بيىل قازاقستان مادەنيەت سالاسىنداعى ينفراقۇرىلىمدى نىعايتىپ، شىعارماشىلىق مۇمكىندىكتەردى ارتتىرىپ، مادەنيەت قىزمەتكەرلەرىن قولداۋدى كۇشەيتتى.

مەملەكەت باسشىسى ۇلتتىق قۇرىلتايدا وڭىرلىك تەاترلاردى دامىتۋ قاجەتتىگىن ەرەكشە اتاپ ءوتتى. وسىعان بايلانىستى استانا قالاسىندا «جاستار» تەاترى عيماراتىن جوندەۋ جوسپارلانىپ وتىر. سونداي-اق قۋىرشاق تەاترىنا جاڭا عيمارات سالۋ ماسەلەسى قاراستىرىلۋدا.

الداعى جىلدارى سەمەي، قوناەۆ جانە اقتوبە قالالارىندا جاڭا دراما تەاترلارى بوي كوتەرمەك.

سونىمەن قاتار الماتى قالاسىنداعى مۇحتار اۋەزوۆ اتىنداعى قازاق ۇلتتىق دراما تەاترى مەن ناتاليا ساتس اتىنداعى مەملەكەتتىك اكادەميالىق ورىس بالالار مەن جاسوسپىرىمدەر تەاترىندا جوندەۋ جۇمىستارى ءجۇرىپ جاتىر.

سالاداعى  ماڭىزدى باعىتتاردىڭ ءبىرى – ينفراقۇرىلىمدى جاڭارتۋ. بيىل كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ باس كورپۋسى قايتا جاڭاردى. تەمىربەك جۇرگەنوۆ اتىنداعى ونەر اكادەمياسىنا ارنالعان جاڭا جاتاقحانا قۇرىلىسى باستالدى. بۇدان بولەك، ءىرى قالالاردا ءۇش جاڭا ونەر مەكتەبىنىڭ ينفراقۇرىلىمىن جاڭارتۋ ماسەلەسى پىسىقتالۋدا.

ايتا كەتەيىك، 2025 جىلى بارلىعى 61 مادەني نىسان سالىندى. وڭىرلەردە 251 نىسانعا جوندەۋ جۇمىستارى جۇرگىزىلۋدە. سونداي-اق ەلوردا تاريحىن زەرتتەۋدىڭ ماڭىزدى ورتالىعىنا اينالاتىن «بوزوق» ارحەولوگيالىق پاركىن قۇرۋ جۇمىستارى جالعاسىپ جاتىر.

مينيسترلىك مادەنيەت قىزمەتكەرلەرىنە الەۋمەتتىك قولداۋ كورسەتۋگە ەرەكشە ءمان بەرەدى. ازاماتتىق قىزمەتكەرلەردىڭ كەي ساناتتارى بويىنشا جالاقى كەزەڭ-كەزەڭىمەن كوبەيتىلەدى. 2022 جىلدان 2025 جىلعا دەيىن مادەنيەت جانە ارحيۆ ۇيىمدارىندا جۇمىس ىستەيتىن 64 مىڭ قىزمەتكەردىڭ جالاقىسى جىل سايىن 20% ارتتى. مەملەكەت ونەر سالاسىندا  قىزمەت ەتەتىن مامانداردى ستيپەنديالار مەن ماراپاتتار ارقىلى قولداپ كەلەدى. جىل باسىندا 75 مادەنيەت قىزمەتكەرى مەملەكەتتىك ستيپەندياعا يە بولدى. پرەزيدەنت جارلىعىنا سايكەس بىرقاتار ازامات قازاقستان مادەنيەتىن دامىتۋ مەن ناسيحاتتاۋعا قوسقان ۇلەسى ءۇشىن ماراپاتتالدى.

سولاردىڭ قاتارىندا ەلىمىزدى الەمگە تانىتىپ جۇرگەن وپەرا ءانشىسى ماريا مۋدرياك بار. 2025 جىلى مەملەكەت باسشىسىنىڭ جارلىعىمەن وعان «قازاقستاننىڭ ەڭبەك سىڭىرگەن قايراتكەرى» اتاعى بەرىلدى.

«مەن ءۇشىن ءوز وتانىم – قازاقستاننىڭ ماراپاتقا لايىق ساناعانى – ۇلكەن قۇرمەت. پرەزيدەنتىمىزگە العىس بىلدىرەمىن. بيىل شىعارماشىلىعىما 28 جىل تولدى. مەن قازاقستاندى الەمنىڭ ەڭ ءىرى وپەرا ساحنالارىندا زور ماقتانىشپەن تانىستىرىپ، الداعى ۋاقىتتا دا ەل يگىلىگى ءۇشىن ايانباي قىزمەت ەتەمىن»، – دەدى ءانشى.

وسى وزگەرىستەردەن بولەك بىرقاتار جەتەكشى مادەنيەت مەكەمەلەرىنە «اكادەميالىق» مارتەبەسى بەرىلدى. اتاپ ايتساق، تالدىقورعان قالاسىنداعى ب. ريموۆا اتىنداعى دراما تەاترى، الماتى مەملەكەتتىك قۋىرشاق تەاترى، جامبىل وبلىستىق ا. توقپانوۆ اتىنداعى قازاق دراما تەاترى، باتىس قازاقستان وبلىستىق ع. قۇرمانعاليەۆ اتىنداعى فيلارمونياسىنىڭ مارتەبەسى وزگەردى.

قر مادەنيەت جانە اقپارات مينيسترلىگىنىڭ ءباسپاسوز قىزمەتى

Abai.kz