سوڭعى جىلدارى اقتوبە وبلىسىندا اۋىلدىق ەلدى مەكەندەردى تابيعي گازبەن قامتاماسىز ەتۋ جۇمىستارى قارقىن الۋدا. بيىل وڭىردە 31 اۋىلعا كوگىلدىر وتىن جەتكىزىلدى. تەك سوڭعى ءبىر اپتا ىشىندە بىردەن جەتى ەلدى مەكەن گاز جەلىسىنە قوسىلىپ، شامامەن 13 مىڭ تۇرعىن تابيعي گازدى پايدالانۋ مۇمكىندىگىنە يە بولدى.

گازداندىرىلعان اۋىلداردىڭ قاتارىندا وبلىس ورتالىعىنان 460 شاقىرىم قاشىقتىقتا ورنالاسقان بايعانين اۋدانىنىڭ ويماۋىت اۋىلى بار. مۇندا 800-گە جۋىق ادام تۇرادى، 30-دان استام شارۋا قوجالىعى جۇمىس ىستەيدى. اۋىلدا مەكتەپ، مادەنيەت ءۇيى، كىتاپحانا، بالاباقشا جانە دارىگەرلىك امبۋلاتوريا قىزمەت كورسەتەدى. بۇعان دەيىن ەلدى مەكەن ورتالىقتاندىرىلعان اۋىزسۋمەن قامتىلعان بولسا، ەندى تۇرعىندار تابيعي گازعا دا قول جەتكىزدى.

جالپى، بيىلعى جىل ءوڭىر ءۇشىن گازداندىرۋ قارقىنى بويىنشا رەكوردتىق كورسەتكىشپەن ەرەكشەلەنىپ وتىر. ويماۋىتتان بولەك، سوڭعى اپتادا بايعانين اۋدانىنىڭ قاراجار اۋىلى، شالقار اۋدانىنىڭ بەرشۇگىر، سارىساي جانە الاباس اۋىلدارى، سونداي-اق مارتوك اۋدانىنىڭ اققايىڭ مەن پوكروۆكا اۋىلدارى گاز جەلىسىنە قوسىلدى.

وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ مالىمەتىنشە، قازىرگى تاڭدا اقتوبە وبلىسى تۇرعىندارىنىڭ 97,1 پايىزى تابيعي گازبەن قامتاماسىز ەتىلگەن. كەلەسى جىلى تاعى 17 جوبانى ىسكە اسىرۋ جوسپارلانىپ وتىر، ونىڭ اياسىندا 23 اۋىلدىق ەلدى مەكەن گازبەن قامتىلادى.

Abai.kz