قاتار سىرتقى ىستەر مينيسترلىگى ديپلوماتيالىق ارنالار بويىنشا قازاقستان رەسپۋبليكاسىنىڭ ۇكىمەتى مەن قاتار مەملەكەتىنىڭ ۇكىمەتى اراسىنداعى قازاقستاندىق جۇمىسكەرلەردىڭ وسى ەلدە جۇمىسقا ورنالاسۋىن رەتتەۋ تۋرالى كەلىسىمدى ورىنداۋ جونىندەگى مەملەكەتىشىلىك راسىمدەردىڭ ورىندالعانىن راستايتىن جازباشا حابارلاما جىبەردى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگىنشە، اتالعان كەلىسىم كۇشىنە ەندى.

قۇجاتقا 2024 جىلعى 14 اقپاندا مەملەكەت باسشىسىنىڭ دوحاعا رەسمي ساپارى بارىسىندا قول قويىلدى. 2025 جىلى كەلىسىمدى راتيفيكاتسيالاۋ تۋرالى زاڭ جوباسىن قر پارلامەنتىنىڭ قوس پالاتاسى (10 قىركۇيەك – ماجىلىستە، 9 قازان – سەناتتا) ماقۇلدادى، 20 قازاندا زاڭعا قازاقستان رەسپۋبليكاسىنىڭ پرەزيدەنتى قول قويدى.

- كەلىسىم قازاقستان ازاماتتارىن قاتاردا جۇمىسقا ورنالاستىرۋدىڭ قاۋىپسىز جانە اشىق جاعدايلارىن جاساۋعا جانە ولاردىڭ قۇقىقتىق جانە الەۋمەتتىك قورعالۋىن قامتاماسىز ەتۋگە باعىتتالعان.

قۇجات مامانداردى ىرىكتەۋگە وتىنىمدەر الماسۋدىڭ، ولاردىڭ بىلىكتىلىگىن تەكسەرۋدىڭ جانە ەڭبەك شارتتارىن جاساسۋدىڭ ناقتى ءتارتىبىن بەكىتەدى. كەلىسىم قازاقستاندىق جۇمىسكەرلەرگە ۇلگىلىك ەڭبەك شارتىنا سايكەس ۇشۋعا، تۇرعىن ۇيگە جانە مەديتسينالىق قىزمەت كورسەتۋگە اقى تولەۋ، ەڭبەكتىڭ، دەمالىستىڭ جانە سىياقىنىڭ ناقتى شارتتارى، شارتتى مەرزىمىنەن بۇرىن بۇزعان كەزدەگى جۇمىسكەرلەردىڭ مۇددەلەرىن قورعاۋدى قوسا العاندا الەۋمەتتىك جانە ەڭبەك قۇقىقتارىنا كەپىلدىك بەرەدى، - دەلىنگەن ۆەدومستۆو تاراتقان اقپاراتتا

كەلىسىم نورمالارىنىڭ ورىندالۋىن باقىلاۋ ءۇشىن قر ەڭبەك جانە حالىقتى الەۋمەتتىك قورعاۋ مينيسترلىگىنىڭ جانە قاتار مەملەكەتىنىڭ ەڭبەك مينيسترلىگىنىڭ وكىلدەرىنەن بىرلەسكەن كوميتەت قۇرىلاتىن بولادى.

قاتارلىق جۇمىس بەرۋشىلەر ۇسىناتىن بارلىق بوس ورىندار migration.enbek.kz پورتالىندا ورنالاستىرىلاتىن بولادى، بۇل قازاقستان ازاماتتارىنا قاتار مەملەكەتىندەگى ەڭبەك مۇمكىندىكتەرىنە اشىق جانە رەسمي قولجەتىمدىلىكتى قامتاماسىز ەتەدى.

قازىرگى ۋاقىتتا مينيسترلىك كورەيا رەسپۋبليكاسىمەن، ساۋد ارابياسىمەن، ءباا، سلوۆاكيا، جاپونيا، شۆەتسيا، يتاليا، نورۆەگيا، پولشا، چەحيا، رۋمىنيا جانە فينليانديامەن ەڭبەك قىزمەتىن رەتتەۋ جانە ەڭبەكشى-ميگرانتتاردىڭ قۇقىقتارىن قورعاۋ بويىنشا وسىعان ۇقساس مەموراندۋمدار مەن كەلىسىمدەر جاساسۋ بويىنشا جۇمىس جۇرگىزۋدە.

2025 جىلعى 9 ايدىڭ قورىتىندىسى بويىنشا شەتەلدە ەڭبەك قىزمەتىن جۇزەگە اسىرۋ ماقساتىندا 156,7 مىڭ قازاقستاندىق جۇمىس ىستەپ جاتقانىن ەستەرىڭىزگە سالا كەتكەن ءجون.

قازاقستان ازاماتتارىنىڭ ەڭ كوپ سانى رەسەي فەدەراتسياسىندا (128,8 مىڭ ادام), كورەيا رەسپۋبليكاسىندا (15,2 مىڭ ادام), پولشادا (2,6 مىڭ ادام) جانە ۇلىبريتانيادا (1,4 مىڭ ادام) جۇمىس ىستەيدى.

ايتا كەتەيىك، دەپۋتات ەڭبەك ميگرانتتارىنا قوسىمشا سالىق سالۋدى ۇسىندى.

Abai.kz