باس پروكۋراتۋرادا ينۆەستيتسيالار كوميتەتى مەن «Kazakh Invest» ۇلتتىق كومپانياسىنىڭ وكىلدەرى قاتىسقان جۇمىس كەڭەسى ءوتتى. كەڭەستە ينۆەستورلاردىڭ قۇقىقتارىن قورعاۋدى كۇشەيتۋ جانە ينۆەستيتسيالىق جوبالاردى سۇيەمەلدەۋ تيىمدىلىگىن ارتتىرۋ ماسەلەلەرى قارالدى.

اعىمداعى جىلدىڭ 17 جەلتوقسانىندا مەملەكەت باسشىسى ق.ك. توقاەۆتىڭ جارلىعىمەن ينۆەستورلاردىڭ قۇقىقتارىن قورعاۋ كوميتەتى قۇرىلدى. ينۆەستورلاردىڭ قۇقىقتارىن قورعاۋ دەڭگەيىن ارتتىرۋ ماقساتىندا ينۆەستيتسيالىق ومبۋدسمەن فۋنكتسيالارى باس پروكۋرورعا جۇكتەلدى. وڭىرلەردە ينۆەستيتسيالىق پروكۋرورلار جۇمىسىن باستايدى.

جاڭا كوميتەتتىڭ نەگىزگى مىندەتتەرىنە مىنالار جاتادى: ينۆەستيتسيالار جانە ينۆەستيتسيالىق قىزمەت سالاسىنداعى جوعارى قاداعالاۋدى جۇزەگە اسىرۋ; ينۆەستورلاردىڭ قۇقىقتارىن قورعاۋ، ولاردىڭ بۇزىلۋىنىڭ الدىن الۋ جانە جولىن كەسۋ; قۇقىق بۇزۋشىلىقتارعا ىقپال ەتەتىن سەبەپتەر مەن جاعدايلاردى انىقتاۋ جانە جويۋ، سونداي-اق ولاردىڭ سالدارىن جويۋ; وسى سالادا باسشىلىق پەن سالاارالىق ۇيلەستىرۋدى قامتاماسىز ەتۋ; ينۆەستورلاردىڭ قاتىسۋىمەن داۋلاردى سوتقا دەيىن رەتتەۋ; ورىنداۋ عامىندەتتى نۇسقامالار مەن تاپسىرمالار شىعارۋ; ينۆەستورلاردىڭ قۇقىقتارىن قورعاۋ سالاسىندا حالىقارالىق-قۇقىقتىق ىنتىماقتاستىقتى ۇيلەستىرۋ جانە جۇزەگە اسىرۋ جانە باسقا دا مىندەتتەر.

كەڭەستە ءسوز سويلەگەن باس پروكۋرور بەرىك اسىلوۆ:«قاداعالاۋ شارالارى نىسانالى ءارى الدىن الۋ سيپاتىندا بولۋى ءتيىس. ءبىزدىڭ مىندەتىمىز – قۇقىقبۇزۋشىلىقتى بولعاننان كەيىن جازالاۋ ەمەس، زاڭسىز شەشىمدەردىڭ الدىن الىپ، ادىلەتتىلىكتى ۋاقتىلى قالپىنا كەلتىرۋ»، – دەپ اتاپ ءوتتى.

باس پروكۋراتۋرا مەملەكەت باسشىسىنىڭ تاپسىرمالارى اياسىندا ينۆەستورلاردىڭ قۇقىقتارىن قورعاۋدى كۇشەيتۋ جانە قولايلى ينۆەستيتسيالىق احۋال قالىپتاستىرۋ بويىنشا كەشەندى شارالاردى ىسكە اسىرىپ جاتقانى اتاپ ءوتىلدى.

«پروكۋرورلىق سۇزگى» تەتىگى ەنگىزىلدى، ول ينۆەستورلاردىڭ قۇقىقتارىن قوزعايتىن مەملەكەتتىك ورگانداردىڭ شەشىمدەرىن پروكۋرورمەن مىندەتتى تۇردە كەلىسۋدى كوزدەيدى. اتالعان تەتىك ەنگىزىلگەن ساتتەن باستاپ پروكۋرورلارمەن 1 100 شەشىم كەلىسىلمەي قايتارىلىپ، 400 تەكسەرۋ، 480 اكىمشىلىك ءىس جۇرگىزۋ جانە 210 وزگە دەشەكتەۋ شارالارىنىڭ جولى كەسىلدى.

ناتيجەسىندە ازاماتتىق داۋلاردىڭ سانى 32%-عا، ال ينۆەستورلاردىڭ سوتتارعا جۇگىنۋى 33%-عا قىسقاردى.

سىرتقى ىستەر مينيسترلىگىمەن بىرلەسىپ ءىرى حالىقارالىق جانە جوعارى تەحنولوگيالىق ينۆەستورلاردى قولداۋعا باعىتتالعان «جاسىل ءدالىز» تەتىگى ىسكە اسىرىلۋدا. بۇل تەتىككە 137 ينۆەستيتسيالىق جوبا ەنگىزىلىپ، ولار بويىنشا 16 مەملەكەتتىك قىزمەت كورسەتۋ مەرزىمى 5 جۇمىس كۇنىنە دەيىن قىسقارتىلدى. اتالعان مەحانيزمدى ودان ءارى كەڭەيتۋ جۇمىستارى جالعاسۋدا.

قازىرگى ۋاقىتتا پروكۋرورلار جالپى قۇنى 76 ترلن تەڭگەنى قۇرايتىن 1 790 ينۆەستيتسيالىق جوبانى سۇيەمەلدەۋدە. جالپى سوماسى 23 ترلن تەڭگە بولاتىن جوبالاردى ىسكە اسىرىپ جاتقان شامامەن 2 مىڭ ينۆەستورعا ناقتى قۇقىقتىق كومەك كورسەتىلدى.

پروكۋرورلىق قاداعالاۋ شارالارىمەن كاسىپكەرلەردىڭ اكىمشىلىك كەدەرگىلەر مەن نەگىزسىز سوزبالاڭعا قاتىستى 145 پروبلەمالىق ماسەلەسى شەشىلدى.

ينۆەستورلاردىڭ وتىنىشتەرىن قاراۋ كەزىندە جول بەرىلگەن سوزبالاڭدىق پەن كەدەرگىلەر ءۇشىن 326 لاۋازىمدى تۇلعا جاۋاپكەرشىلىككە تارتىلدى.

كەڭەس قورىتىندىسى بويىنشا ينۆەستيتسيالاردى قورعاۋ سالاسىندا مۇددەلى مەملەكەتتىك ورگاندار اراسىنداعى ءوزارا ءىس-قيمىلدى ناقتى جولعا قويۋ جانە جاۋاپكەرشىلىك ايماقتارىن ايقىن ءبولۋ قاجەتتىگىنە ەرەكشە نازار اۋدارىلدى.

اتقارىلىپ جاتقان شارالاردىڭ تۇپكى ماقساتى – مەملەكەت باسشىسى جۇكتەگەن مىندەتتەردى ورىنداۋ، ءوندىرىستى دامىتۋ جانە قازاقستان رەسپۋبليكاسىنا ينۆەستورلاردىڭ سەنىمىن نىعايتۋ ەكەنى اتاپ ءوتىلدى.

Abai.kz