلا ارالاۋ، حالىق اراسىندا ءتۇسىندىرۋ جۇمىستارىن جۇرگىزۋ، ۋلى گاز داتچيگىن ورناتۋ، سونداي-اق پەشپەن جىلىتۋ جۇيەسىن تەكسەرۋ جانە جوندەۋ كىرەدى.

شىعىس قازاقستان وبلىسىندا تجد قۇتقارۋشىلارى تۇرعىن ۇيلەردى شامامەن 34 800 رەت ارالادى. تۇرعىندارعا ءورت قاۋىپسىزدىگى تالاپتارى ەگجەي-تەگجەيلى تۇسىندىرىلۋدە. وڭىردە داۋىلدى ەسكەرتۋ جاريالانعان: سۋىق انتيتسيكلون ساقتالىپ، اۋا تەمپەراتۋراسى تومەندەۋدە. وسىعان بايلانىستى قۇتقارۋشىلار ازاماتتاردى ەلەكتر جىلىتۋ قۇرالدارىن قولدانعاندا قاۋىپسىزدىك شارالارىن قاتاڭ ساقتاۋعا شاقىرادى: ەلەكتر جەلىسىن شامادان تىس جۇكتەمەۋ، قۇرالداردىڭ جۇمىس ىستەۋىن باقىلاۋ، اسىرەسە تۇندە ولاردى قاراۋسىز قالدىرماۋ قاجەت. تجد قىزمەتكەرلەرى اقاۋلى جانە ءورت قاۋپى بار پەشتەردى جوندەۋگە دە كومەك كورسەتەدى. گلۋبوكوۆسكوە اۋدانى بويىنشا الەۋمەتتىك وسال وتباسىلاردىڭ ۇيلەرىندە پەشپەن جىلىتۋ جۇيەسىن قالپىنا كەلتىرۋ جۇمىستارى جۇرگىزىلدى.

(سۋرەت:https://www.gov.kz/)

جامبىل وبلىسىندا پروفيلاكتيكالىق ءىس-شارالار شۋ اۋدانىنىڭ اۋماعىندا جۇرگىزىلدى. جۇمىس بارىسىندا قۇتقارۋشىلار 130 ۋلى گاز داتچيگىن ورناتىپ، 20 مۇرجانى تازالادى. الەۋمەتتىك وسال توپتارعا تيەسىلى ۇيلەرگە ەرەكشە نازار اۋدارىلدى.

جەتىسۋ وبلىسىندا ءورت حابارلاعىش تراگەديانىڭ الدىن الدى. 2025 جىلعى 2 جەلتوقساندا سارقان قالاسىندا 112 پۋلتىنە تۇرعىن ۇيدەگى ءتۇتىندى ءورت حابارلاعىش ىسكە قوسىلعانى تۋرالى حابار ءتۇستى. ۇيدە ءۇي يەسى مەن ونىڭ ءتورت نەمەرەسى بولعان. وقيعا ورنىنا كەلىپ جەتكەن ءورت ءسوندىرۋ بولىمشەلەرى پەشتىڭ جانىندا بولمە ارالىق قابىرعانىڭ بىقسىعانىن انىقتادى. ءورت ۋاقىتىندا ءسوندىرىلدى، وتتىڭ تارالۋى مەن بولمەلەردى ءتۇتىن باسۋىنا جول بەرىلمەدى، زارداپ شەككەندەر جوق. حابارلاعىش تجم قىزمەتكەرلەرىنىڭ الدىن الۋ جۇمىستارى اياسىندا قاراشا ايىندا ورناتىلعان ەدى. ءدال ونىڭ ۋاقىتىلى ىسكە قوسىلۋى قاۋىپتى ەرتە كەزەڭدە انىقتاۋعا مۇمكىندىك بەردى.

تجم ازاماتتارعا تۇرعىن ۇيلەردى ءتۇتىندى ءورت حابارلاعىشپەن جابدىقتاۋدىڭ، پەشتەردى، مۇرجالاردى جانە ەلەكتر سىمدارىن ۇنەمى تەكسەرۋدىڭ، سونداي-اق بالالاردى قاراۋسىز قالدىرماۋدىڭ ماڭىزدىلىعىن ەسكە سالادى.

Abai.kz