قازاقستان پرەزيدەنتى قاسىم-جومارت توقاەۆ باستاعان دەلەگاتسيانىڭ كۇنشىعىسەلىنە ساپارى جالعاسۋدا.

كەشە جاپونيا پرەمەر-ءمينيسترىنىڭ وفيسىندە پرەزيدەنت قاسىم-جومارت توقاەۆتى سالتاناتتى قارسى الۋ ءراسىمى ءوتتى. قۇرمەت قاراۋىلى ساپ تۇزەپ، قوس ەلدىڭ مەملەكەتتىك ءانۇراندارى شىرقالدى. قۇرمەت قاراۋىلىنىڭ باستىعى راپورت بەرگەننەن كەيىن قاسىم-جومارت توقاەۆ پەن ساناە تاكايچي ءبىر-بىرىنە رەسمي دەلەگاتسيا مۇشەلەرىن تانىستىردى.

سۋرەت: اقوردا تەلەگرام ارناسىنان الىندى.

مەملەكەت باسشىسى جاپونيانىڭ پرەمەر-ءمينيسترى ساناە تاكايچيمەن كەلىسسوز جۇرگىزدى. پرەزيدەنت قازاقستان دەلەگاتسياسىنا قوناقجايلىق كورسەتكەن ساناە تاكايچيگە ريزاشىلىعىن ءبىلدىردى.

قاسىم-جومارت توقاەۆ:

– بۇل ساپار، شىن مانىندە، ەكى ەل اراسىنداعى قارىم-قاتىناستىڭ جاڭا كەزەڭى. ءبىز جاپونيانى ارقاشان ازياداعى ۋاقىت تەزىنەن وتكەن سەنىمدى سەرىكتەسىمىز دەپ سانايمىز. بۇگىنگى جاپونيا – عاسىرلار بويى قالىپتاسقان دانالىق پەن بىرەگەي ءداستۇردى زاماناۋي يننوۆاتسيامەن ۇيلەسىمدى جاراستىرعان، دامىعان مەملەكەت. ءسىزدىڭ پاراساتتى ءارى مىقتى باسشىلىعىڭىزبەن ەلىڭىزدىڭ حالىقارالىق ارەناداعى ءرولىن ودان ءارى نىعايتاتىن اۋقىمدى رەفورمالار جۇرگىزىلىپ جاتىر.

ءبىز جاپونيانى الىستاعى كورشىمىز، دەگەنمەن جاقىن ءارى سەنىمدى دوسىمىز دەپ ءجيى ايتامىز. ءوزارا بايلانىستارىمىزدىڭ تاريحى تەرەڭدە. بۇعان دەيىن ءسىزدىڭ ەلىڭىزگە ءتورت رەت كەلگەن ەدىم. بۇل – مەنىڭ پرەزيدەنت رەتىندەگى العاشقى ساپارىم. قازاق-جاپون قارىم-قاتىناسىنىڭ بەرىك ينستيتۋتسيونالدىق نەگىزى قالىپتاسقان.

ءوزىڭىز ايتقانداي، 2004 جىلى جاپونيانىڭ سول كەزدەگى سىرتقى ىستەر ءمينيسترى كاۆاگۋچي حانىممەن بىرگە «ورتالىق ازيا + جاپونيا» فورماتىنا باستاماشى بولدىق. سىرتقى ىستەر مينيسترلەرى دەڭگەيىندەگى العاشقى كەزدەسۋ استانادا ءوتتى. بۇگىندە مۇنداي كەزدەسۋلەردىڭ كەڭىنەن تانىلعانى سونشالىق، ءىرى مەملەكەتتەردىڭ كوبى «ورتالىق ازيا پليۋس» پلاتفورماسىن قۇپتايدى. بىراق جاپونيا بۇل ديالوگ الاڭىنىڭ العاشقى باستاماشىسى جانە نەگىزىن قالاۋشى بولىپ قالا بەرەدى، – دەدى قاسىم-جومارت توقاەۆ.

جاپونيا پرەمەر-ءمينيسترى قازاقستان پرەزيدەنتىنىڭ رەسمي ساپارى ەكى ەلدىڭ ءوزارا ءتيىمدى ىنتىماقتاستىعىنا تىڭ سەرپىن بەرەتىنىنە سەنىم ءبىلدىردى.

ساناە تاكايچي:

– سىزبەن جۇزدەسكەنىمە قۋانىشتىمىن. وسىدان 21 جىل بۇرىن سىرتقى ىستەر مينيسترلەرىنىڭ «ورتالىق ازيا + جاپونيا» فورماتىنداعى العاشقى جيىنى وتكەن ەدى. وعان ءوزىڭىز توراعالىق ەتتىڭىز. بۇگىن، مىنە، «ورتالىق ازيا + جاپونيا» فورماتىنداعى مەملەكەت باسشىلارىنىڭ كەزدەسۋىنە پرەزيدەنت لاۋازىمىندا قاتىسقالى وتىرسىز. قازاقستاندى زاڭ ۇستەمدىگىنە نەگىزدەلگەن ەركىن ءارى اشىق الەمدىك ءتارتىپتى نىعايتۋ ىسىندە ستراتەگيالىق سەرىكتەس رەتىندە قاراستىرامىز. ءوزارا ءتيىمدى قارىم-قاتىناستى ودان ءارى دامىتۋ ءۇشىن سىزبەن تىعىز ىنتىماقتاستىقتى جالعاستىرۋعا نيەتتىمىز، – دەدى ساناە تاكايچي.

كەلىسسوزدەر بارىسىندا ساۋدا-ەكونوميكالىق، ينۆەستيتسيالىق، كولىك-لوگيستيكالىق، ەنەرگەتيكالىق جانە مادەني-گۋمانيتارلىق سالالارداعى ەكىجاقتى بايلانىستاردى دامىتۋ پەرسپەكتيۆاسى ەگجەي-تەگجەيلى تالقىلاندى.

كەلىسسوز قورىتىندىسى بويىنشا پرەزيدەنت قاسىم-جومارت توقاەۆ پەن پرەمەر-مينيستر ساناە تاكايچي بىرلەسكەن مالىمدەمە قابىلدادى. ەكى ەلدىڭ رەسمي دەلەگاتسيا مۇشەلەرى 14 ۇكىمەتارالىق جانە ۆەدومستۆوارالىق قۇجاتقا قول قويدى.

سۋرەت: اقوردا تەلەگرام ارناسىنان الىندى.

قازاقستان پرەزيدەنتى حيروشي ميكيتانيمەن كەزدەستى

جاپونياداعى رەسمي ساپارى اياسىندا قازاقستان پرەزيدەنتى Rakuten Group كومپانياسىنىڭ نەگىزىن قالاۋشى، باسقارما توراعاسى جانە باس ديرەكتورى حيروشي ميكيتانيمەن كەزدەستى.

مەملەكەت باسشىسى Rakuten توبىنىڭ الەمدەگى ەڭ وزىق جاھاندىق تسيفرلىق ەكوجۇيە قالىپتاستىرۋدا قول جەتكىزگەن جەتىستىكتەرىن جوعارى باعالادى. قاسىم-جومارت توقاەۆتىڭ ايتۋىنشا، تەحنولوگيالىق دامۋ مەن تسيفرلىق ترانسفورماتسيانىڭ جاڭا كەزەڭىنە قادام باسقان قازاقستان كومپانيا تاجىريبەسىنە زور قىزىعۋشىلىق تانىتادى.

پرەزيدەنت ەلىمىزدە العاش رەت جاساندى ينتەللەكت تۋرالى زاڭ قابىلدانىپ، ءبىرىنشى ۇلتتىق سۋپەركومپيۋتەر ىسكە قوسىلعانىن، ەلەكتروندىق ۇكىمەت قىزمەتى مەن تسيفرلىق ەكوجۇيە جەتىلدىرىلىپ جاتقانىن جەتكىزدى. وسى ورايدا مەملەكەت باسشىسى Rakuten كومپانياسىنىڭ قازاقستانداعى قىزمەت اياسىن كەڭەيتۋ، سونداي-اق جاساندى ينتەللەكت جانە تسيفرلىق دامۋ مينيسترلىگىمەن تىعىز قارىم-قاتىناس ورناتۋ نيەتىن قۇپتادى. اتاپ ايتقاندا، ەلىمىز كومپانيانىڭ قاتەرلى ىسىك اۋرۋلارىن ەمدەۋگە ارنالعان بيوتەحنولوگيا سالاسىنداعى ازىرلەمەلەرىنە قىزىعۋشىلىق تانىتادى.

حيروشي ميكيتاني قاسىم-جومارت توقاەۆقا كومپانيا جۇمىسىنا وڭ باعا بەرگەنى ءۇشىن العىس ايتىپ، قازاقستان پرەزيدەنتىمەن كەزدەسۋ زور مارتەبە ەكەنىنە توقتالدى. ول ەلىمىزدە تسيفرلىق باستامالاردى دامىتۋدىڭ جوعارى قارقىنىن اتاپ ءوتىپ، ولاردى جۇزەگە اسىرۋ ءۇشىن اۋقىمدى ينۆەستيتسيا تارتىلعانىنا نازار اۋداردى.

سۋرەت: اقوردا تەلەگرام ارناسىنان الىندى.

توكيو گۋبەرناتورى يۋريكو كويكەمەن كەزدەستى

مەملەكەت باسشىسى توكيو گۋبەرناتورى يۋريكو كويكەمەن كەزدەسۋ وتكىزدى. قاسىم-جومارت توقاەۆ پەن يۋريكو كويكە تسيفرلاندىرۋ، Smart city تەحنولوگيالارىن جانە قالانى ورنىقتى دامىتۋ، جاساندى ينتەللەكت، شاھاردى باسقارۋ ىسىنە يننوۆاتسيالىق شەشىمدەردى ەنگىزۋ سالالارىنداعى ىنتىماقتاستىق ماسەلەلەرىن تالقىلادى. سونىمەن قاتار مەگاپوليستەردىڭ تۇرعىندارى مەن قوناقتارى ءۇشىن اناعۇرلىم جايلى، ەكولوگيالىق تۇرعىدان تازا، قاۋىپسىز جانە ينكليۋزيۆتى ورتا قالىپتاستىرۋ جايىن قاراستىردى.

مەملەكەت باسشىسى قالانى باسقارۋ ىسىنە جاساندى ينتەللەكتىنى ەنگىزۋ بويىنشا ەكى ەل استانالارى اراسىنداعى ىنتىماقتاستىقتىڭ الەۋەتى زور ەكەنىنە توقتالدى.كەزدەسۋدە قاسىم-جومارت توقاەۆقا توكيو قالاسىنىڭ Smart city تۇجىرىمداماسى تانىستىرىلدى. جوبا حالىقتىڭ تۇرمىس ساپاسىن جاقسارتۋدى، شاھاردى باسقارۋ تيىمدىلىگىن ارتتىرۋدى جانە ورنىقتى دامۋ ءۇشىن وزىق تەحنولوگيالاردى پايدالانۋدى كوزدەيدى.

قازاقستان مەن جاپونيا استانالارىنىڭ باسشىلارى ءوزارا تۇسىنىستىك تۋرالى مەموراندۋمعا قول قويدى.

سۋرەت: اقوردا تەلەگرام ارناسىنان الىندى.

توتەنشە جاعدايلار ءھام جاپون تاجىربيەسى

پرەزيدەنت توكيونىڭ توتەنشە جاعدايلار جونىندەگى احۋالدىق ورتالىعىن ارالاپ كوردى. بۇل ازاماتتىق قورعانىس پەن قالاداعى قاۋىپ-قاتەرلەردىڭ الدىن الۋدىڭ نەگىزگى جۇيەسى سانالادى.

ورتالىقتىڭ باستى مىندەتى – قالاداعى احۋالعا ۇدايى مونيتورينگ جۇرگىزۋ، توتەنشە جاعداي كەزىندە بيلىك ورگاندارىنىڭ ءىس-ارەكەتىن ۇيلەستىرۋ، ىقتيمال قاتەر مەن ورىن العان اپاتتار (جەر سىلكىنىسى، تايفۋن، سۋ تاسقىنى، ءىرى تەحنوگەندىك اپاتتار، لاڭكەستىك اكتىلەر) تۋرالى اقپاراتتاردى تالداۋ. باق پەن الەۋمەتتىك جەلىلەردەگى جالعان اقپاراتتىڭ تارالۋىنا قارسى ءىس-قيمىلعا باسا كوڭىل بولىنەدى. بۇل جۇمىسپەن تاۋلىك بويى مونيتورينگ جۇرگىزەتىن ارنايى بولىمشە شۇعىلدانادى.

ال كۇندەلىكتى ومىردە كەشەن داعدارىس جاعدايلارىن باسقارۋ جۇيەلەرىن جوسپارلاۋ جانە جەتىلدىرۋ، ازاماتتىق قورعانىستىڭ وڭىرلىك جوسپارىن ازىرلەۋ، وقۋ-جاتتىعۋ جيىندارىن دايىنداۋ جانە وتكىزۋ، حالىقتى قۇلاقتاندىرۋعا، اپاتتاردىڭ سالدارىن جويۋعا ارنالعان اقپاراتتىق جۇيەلەردى دامىتۋ ىسىمەن اينالىسادى.

سۋرەت: اقوردا تەلەگرام ارناسىنان الىندى.

مەملەكەت باسشىسى شينگو ۋەنونى قابىلدادى

قاسىم-جومارت توقاەۆ توكيودا جاپونيانىڭ ءىرى جانە ىقپالدى ساۋدا-ينۆەستيتسيالىق كورپوراتسيالارىنىڭ ءبىرى سانالاتىن Sumitomo جەتەكشىسىمەن كەزدەستى.

قازاقستان پرەزيدەنتى ەلىمىز Sumitomo كورپوراتسياسىنىڭ ورنىقتى دامۋ مەن بيزنەستىڭ جاۋاپكەرشىلىگىن ارتتىرۋعا بەيىلدىگىن جوعارى باعالايتىنىن، سونداي-اق كومپانيانى ۇزاق مەرزىمدى سەرىكتەس رەتىندە قاراستىراتىنىن اتاپ ءوتتى.

شينگو ۋەنو مەملەكەت باسشىسىنا «قازاتومونەركاسىپ» ۇلتتىق كومپانياسىمەن بىرلەسكەن جوبانى ىسكە اسىرۋ جايىندا مالىمەت بەردى. اتالعان جوبا يادرولىق مەديتسينا سالاسىندا ۋران ونىمدەرىنەن ەم-شاراعا قولدانۋعا ارنالعان رادي يزوتوپتار الۋدىڭ عىلىمي-نەگىزدەمەلىك ادىستەرىن ازىرلەۋدى قاراستىرادى.

كەزدەسۋدە كولىك-لوگيستيكا، ەنەرگەتيكا، اتوم ونەركاسىبى، مەتاللۋرگيا جانە گەولوگيالىق بارلاۋ سالالارىندا بىرلەسكەن ينۆەستيتسيالىق باستامالاردى جۇزەگە اسىرۋ پەرسپەكتيۆاسى تالقىلاندى.

سۋرەت: اقوردا تەلەگرام ارناسىنان الىندى.

مەملەكەت باسشىسى يچيرو تاكاحارۋدى قابىلدادى

مەملەكەت باسشىسى جاپونيا مەتالل جانە ەنەرگەتيكالىق قاۋىپسىزدىك جونىندەگى ۇيىمىنىڭ (JOGMEC) توراعاسى يچيرو تاكاحارۋدى قابىلدادى. كەزدەسۋدە گەولوگيالىق بارلاۋ، اسا ماڭىزدى مينەرالداردى ءوندىرۋ جانە وڭدەۋ، سونداي-اق تابيعي رەسۋرستاردى ورنىقتى باسقارۋ باعىتتارىنداعى ىنتىماقتاستىق پەرسپەكتيۆاسى تالقىلاندى.

مەملەكەت باسشىسى JOGMEC كومپانياسىنىڭ قازاقستاندا جوبالاردى جۇزەگە اسىرۋعا قىزىعۋشىلىق تانىتىپ وتىرعانىن جوعارى باعالادى.

سونىمەن قاتار اڭگىمەلەسۋ بارىسىندا ۇيىمنىڭ ەلىمىزدەگى گەولوگيالىق بارلاۋ جوبالارىنا قاتىسۋ جانە وكىلدىك اشۋ مۇمكىندىكتەرى قاراستىرىلدى. پرەزيدەنتتىڭ پىكىرىنشە، بۇل بىرلەسكەن جوبالاردى ءتيىمدى ۇيلەستىرۋگە، سونداي-اق جاپونيانىڭ وندىرىستىك جانە تەحنولوگيالىق كومپانيالارىنىڭ قازاقستان نارىعىنا كوپتەپ كەلۋىنە ىقپال ەتەدى.

سۋرەت: اقوردا تەلەگرام ارناسىنان الىندى.

قازاقستان پرەزيدەنتى تاتسۋو ياسۋناگانى قابىلدادى

قازاقستان پرەزيدەنتى Mitsui كومپانياسى ديرەكتورلار كەڭەسىنىڭ توراعاسى تاتسۋو ياسۋناگامەن كەزدەستى. پرەزيدەنت قازاقستانداعى بەلسەندى قىزمەتى جانە جاپونيامەن ەكونوميكالىق ىنتىماقتاستىقتى نىعايتۋعا قوسقان ۇلەسى ءۇشىن Mitsui باسشىلىعىنا ريزاشىلىعىن ءبىلدىردى.قازىرگى ۋاقىتتا كاسىپورىن حالىقارالىق جەتكىزۋ تىزبەگىن قالىپتاستىرۋدا، ينفراقۇرىلىمدى دامىتۋدا، ەنەرگەتيكا مەن ونەركاسىپ سالالارىن ورىستەتۋدە ماڭىزدى ءرول اتقارادى.

مەملەكەت باسشىسى قازاقستان ەكونوميكانىڭ نەگىزگى سەكتورلارىندا Mitsui كومپانياسىنىڭ قىزمەت اياسىن كەڭەيتۋگە نيەتتى ەكەنىن جەتكىزدى. اتاپ ايتقاندا، كومپانيانىڭ استانادا كۇردەلى جوندەۋ جانە قۇرال-جابدىقتاردى قايتا قالپىنا كەلتىرۋ بويىنشا وندىرىستىك كەشەن قۇرىلىسىنا قاتىسۋ جوسپارىن ماقۇلدادى.

سونداي-اق ءوزارا قىزىعۋشىلىق تانىتقان سالالار قاتارىندا اسا ماڭىزدى مينەرالدار، كولىك-لوگيستيكا، تابيعي اپاتتاردىڭ الدىن الۋعا ارنالعان تەحنولوگيانى ەنگىزۋ باعىتتارى بار.

قازاقستان پرەزيدەنتىنىڭ توكيوعا ساپارى اياسىندا Mitsui كومپانياسىمەن بىرقاتار بىرلەسكەن جوبالاردى جۇزەگە اسىرۋ جونىندە مەموراندۋمعا قول قويۋ جوسپارلانعان.

سۋرەت: اقوردا تەلەگرام ارناسىنان الىندى.

قاسىم-جومارت توقاەۆ حيرويۋكي وگاۆانى قابىلدادى

قاسىم-جومارت توقاەۆ Komatsu كومپانياسى ديرەكتورلار كەڭەسىنىڭ توراعاسى حيرويۋكي وگاۆانى قابىلدادى. كەزدەسۋدە مەملەكەت باسشىسى Komatsu كومپانياسى ەلىمىزدىڭ تاۋ-كەن ينفراقۇرىلىمىن دامىتۋعا ەلەۋلى ۇلەس قوسىپ كەلە جاتقان سەنىمدى ءارى ۋاقىت تەزىنەن وتكەن سەرىكتەسى سانالاتىنىن اتاپ ءوتتى.

پرەزيدەنت كومپانيانىڭ استانا قالاسىندا تەحنيكالاردى كۇردەلى جوندەۋگە جانە قايتا قالپىنا كەلتىرۋگە ارنالعان وندىرىستىك كەشەن سالۋ تۋرالى شەشىمىن قۇپتادى.

حيرويۋكي وگاۆا ستراتەگيالىق تۇرعىدان ماڭىزدى نارىق سانالاتىن ورتالىق ازيانىڭ الەۋەتى جوعارى، مۇمكىندىگى مول ەكەنىنە توقتالدى. ول جاڭا كەشەننىڭ ايماقتاعى تاۋ-كەن كومپانيالارىنىڭ تەحنيكالارىن از ۋاقىت ىشىندە تومەن باعادا جوندەيتىن ءارى ولارعا جەدەل سەرۆيستىك قىزمەت كورسەتەتىن وڭىردەگى ءىرى حابقا اينالاتىنىن مالىمدەدى.

مەملەكەت باسشىسىنىڭ ايتۋىنشا، قازاقستان ءوندىرىستى لوكاليزاتسيالاۋعا، ەلدەر اراسىنداعى ونەركاسىپتىك ىنتىماقتاستىقتى ودان ءارى نىعايتۋعا، ۇلتتىق ەكونوميكانىڭ باسەكەگە قابىلەتتىلىگىن ارتتىرۋ ءۇشىن وزىق تەحنولوگيالار الۋعا نيەتتى. كەزدەسۋ بارىسىندا مامان دايارلاۋ ماسەلەسىنە باسا ءمان بەرىلدى.

قاسىم-جومارت توقاەۆ Komatsu كومپانياسىنىڭ ەلىمىزدە وپەراتورلارعا، مەحانيكتەر مەن ينجەنەرلەرگە ارنالعان ايماقتىق وقىتۋ ورتالىعىن اشۋ تۋرالى باستاماسىنا قولداۋ ءبىلدىردى. سونداي-اق بۇل جوبانىڭ ادامي كاپيتالدى دامىتۋعا، ونەركاسىپتىك سەرىكتەستىكتى تەرەڭدەتۋگە زور ۇلەس قوساتىنىن ايتتى.

سۋرەت: اقوردا تەلەگرام ارناسىنان الىندى.

قاسىم-جومارت توقاەۆ ماسافۋمي سەنزاكيدى قابىلدادى

قاسىم-جومارت توقاەۆ Hitachi Construction Machinery كومپانياسىنىڭ پرەزيدەنتى ماسافۋمي سەنزاكيدى قابىلدادى. كەزدەسۋ بارىسىندا قازاقستاندىق تاۋ-كەن كاسىپورىندارىنىڭ جاپوندىق كومپانيامەن ىنتىماقتاستىعىن كەڭەيتۋ پەرسپەكتيۆاسى قارالدى.

مەملەكەت باسشىسى Hitachi Construction Machinery كومپانياسىنىڭ وڭىردەگى باستى سەرىكتەسى سانالاتىن قازاقستان ءوزارا ءتيىمدى بايلانىستاردى تەرەڭدەتۋگە دايىن ەكەنىن اتاپ ءوتتى. پرەزيدەنتتىڭ پىكىرىنشە، الداعى ۋاقىتتا كەن ورىندارىنىڭ قاجەتتىلىگى ءۇشىن ءوندىرىس لوكاليزاتسياسى مەن قۇرال-جابدىقتاردى جوندەۋ ىسىنە باسىمدىق بەرۋ ماڭىزدى.

قاسىم-جومارت توقاەۆ تسيفرلاندىرۋ، «جاسىل» تەحنولوگيالاردى ەنگىزۋ جانە دەربەس كولىك جۇيەسى بىرلەسكەن جۇمىستىڭ پەرسپەكتيۆتى باعىتتارى بولا الادى دەپ سانايدى.

ماسافۋمي سەنزاكيدىڭ ايتۋىنشا، كومپانيانىڭ باستى ماقساتى – جاھاندىق دەڭگەيدەگى، سونىمەن بىرگە قازاقستانداعى جوبالاردى جۇزەگە اسىرۋ اياسىندا جوعارى تەحنولوگيالى، تومەن كومىرتەكتى، قاۋىپسىز شەشىمدەر ازىرلەۋ ءارى ونى وندىرىستە قولدانۋ.

Abai.kz