ءماجىلىسى بيىل 100 زاڭ قابىلداندى. بۇل تۋرالى ءماجىلىس توراعاسى ەرلان قوشانوۆ ايتتى.

"وسى جىل پارلامەنت ءماجىلىسى ءۇشىن دە جەمىستى بولدى. ءبىز مەملەكەت باسشىسىنىڭ جولداۋلارىندا، سايلاۋالدى باعدارلاماسىندا، ۇلتتىق قۇرىلتايدا بەرگەن تاپسىرمالارى نەگىزىندە بىرقاتار ماڭىزدى زاڭنامالىق اكتىلەردى قابىلدادىق. بيىل 100 زاڭ قابىلداندى، ونىڭ 24-نە دەپۋتاتتار باستاماشى بولدى. سونداي-اق، ەلىمىزدىڭ نەگىزگى قۇجاتتارى – سۋ، بيۋدجەت، سالىق، قۇرىلىس جانە تسيفرلىق كودەكستەر بويىنشا جۇمىستى اياقتادىق", – دەدى ەرلان قوشانوۆ.

بۇدان بولەك "جاساندى ينتەللەكت تۋرالى" جاڭا زاڭ قابىلداندى.

"بيىل دا قوعامدىق كەسەلدەرمەن كۇرەستى بەلسەندى تۇردە جالعاستىردىق. اسىرەسە، لۋدومانيا بويىنشا جاڭا نورمالار ەنگىزىلدى. حالىقتى، سونىڭ ىشىندە جاستاردى قورعاۋ ءۇشىن عيماراتتاردا جانە ونلاين-كەڭىستىكتە بۋكمەكەرلىك كەڭسەلەر مەن توتاليزاتورلاردى جارنامالاۋعا تىيىم سالىندى. نەكەگە تۇرۋعا ماجبۇرلەۋ دە زاڭمەن رەتتەلدى. بۇل قادام جەكە تۇلعانىڭ قادىر-قاسيەتىن، قالاۋى مەن تاڭداۋىن جانە ادامنىڭ قۇقىقتارىن قورعاۋعا دەگەن مەملەكەتتىڭ ۇمتىلىسىن ناقتى كورسەتتى.

تاعى ءبىر ماسەلە – تەلەفون ارقىلى جاسالاتىن الاياقتىقتىڭ ءوسۋى. وعان توسقاۋىل قويۋ ءۇشىن بايلانىس سالاسىندا قاتاڭ شارالار قولعا الىندى. سونىمەن قاتار، تسيفرلىق كەڭىستىكتە ءتۇرلى قاۋىپ-قاتەر ءورشىپ كەلە جاتىر. بيىل الاياقتىق سحەمالارعا قاتىسى بار تۇلعالارعا، ياعني دروپپەرلەرگە قىلمىستىق جاۋاپكەرشىلىك ەنگىزىلدى", – دەپ اتاپ ءوتتى ءماجىلىس توراعاسى.

ءبىر ادامنىڭ اتىنا 10 ابونەنتتىك نومىردەن ارتىق رەسىمدەۋگە شەكتەۋ قويىلدى. سونداي-اق الاياقتىق ماقساتتاعى قوڭىراۋلار ءۇشىن پايدالانىلاتىن نومىرلەردى بۇعاتتاۋ كوزدەلدى.

Abai.kz