«ءبىلىم تۋرالى» زاڭعا ونىڭ قاعيداتى سايكەس جاسالماعان!
قر وقۋ-اعارتۋ ءمينيسترى
ج.د. سۇلەيمەنوۆاعا!
قۇرمەتتى جۇلدىز دوسبەرگەنقىزى!
ءبىرىنشى:
«ءبىلىم تۋرالى»
قازاقستان رەسپۋبليكاسىنىڭ 2007 جىلعى 27 شىلدەدەگى №319 زاڭى.
66-باپ. شەت ەلدەگى قازاق دياسپوراسىنىڭ ءبىلىم الۋ قاجەتتىلىكتەرىن قاناعاتتاندىرۋ
- قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار.
- مەملەكەت شەت ەلدەگى قازاق دياسپوراسىنىڭ ءبىلىم الۋ قاجەتتىلىكتەرىن قاناعاتتاندىرۋعا جاردەمدەسەدى.
- شەت ەلدەگى قازاق دياسپوراسى ءۇشىن ءبىلىم بەرۋ ۇيىمدارىن قۇرۋ جانە وعان قارجىلىق-ماتەريالدىق كومەك كورسەتۋ حالىقارالىق شارتتاردا بەلگىلەنگەن تارتىپپەن جۇزەگە اسىرىلادى.
ەسكەرتۋ:
بۇل وتە جاقسى نورما، قازىر قولدانىستا تۇر...
ەكىنشى:
«قازاقستان رەسپۋبليكاسىندا تۇراقتى تۇراتىن شەتەلدىكتەردىڭ جانە ازاماتتىعى جوق تۇلعالاردىڭ مەكتەپالدى، باستاۋىش، نەگىزگى ورتا جانە جالپى ورتا ءبىلىم الۋ ەرەجەسىن بەكىتۋ تۋرالى»
قازاقستان رەسپۋبليكاسىنىڭ ءبىلىم جانە عىلىم ءمينيسترىنىڭ 2010 جىلعى 28 قىركۇيەكتەگى №468 بۇيرىعى.
2-تاراۋ. قازاقستان رەسپۋبليكاسىندا تۇراقتى تۇراتىن شەتەلدىكتەر مەن ازاماتتىعى جوق ادامداردىڭ، سونداي-اق وتباسىن بىرىكتىرۋ ماقساتىندا قازاقستان رەسپۋبليكاسىنا كەلگەندەردىڭ مەكتەپكە دەيىنگى، باستاۋىش، نەگىزگى ورتا جانە جالپى ورتا ءبىلىم الۋ ءتارتىبى
- 16 جاسقا دەيىنگى بالالاردىڭ اتا-انالارى نەمەسە زاڭدى وكىلدەرى شەتەلدىكتەر جانە ازاماتتىعى جوق ادامدار ءوز بالاسىن ءبىلىم بەرۋ ۇيىمدارىن انىقتاۋ بارىسىندا وبلىستىق، رەسپۋبليكالىق ماڭىزى بار قالا، استانا اۋدان (وبلىستىق ماڭىزى بار قالا) ءبىلىم باسقارمالارىنا ءوتىنىش جاسايدى جانە قازاقستان رەسپۋبليكاسىندا تۇراقتى تۇرۋعا قۇقىق بەرىلگەن قۇجاتتى ۇسىنادى:
شەتەلدىك - شەتەلدىكتىڭ قازاقستان رەسپۋبليكاسىندا تۇرۋعا ىقتيارحاتى;
ازاماتتىعى جوق تۇلعا - ازاماتتىعى جوق تۇلعانىڭ كۋالىگى;
بوسقىن - بوسقىننىڭ كۋالىگى;
پانالاتۋدى ىزدەۋشى تۇلعا - پانالاتۋدى ىزدەۋشى تۇلعانىڭ كۋالىگى;
قانداس – قانداس كۋالىگى.
مينيستر ب. جۇماعۇلوۆ
ەسكەرتۋ:
مۇندا – ءبىلىم جانە عىلىم ءمينيسترىنىڭ №468 بۇيرىعىندا «قانداس» دەگەن ۇعىم الىنعان.
ال، «ءبىلىم تۋرالى» زاڭنىڭ 66-بابىنىنىڭ 1 تارماعىندا «قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامدار» دەپ جازىلعان.
«قانداس» پەن ««قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامدار» مۇلدە ەكى باسقا ۇعىمدار.
دەمەك، بۇيرىق زاڭعا سايكەس جاسالماعان!
ءۇشىنشى:
«وليمپيادالىق رەزەرۆتىڭ رەسپۋبليكالىق، وبلىستىق، رەسپۋبليكالىق ماڭىزى بار قالالاردىڭ، استانانىڭ مامانداندىرىلعان مەكتەپ-ينتەرنات-كوللەدجدەرىن جانە سپورتتاعى دارىندى بالالارعا ارنالعان وبلىستىق، رەسپۋبليكالىق ماڭىزى بار قالالاردىڭ، استانانىڭ مەكتەپ-ينتەرناتتارىن قوسپاعاندا، باستاۋىش، نەگىزگى ورتا جانە جالپى ورتا ءبىلىمنىڭ جالپى ءبىلىم بەرەتىن وقۋ باعدارلامالارىن ىسكە اسىراتىن ءبىلىم بەرۋ ۇيىمدارىنا وقۋعا قابىلداۋدىڭ ۇلگىلىك قاعيدالارىن بەكىتۋ تۋرالى»
قازاقستان رەسپۋبليكاسى ءبىلىم جانە عىلىم ءمينيسترىنىڭ 2018 جىلعى 12 قازانداعى №564 بۇيرىعى.
قازاقستان رەسپۋبليكاسىنىڭ
ءبىلىم جانە عىلىم ءمينيسترى ە. ساعاديەۆ
ەسكەرتۋ:
اتالعان №564 بۇيرىقتا «ءبىلىم تۋرالى» قازاقستان رەسپۋبليكاسىنىڭ 2007 جىلعى 27 شىلدەدەگى № 319 زاڭىنىڭ 66-بابىنداعى شەت ەلدەگى قازاق دياسپوراسىنىڭ ءبىلىم الۋ قاجەتتىلىكتەرىن قاناعاتتاندىرۋ تۋرالى ءۇش نورما مۇلدە ەسكەرىلمەگەن...
ناقتىلاپ ايتساق، اتالعان «ءبىلىم تۋرالى» زاڭعا ساي، قازاقستان رەسپۋبليكاسىنان ءبىلىم الۋ ماقساتىندا كەلگەن قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قۇقىعى شەتەلىپ وتىر...
ءتورتىنشى:
«قازاقستان رەسپۋبليكاسىنداعى بالانىڭ قۇقىقتارى تۋرالى»
قازاقستان رەسپۋبليكاسىنىڭ 2002 جىلعى 8 تامىزداعى N 345 زاڭى.
25-باپ. بالانىڭ اتا-اناسىمەن بiرگە تۇرۋ قۇقىعى
- بالانىڭ ءوز اتا-اناسىمەن نەمەسە باسقا دا زاڭدى وكىلدەرiمەن بiرگە تۇرۋعا قۇقىعى بار.
اتا-اناسى تۇسىنىكتى، سوندا زاڭدى وكىلدەرi دەگەن كىمدەر؟
ەندى 1-باپتىڭ 6) تارماعىنا قاراڭىز:
1-باپ. وسى زاڭدا پايدالانىلاتىن نەگiزگi ۇعىمدار
6) بالانىڭ زاڭدى وكىلدەرى – اتا-انالار (اتا-انا), بالا اسىراپ الۋشىلار، قورعانشى نەمەسە قامقورشى، بالانى قابىلدايتىن اتا-انا (بالانى قابىلدايتىن اتا-انالار), بالانى قابىلدايتىن كاسىبي تاربيەشى (بالانى قابىلدايتىن كاسىبي تاربيەشىلەر), پاترونات تاربيەشى جانە قازاقستان رەسپۋبليكاسىنىڭ زاڭناماسىنا سايكەس بالاعا قامقورلىق جاساۋدى، ءبىلىم، تاربيە بەرۋدى، ونىڭ قۇقىقتارى مەن زاڭدى مۇددەلەرىن قورعاۋدى جۇزەگە اسىراتىن ولاردىڭ ورنىنداعى باسقا دا ادامدار;
وسى 1-باپتىڭ 6) تارماقشاسىنىڭ «قازاقستان رەسپۋبليكاسىنىڭ زاڭناماسىنا سايكەس بالاعا قامقورلىق جاساۋدى، ءبىلىم، تاربيە بەرۋدى، ونىڭ قۇقىقتارى مەن زاڭدى مۇددەلەرىن قورعاۋدى جۇزەگە اسىراتىن ولاردىڭ ورنىنداعى باسقا دا ادامدار;» دەگەن بولىگى جوعارىداعى «ءبىلىم تۋرالى» زاڭنىڭ 66-بابىنىنىڭ «1. قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ قازاقستان رەسپۋبليكاسىندا ءبىلىم الۋعا قۇقىعى بار.» دەگەن نورماسىنا قاراتىلعانى انىق.
دەمەك، بۇل – قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامدار شەتەلدە تۇرىپ قازاقستان رەسپۋبليكاسىنان ءبىلىم العىسى كەلەتىن بالالارىن باسقا دا زاڭدى وكىلدەرiنە «سەنىمحات» بەرۋ ارقىلى وقىتۋىنا بولادى دەگەن ءسوز...
ۇسىنىس
قۇرمەتتى جۇلدىز دوسبەرگەنقىزى!
قازىرگى تاعدا قولدانىستا تۇرعان ءبىلىم جانە عىلىم ءمينيسترىنىڭ 2010 جىلعى 28 قىركۇيەكتەگى №468 بۇيرىعى مەن 2018 جىلعى 12 قازانداعى №564 بۇيرىعىن «ءبىلىم تۋرالى» زاڭىنا سايكەستەندىرۋ ءۇشىن، اتالعان ەكى بۇيرىققا «قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامدار جانە (نەمەسە) ولاردىڭ سەنىمدى وكىلدەرى 16 جاسقا دەيىنگى قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامداردىڭ ءبىلىم بەرۋ ۇيىمدارىن انىقتاۋ بارىسىندا وبلىستىق، رەسپۋبليكالىق ماڭىزى بار قالا، استانا اۋدان (وبلىستىق ماڭىزى بار قالا) مەكتەپتەرىنە ءوتىنىش جاسايدى جانە كەلەسى قۇجاتتاردى تاپسىرادى»، - دەگەن جاڭا تولىقتىرۋ ەنگىزىلۋدى ۇسىنامىن.
كەلەسى قۇجاتتار مىناۋ:
- قازاقستان رەسپۋبليكاسىنىڭ ازاماتتارى بولىپ تابىلمايتىن 16 جاسقا دەيىنگى ۇلتى قازاق ادامداردىڭ ۇلتىن انىقتايتىن قۇجات;
- ات-انانسىنىڭ بىرەۋى قازاقستان رەسپۋبليكاسىندا تۇراقتى تىركەۋدە تۇرمايتىن بولسا، ونىڭ جازباشا كەلىسىمى;
- اتا-انانسىنىڭ ەكەۋى دە قازاقستان رەسپۋبليكاسىندا تۇراقتى تىركەۋدە تۇرمايتىن بولسا، ولاردىڭ قازاقستان رەسپۋبليكاسىنىڭ ازاماتى بولىپ تابىلاتىن تۋىستارىنا بەرگەن سەنىمحاتى;
- سەنىمحات يەسىنىڭ بالانىڭ ءومىرى مەن قاۋىپسىزدىگىنە بايلانىستى جاۋاپكەرشىلىكتى وزىنە العانى تۋرالى مەكتەپ ديرەكتورىمەن كەلىسىمى.
سونداي-اق، №468 جانە №564 بۇيرىققا (قاعيداتقا) «قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامدارعا» ارناپ، ارنايى جاڭا قوسىمشالار ەنگىزىلۋى قاجەت.
سونىمەن بىرگە، وسى نورما اتالعان ەكى بۇيرىققا ەنگەن جاعدايدا، №468 بۇيرىقتىڭ وزگە تارماقتارىنداعى «قانداستار» دەگەن ءسوز الىنىپ تاستالۋى كەرەك.
ءسىزدىڭ وسى ۇسىنىستىڭ كەلەسى وقۋ جىلىنا قالماي جۇزەگە اسۋىنا ىقپال ەتۋىڭىزدى سۇرايمىن!
قۇرمەتپەن،
اۋىت مۇقيبەك،
«ەرەن ەڭبەگى ءۇشىن» مەدالىنىڭ، «قۇرمەت» وردەنىنىڭ يەگەرى
Abai.kz
